باژێروانى کەرکوکى گۆڕان: کار بە پڕۆژەکانى نەوشیروان مستەفا و گۆڕان بکرایە دۆخى کەرکوک و ناوچە دابڕێنراوەکان بەم ئەنجامانەى ئێستا نەدەگەیشت

باژێروانى کەرکوکى گۆڕان: کار بە پڕۆژەکانى نەوشیروان مستەفا و گۆڕان بکرایە دۆخى کەرکوک و ناوچە دابڕێنراوەکان بەم ئەنجامانەى ئێستا نەدەگەیشت

باژێروانى کەرکوکى بزوتنەوەى گۆڕان رادەگەیەنێت؛ کەرکوک پرسێکى نەتەوەیی و نیشتیمانە و کێشەکانى بێ چارەسەر کەڵەکەبوون، ئێمە پێمانوایە کوردستانیبوونى کەرکوک حاشاهەڵنەگر و حەتمییە، بەڵام گەورەکردنى کێشەکان بە قازانجى پێکهاتەکان نییە، دەشڵێت: ئەگەر کار بە پڕۆژەکانى رەوانشاد نەوشیروان مستەفا و بزوتنەوەى گۆڕان بۆ کەرکوک و ناوچە دابڕێنراوەکان بکرایە، دۆخى کورد و ئەم ناوچانە بە ئاقارێکى دیکە دەڕۆیشت و بەم ئەنجامانەى ئێستا نەدەگەیشت.

ئەو ململانێ سیاسیەى لە هەرێمى کوردستان هەبوو گوازرایەوە بۆ کەرکوک و دۆخەکەى بە ئاارێکى خراپتر برا و یەکیتى و پارتى وا کاریان نەکردوە کە کێشەى خاکمان لەم ناوچانە هەیە

حەکیم عوبێد، باژێروانى کەرکوکى بزوتنەوەى گۆڕان لەبارەى دواین پێشهاتەکان و دۆخى کەرکوکەوە جەخت دەکاتەوە لەوەى لە دیدی بزوتنەوەى گۆڕاندا کەرکوک پرسێکى نەتەوەیی و نیشتیمانیە و کێشەکانى بێ چارەسەر کەڵەکەبوون، گەورەکردنى ئەو کێشانەش بە قازانجى پێکهاتەکان و کورد نییە، بەڵام لەسەرەتاوە تا ئێستا پارتى و یەکێتى ئەو ململانێ سیاسیەى لە هەرێمى کوردستان هەیانبوو گواستیانەوە بۆ کەرکوک و دۆخەکەى بە ئاقارێکى خراپتر برا، چونکە "ئەوان وا کاریان نەکردوە کە کێشەى خاکمان لەم ناوچانە هەیە و کێشەکانى ئەوان حیزبى و شەخسین".

دەشڵیت: پڕۆژەکانى خودى رەوانشاد کاک نەوشیروان مستەفا و بزوتنەوەى گۆڕان بۆ کەرکوک و ناوچە دابڕێنراوەکان تەنانەت بۆ هەرێمى کوردستانیش ئەگەر گوێى لێبگیرایە و کارى پێبکرایە، دۆخى کورد و ئەم ناوچانە بە ئاقارێکى دیکە دەڕۆیشت و بەم ئەنجامانەى ئێستا نەدەگەیشت".

ئەوە لەکاتێکدایە شەوى رابردو دواى ئاڵۆزبوونى دۆخى شارەکە و شەهید بون و برینداربوونى چەند هاوڵاتییەکى کورد، بزوتنەوەى گۆڕان لە راگەیەندراوێکدا ئەوەى خستەڕوو کە شەڕ و ئاژاوە لە قازانجی بەرژەوەندییەکانی کورد نیە لە کەرکوک و "بەرپرسیارێتی پارتی و یەکێتی ئەوەیە لەبری عینادی و گواستنەوەی کێشە حیزبییەکان لە هەرێمەوە بۆ کەرکوک و ناوچەدابڕاوەکان؛ لەگەڵ لایەنەکانی دیکەی پێکهاتەکانی کەرکوک بگەنە ڕێککەوتن بۆئەوەی چیتر خەڵکی ڕەسەنی کەرکوک نەبنە قوربانی ململانێی تەسکی حیزبی و خوێنی خەڵکی شارەکە چیتر نەڕژێت".