جێگرى سەرۆکى هەرێم: دەستور و یاسا جێبەجێبکرێت بە ئامانجی چارەسەرکردنی کێشە و ئاستەنگەکانی نێوان هەولێر و بەغدا

جێگری سەرۆکی هەرێمی کوردستان و کۆنسوڵی هۆڵەندا جەخت لە جێبەجێکردنى دەستور و یاسا  دەکەن بە ئامانجی چارەسەرکردنی کێشە و ئاستەنگەکانی نێوان هەولێر و بەغدا و بەردەوامی پرۆسەی چاکسازی و بەنیشتیمانی کردنی دامەزراوەکان و یەکخستنەوەی هێزەکانی پێشمەرگە بەپێویست دەزانن.
کرد

ئەمڕۆ سێشەمە (٣/١٠/٢٠٢٣)، مستەفا سەید قادر جێگری سەرۆکی هەرێمی کوردستان، لە ئۆفیسی خۆی لە هەولێر پێشوازی لە یاکۆ بریندز کونسوڵی گشتی هۆڵەندا لە هەرێمی کوردستان کرد  و لە کۆبونەوەیەکدا، هەلومەرجی سیاسی هەرێمی کوردستان و عێراق و پرۆسەی هەڵبژاردن و داهاتووی نەخشەی سیاسی ناوچەکە و پرسەکانی نێوان هەولێر و بەغدا گفتوگۆی لەبارەوە کرا، جەخت لە جێبەجێکردنی دەستور و یاسا کرایەوە، بە ئامانجی چارەسەرکردنی کێشە و ئاستەنگەکانی نێوان هەردولا.

جێگری سەرۆکی هەرێم ستایشی کونسوڵی هۆڵەندای کرد کە لە چاوپێکەتنێکی تەلەڤزیۆنیدا ڕاشکاوانە دەستی خستۆتە سەر کێشە و گرفت و ئاڵەنگاریییەکانی ناوخۆی هەرێمی کوردستان، هەردولا جەختیان لەسەر بەردەوامی پرۆسەی چاکسازی و بەنیشتیمانی کردنی دامەزراوەکان و یەکخستنەوەی هێزەکانی پێشمەرگە کردوە.

لە کۆتایی کۆبونەوەکەدا، وێڕای سوپاس و پێزانین بۆ پشتیوانی و هاوکارییەکانی هۆڵەندا بۆ هەرێمی کوردستان، هەردولا هیوا خوازبوون پەیوەندییەکانیان بەردەوام و بەرفراوانتربکرێت.