کوێستان محەمەد: شۆڕشێكی چاكسازیمان دژى گەندەڵى لەناو چاكسازییه‌كان بەرپاکردوە

وەزیری کار و کاروباری کۆمەڵایەتی رایدەگەیەنێت؛ شۆڕشێكی چاكسازییان دژى گەندەڵى لەناو چاكسازییه‌كان و وشککردنى سه‌رچاوه‌کانى گه‌یاندنی مادده‌ هۆشبه‌ره‌كانیان بۆ ناو چاكسازییه‌كان بەرپاکردوە و دەشڵێت: ئەو کارەساتەمان راگرتوە و سەنتەرێکى چارەسەر و شیاندنەوە بۆ ئالودەبوانى مادەى هۆشبەر لە شەقڵاوە دەکەینەوە.

کوێستان محەممەد، وەزیری کار و کاروباری کۆمەڵایەتی حکومەتی هەرێمی کوردستان لە چوارچێوەى پانێڵێکدا لە (کۆنفرانسی بەرەنگاربوونەوەی ماددە هۆشبەرەکان) پەیوەست بە کارەکانیان بۆ بەرەنگاربونەوەى مادەى هۆشبەر و چارەسەرکردنی بەکارهێنەر و ئالودەبوانى مادەی هۆشبەر؛ رایگەیاند کە لەم کابینەیەدا شۆڕشێكی چاكسازییان بەرپاکردوە دژى گەندەڵى لەناو چاكسازییه‌كان، به‌شێوه‌یه‌ك هه‌موو سه‌رچاوه‌ و رێگه‌كانی گه‌یاندنی ماده‌ هۆشبه‌ره‌كانیان بۆ ناو چاكسازییه‌كان وشك كردووه‌ و دەڵێت: پێشتر لەناو چاکسازییەکاندا بازرگانى مادەى هۆشبەر ئەنجامدراوە و مادە براوەتە ژورە و ئامێرى سۆنەر نەبووە بۆ پشکیننى ئەو کەلوپەلانەى دەچونە ژورەوە بۆ چاکسازییەکان، سۆنەرمان داناوە و سەرچاوەى بردنەژورەوەى مادەى هۆشبەرمان وشک کردوە، سزادراوانیشمان لەسەر بنەماى مادەى حوکمەکانیان جیاکردوەتەوە و ئەوانەشى تێوە گلابون لە گەندەڵى ئیدارى و دارایی و کەمتەرخەمى سزامان داون و دورمانخستونەتەوە".

هەروەک ئاشکراى دەکات؛ ئەوانەى بەکارهێنەرى مادەى هۆشبەرن پێشویستن بە پێدانى چارەسەر و شیاندنەوە هەیە، پێشتر نەخشە و دەرخستە و پلانمان هەبو بۆ دروستکردنى سەنتەرى تایبەت بە شیاندنەوەى بەکارهێنەرانى مادەى هۆشبەر لەسەرجەم پارێزگاکان، بەڵام قەیرانى دارایی رێگر بو، لەگەڵ ئەوەشدا ئێستا سەنتەرێکى چارەسەر و شیاندنەوە بۆ ئالودەبوانى مادەى هۆشبەر لە شەقڵاوە دەکەینەوە و کادیرى پێویستى بۆ دادەمەزرێنین بۆئەوەى بەکارهێنەرانى مادەى هۆشبەر کە جیاوازن لەوانەى بازرگانی پێوە دەکەن، شیاندنەوەیان بۆ بکرێت.