وەزیرى دارایی: پڕۆژەى هەژمارى من کێشەى موچە و سیولە چارەسەر دەکات

وەزیرى دارایی رایدەگەیەنێت؛ پرۆژەى هەژمارى من دەستیپێکردوە لە چەند رۆژى داهاتو سنورى پارێزگاى هەولێر تەواو دەبێت و سەرەتاى مانگى داهاتو لە سلێمانى و دهۆکیش پڕۆسەکە دەستپێدەکات، بەتەواوبونى پڕۆسەکە کێشەى موچە و سیولەش چارەسەر دەکات.

ئاوات جەناب نورى، وەزیرى دارایی و ئابورى حکومەتى هەرێم لەکاتى بەسەرکردنەوەى پڕۆژەى هەژمارى من لە کۆیە لە لێدوانێکى رۆژنامەوانیدا رایگەیاند: پڕۆژەکە دەستیپێکردوە لە چەند رۆژى داهاتودا لە تەواوى پارێزگاى هەولێر تەواو دەبێت، لە سەرەتاى مانگى داهاتوش لە سنورى سلێمانى و دهۆکیش دەستپێدەکات، پڕۆژەکە پشت بە پێنج بانکى دانپێدانراو دەبەستێت و لە دو ساڵى داهاتودا سەرجەمى موچەخۆرانى حکومەتى هەرێم و کەرتى تایبەتیش دەخرێنە سەر سیستمەکە، بەشێوەیەک واى لێدێت هەمو هاوڵاتیەک لەرێگەى ئەو ڤیزاکارتەى هەیەتى دەتوانێت موچەکەى وەربگرێت و پارەکەى بەکاربهێنێت لە هەمو ئەو شوێنانەش کە پێویستە ئامێرى تایبەت دادەنرێت.

ئەوەشى خستەڕو کە پڕۆژەى هەژمارى من کێشەى موچە چارەسەر دەکات و رۆتیناتەکانى پێشو نامێنێت لەگەڵ ئەوەشدا کێشەى سیولەش چارەسەر دەکات، موچەخۆران دەتوانن سود لە قەرزى بانکى وەربگرن.

پەیوەست بە پشکى هەرێم بۆ ئەو سێ مانگەى ماوە لەلایەن بەغداوە، وەزیرى دارایی وتى: کۆتا میزانیەى موراجەعەمان ناردوە بۆ بەغدا و تیممان ئامادەیە سەردانى بەغدا بکاتەوە و هیچ کێشەیەک لاى ئێمەوە نەماوە، ئەوەشى کە پێمان گەیشتوە لاى سەرۆک وەزیرانەوە ئامادەیی هەیە بۆ چارەسەرى کێشەکان.