مەکۆى گۆڕان لە کەرکوک: یەکڕیزى و یەکگرتویی کلیلى چارەسەرى کێشەکان و رێگرییە لەو زوڵم و ستەمەى لە کورد دەکرێ

مەکۆى گۆڕان لە کەرکوک رایدەگەیەنێت؛ یەکڕیزى و یەکگرتویی کلیلى چارەسەرى کێشەکانى کورد و رێگرییە لەو زوڵم و ستەمەى لە کورد دەکرێ لە کەرکوک و ناوچە کوردستانیە دابڕێنراوەکان.

دواى ئەوەى ئەمڕۆ یەکشەممە شاندێکى مەکۆى گۆڕان لە کەرکوک بە سەرۆکایەتى باژیروان بۆ پشتیوانى دانیشتوانى گەڕەکى نەورۆز کە چەند رۆژێکە هێزێکى سوپا چوەتەناوى ، سەردانى خێمەى ناڕەزایەتى دانیشتوانى گەڕەکەکەیان کرد و محەمەد نەسڕەدین سکرتێرى مەکۆ رایگەیاند: بەداخەوە خەریکە خێمە هەڵدان بۆ ئەو زۆر و ستەمەى لە کورد دەکرێت زۆر دەبێت، ئێمە سەردانەکەمان بۆ دوپاتکردنەوەى پاڵپشتییە بۆ رێگرى لەو ناهەقى و زوڵمەى لە خەڵکى ئێمە دەکرێت.

دەشڵێت: باشترین رێگە و کلیلى چارەسەر بۆ پێشگرتن لەم روداوانە و ئەو زوڵم و ستەم و ناهەقیانەى لە کورد دەکرێت لەم ناوچانە ئەوەیە لایەنە سیاسییەکان یەکدەنگ و یەکگرتو یەکڕیز بن لانى کەم لە ناوچە کوردستانییە دابڕێنراوەکان.


ئەوە لەکاتێکدایە پێشتریش و لە پێش ئەنجامدانى هەڵبژاردنى ئەنجومەنى پارێزگاکانیشەوە بزوتنەوەى کۆڕان هۆشداری دا لەوەى لایەنەکان یە یەکلیستى کوردستانى بەشدارى بکەن لەپێناو بەهێزکردنەوەى پێگە و سەنگى کورد، دواى هەڵبژاردنەکەش دلێر عەبدولخالق وتەبێژى گۆڕان رایگەیاند:  کێشەى ئێمە لەو ناوچانە کێشەیەکى گەورەترە کە رەهەندى نیشتیمانى و نەتەوەیی هەیە ئەویش کێشەى خاک و ناسنامەیە.