جێگری سەرۆکی هەرێم: پێویستە هەنگاوی خێراتر بنرێ بۆ چاکردنی دۆخی ژیانى هاوڵاتیان و کۆتاییهێنان بە کێشەی موچە

جێگری سەرۆکی هەرێم، لە کۆبونەوەیدا لەگەڵ کۆنسوڵى گشتى ئەمەریکا، جەخت لە بایەخی یەکڕیزی ناو ماڵی کورد و لایەنە سیاسییەکان دەکاتەوە و رایدەگەیەنێت؛ پێویستە هەنگاوی خێراتر بنرێن بۆ چاکردنی دۆخی ژیان و گوزەرانی هاوڵاتیان و کۆتاییهێنان بە کێشەی موچە و لێکەوتە خراپەکانی لە رێگای گفتوگۆ و دیالۆگی بەردەوامەوە لەگەڵ ناوەند، دەشڵیت: جێبەجێکردنی دەستور و فیدڕاڵیەت لە چوارچێوەی عێراقدا، سەقامگیری سیاسی و مافی هەموو پێکهاتەکان دەستەبەر دەکات.

ئەمڕۆ  سێشەممە (٦/٢/٢٠٢٤)، مستەفا سەید قادر، جێگری سەرۆکی هەرێمی کوردستان، پێشوازی لە مارک سترۆ کونسوڵی گشتی ئەمریکا لە هەرێمی کوردستان و وەفدێکی یاوەری کرد و لە دیدارێکدا، باس لە بارودۆخی سیاسی هەرێمی کوردستان و عێراق و ناوچەکە کرا، تیشک خرایە سەر کێشە و ئاڵنگارییەکانی نێوان هەولێر و بەغدا، کێشەی بودجە و پرسی هەڵبژاردنی پەرلەمانی کوردستان و یەکڕیزی و یەکخستنی لایەنەکان و پاراستنی ئاسمان و سەروەری هەرێم و عێراق و پرۆسەی یەکگرتنەوەی پێشمەرگە  و قەیرانی دارایی گفتوگۆیان  لەبارەوە کرد.

جێگری سەرۆکی هەرێم، جەختیکردەوە لەسەر بایەخی یەکڕیزی ناو ماڵی کورد و لایەنە سیاسییەکان، هەوڵەکانی دامەزراوەی سەرۆکایەتی هەرێمی لەو پێناوەدا بەگرنگ وەسفکرد.

هەردولا هاوڕابوون لەسەر ئەوەی کە پێویستە هەنگاوی خێراتر بنرێن بۆ چاکردنی دۆخی ژیان و گوزەرانی هاوڵاتیان و کۆتاییهێنان بە کێشەی موچە و لێکەوتە خراپەکانی لە رێگای گفتوگۆ و دیالۆگی بەردەوامەوە، هەروەها جێبەجێکردنی دەستور و فیدڕالیەت لە چوارچێوەی عێراق، سەقامگیری سیاسی و مافی هەموو پێکهاتەکان دەستەبەر دەکات.

لە کۆتایدا، جێگری سەرۆکی هەرێم، سوپاسی هەوڵەکانى ئەمەریکای کرد بۆ پشتیوانیکردنی عێراق و هەرێمی کوردستان .