جێگری سەرۆکی هەرێم: جەخت لە یەکخستنەوەی هێزەکانی پێشمەرگە دەکەینەوە

جێگری سەرۆکی هەرێم لە دیدارێکدا لەگەڵ کۆنسوڵى ئەمریکا، جەخت لە یەکخستنەوەی هێزەکانی پێشمەرگە دەکاتەوە و ئاماژە بە پێویستى دیاریکردنی رۆژێکی نیشتیمانی بۆ پرۆسەی هەڵبژاردن دەکات لە دەستوری داهاتووی هەرێمی کوردستاندا، بۆ ئەوەی چیتر دواکەوتنی ئەم پرۆسەیە نەبێتە جێگەی مشتومڕ و یارمەتی پەرەپێدانی پرۆسەی دیموکراسی بدات.

ئەمڕۆ چوارشەمە، ١٥ / ٥ / ٢٠٢٤، مستەفا سەید قادر، جێگری سەرۆکی هەرێمی کوردستان، لە سەرۆکایەتی هەرێم، پێشوازی لە مارک سترۆ، کونسوڵی گشتی ویلایەتە یەکگرتوەکانی ئەمریکا لە هەرێمی کوردستان کرد و لە دیدارێکدا، بارودۆخی سیاسی هەرێمی کوردستان و عێراق و ناوچەکەیان تاوتوێ کرد، پرسی سەقامگیری ئەمنی و هەڵبژاردنی پەرلەمانی کوردستان و بەرەوپێشچونی پەیوەندییەکانی هەولێر و بەغدا و چارەسەری کێشەی موچە و بودجە و رەنگدانەوەی لەسەر باش بونی ژیان و گوزەرانی خەڵک و خزمەتگوزارییەکان خرایە بەرباس و جێگری سەرۆکی هەرێم جەختی لە یەکخستنەوەی هێزەکانی پێشمەرگە کردەوە.

هەردولا جەختیان لە ئەنجامدانی هەڵبژاردنی پەرلەمانی کوردستان کردەوە و جێگری سەرۆک بە بایەخەوە باسی لە دیاریکردنی رۆژێکی نیشتیمانی بۆ پرۆسەی هەڵبژاردن کرد لە دەستوری داهاتووی هەرێمی کوردستاندا، بۆ ئەوەی چیتر دواکەوتنی ئەم پرۆسەیە نەبێتە جێگەی مشتومڕ و یارمەتی پەرەپێدانی پرۆسەی دیموکراسی بدات.