بە ئامادەبونی دانا ئەحمەد مەجید، كۆبونەوەی ئەنجومەنی قەزای سلێمانی بەڕێوەچو

ئەمڕۆ پێنجشەمە (18ی 9ی2025)، بە ئامادەبونی دانا ئەحمەد مەجید، رێكخەری گشتی بزوتنەوەی گۆڕان، كۆبونەوەی ئاسایی ئەنجومەنی قەزای ناوەندی سلێمانی لە مەكۆی سلێمانی بەڕێوەچو.

كۆبونەوەكە تایبەت بو بە رێكخستنەوە و نوێكردنەوەی بەشێك لە ئۆرگانەكانی ئەنجومەنی قەزای ناوەندی سلێمانی بزوتنەوەی گۆڕان و باسكردن لە رێگاكانی پەیوەندیكردن بە هەموو ئەو هاوڕێ گۆڕانخوازانەی لە سنوری شاری سلێمانی كە پێشتر هەڵسوڕاوی چالاك بون و ئێستا بە هەر هۆكارێك دوورن لە كاری رێكخراوەیی.

لە سەرەتای كۆبونەوەكەدا دانا ئەحمەد مەجید، ستایشی هەوڵ و كارەكانی ستافی ئەنجومەن و دەستەی بەڕیوەبەری مەكۆی سلێمانی كرد كە لە چەند مانگی رابردوودا ئەركە رێكخراوەیەكانیان بەباشی راپەڕاندوە و ئامادەی هەنگاوەكانی خۆڕێكخستنەوەی بزوتنەوەی گۆڕانن. جەختیشی كردەوە كە سلێمانی وەك شار و مەكۆی سەرەكی وەك یەكە رێكخراوەیەكەی بەشێكی زیندوی گرنگی بزوتنەوەكەن و داوایكرد زیاتریش لە رابردو لەناو ئێش و ئازارەكانی خەڵكدا بن و پردێكی پەیوەندی و كاریگەریش بن بۆ پشتیوانی و گوزارشتكردن لە داواكارییەكانی خەڵك.

لای خۆیەوە رەئوف ئەحمەد کاکى باژێروانی سلێمانی سوپاسی پێزانینی ئاڕاستەی گۆڕانخوازانی سنوری مەكۆ كرد، هاوكات بەردەوامی هەوڵەكانی بە ئاڕاستەی خۆڕێكخستنەوە و بەهێزكردنەوەی ئۆرگانەكانی مەكۆی سلێمانی دوپاتكردەوە و جەختی كردەوە كە بە هەموو توانیانەوە هەوڵی جێبەجێكردنی بەرنامەی سیاسی بزوتنەوەی گۆڕان دەدەن و وەك هەمیشە لە بەرەی خەڵك دەمێننەوە.

فۆتۆ: بڕیار نامیق