هەولێر؛ گۆڕان هەنگاوی كرداریی دەنێت بۆ خۆڕێكحستنەوە

شاندێكی بزوتنەوەی گۆڕان بۆ تاوتوێكردنی دۆخی سیاسی و دواین پێشهات و ئاڵنگاریەكان و دۆخی ناوخۆیی و هەنگاوەكانی خۆڕێكستنەوە لەگەڵ هەڵسوڕاوانی هەولێر و سۆران، كۆدەبێتەوە.

لە چوارچێوەی راسپاردەی كۆنفڕانسی نیشتمانی و كۆبونەوەكانی جڤاتی نیشتمانی و دەستوری نوێی ناوخۆیی پەسەندكراوی كۆنفڕانس پەیوەست بە هەنگاوەكانی خۆڕێكخستنەوە، شاندێكی گۆڕان كە پێكهاتون لە شاخەوان رەئوف بەگ و نەسرین جەمال و جەعفەر خەیات ئەندامانی ئەنجومەنی سیاسی، كاردۆ محەمەد و كاوە عوسمان ئەندامی جڤاتی نیشتمانی لە مەكۆی گۆڕان لە هەولێر لەگەڵ ئەندامانی جڤاتی نیشتمانی و هەڵسوڕاوانی هەولێر و سۆران كۆبونەوە.

لە ئێستادا بزوتنەوەی گۆڕان سەرجەم ئاست و ئۆرگانەكان لەژیر راسپاردەی كۆنفڕانسی نیشتمانیدا سەرقاڵی خۆڕێكخستنەوە و هەنگاوی كرداریی و ئامادەكاریە بۆ قۆناغی نوێ بەشێوەیەك كە لە ئاست چاوەڕوانی گۆڕانخوازان و تەواوی هەڵسوڕاوان و خەڵكدا بێت.