پیرۆزباییەکان بۆ رێکخەری گشتی و خانەی راپەڕاندن

14/09/2019

دوای هەڵبژاردنی رێکخەری گشتی و ئەندامانی خانەی راپەڕاندن، هەریەک لە سەرۆکی هەرێمی کوردستان، سەرۆکی پارتی دیموکراتی کوردستان، جێگری سکرتێری گشتی یەکێتی نیشتیمانی کوردستان، ئەمیری کۆمەڵی ئیسلامی کوردستان، جێگری سەرۆکی حکومەتی هەرێم و سەرۆکی ئاژانسی پاراستن و زانیاری/ زانیاری، پیرۆزباییان لێدەکەن.

دەقی پەیامەکان

نێچیرڤان بارزانی: عومه‌ر سه‌يد عه‌لى به‌ مێژوى خه‌بات و تێكۆشان و به‌ ئاماده‌يى و كه‌سايه‌تيى خۆى، شايه‌نى دوباره‌ هه‌ڵبژاردنه‌وه‌ى بو

ئێواره‌ى ئه‌مڕۆ شه‌ممه‌ (14/9/2019) له‌ په‌يوه‌ندييه‌كى ته‌له‌فۆنيدا له‌گه‌ڵ عومه‌ر سه‌يد عه‌لى، رێكخه‌رى گشتيى بزوتنه‌وه‌ى گۆڕان، نێچيرڤان بارزانى سەرۆکی هەرێمی کوردستان وێڕاى پيرۆزبايى و ده‌ربڕينى خۆشحاڵى به‌ دوباره‌ هه‌ڵبژاردنه‌وه‌یان به‌ رێكخه‌رى گشيتى بزوتنه‌وه‌ى گۆڕان، دوپاتى كرده‌وه عومه‌ر سه‌يد عه‌لى به‌ مێژوى خه‌بات و تێكۆشان و به‌ ئاماده‌يى و كه‌سايه‌تيى خۆى، شايه‌نى دوباره‌ هه‌ڵبژاردنه‌وه‌ى بو.
سه‌رۆكى هه‌رێمى كوردستان، پيرۆزباييى سه‌ركه‌وتنى هه‌ڵبژاردنه‌كانى له‌ بزوتنه‌وه‌ى گۆڕان و تيمى تازه‌ى سه‌ركرايه‌تيى بزوتنه‌وه‌كه‌ كرد و هيواى سه‌ركه‌وتنى بۆ خۆيان و بزوتنه‌وه‌ى گۆڕان خواست، لەبەرامبەردا‌ عومه‌ر سه‌يد عه‌لى، رێکخەری گشتیی بزوتنەوەی گۆڕان پێزانينى خۆى بۆ سه‌رۆكى هه‌رێمى كوردستان ده‌ربڕى و سوپاسى كرد.


مەسعود بارزانی پیرۆزبایی لە رێكخەری گشتیی دەكات

هەر ئەمڕۆ شەممە، (14/9/2019) مەسعود بارزانی سەرۆکی پارتی دیموکراتی کوردستان لە پەیوەندییەكی تەلەفۆنیدا بەبۆنەی دوبارە هەڵبژاردنەوەی وەك رێكخەری گشتیی بزوتنەوەی گۆڕان لە هەڵبژاردنە ناوخۆییەكانی بزوتنەوەی گۆڕان، پیرۆزبایی لە عومەر سەید عەلی كرد و هیوای سەركەوتنی بۆ خواست.
مەسعود بارزانی پیرۆزبایی سەركەوتنی هەڵبژاردنە ناوخۆییەكانی بزوتنەوەی گۆڕانی لە رێكخەری گشتیی كرد.


کۆسرەت رەسوڵ: هیوادارام هه‌ڵبژاردنه‌وه‌تان وه‌ك رێكخه‌ری گشتی رۆڵی هه‌بێ له‌ یه‌كگوتاری سه‌رجه‌م هێز و لایه‌نه‌ سیاسییه‌كان

‎هەر ئەمڕۆ شەممە، کۆسرەت رەسوڵ عەلی جێگری سکرتێری گشتی یەکێتی نیشتیمانی کوردستان لە پەیامێکدا کە ئاڕاستەی عومەر سەید عەلی رێکخەری گشتی و خانەی راپەڕاندنی کردوە بە بۆنەی هەڵبژاردنیان لەلایەن جڤاتی نیشتیمانییەوە، ئاماژەی بەوەکردوە؛ هیواخوازم دوباره‌ هه‌ڵبژاردنه‌وه‌تان وه‌ك رێكخه‌ری گشتی بزوتنه‌وه‌ی گۆڕان رۆڵی ئه‌رێنی هه‌بێ له‌ پێشخستن و په‌ره‌پیدانی په‌یوه‌ندییه‌كانی نێوانمان و یه‌كگوتاری سه‌رجه‌م هێز و لایه‌نه‌ سیاسییه‌كان به‌ئامانجی زاڵ بون به‌سه‌ر ته‌نگژه‌كان و كۆتایی هێنان به‌ قه‌یرانه‌كان.

‎عەلی باپیر: وەک کۆمەڵ بڕیارمان وایە لەگەڵ گۆڕاندا لەسەر پەیوەندیی دو قۆڵییمان بەردەوام بین

دوای هەڵبژاردنی رێکخەری گشتی و ئەندامانی خانەی راپەڕاندن، عەلی باپیر ئەمیری کۆمەڵی ئیسلامی کوردستان، پەیامێکی ئاڕاستەی عومەر سەید عەلی کردوە و نوسیویەتی: بە بۆنەی هەڵبژاردنەوەی جەنابت وەک رێکخەری گشتی بزوتنەوەی گۆڕان و هەڵبژاردنی خانەی راپەڕاندنەوە، بەناوی خۆم و ئەنجومەنی سیاسییەوە پیرۆزبایتان لێدەکەن و هیوام وایە لە راپەڕاندنی کارەکانتان و بەرەوپێشبردنی بزوتنەوەکەتاندا سەرکەوتوبن و ئێمەش لە کۆمەڵی ئیسلامییەوە بڕیارمان وایە لەگەڵ بزوتنەوەی گۆڕاندا لەسەر پەیوەندی دو قۆڵییمان بەردەوام بین و هەوڵی زیاتر گەشەپێدانیشی بدەین.
ئاماژەی بەوەکردوە؛ هیوادارم بە هەوڵ و هیمەتی هەمو لایەک بەسەر کێشە و گرفتەکانی هەرێمەکەماندا زاڵ بین و کارێک بکەین هەرچی زیاتر کاری دامەزراوەی یاسا سەروەریی قوڵ بکەینەوە، سەرەنجام دادگەریی گشتگیر بچەسپێنین و کۆتایی بە قۆرخکاریی و گەندەڵیی و ستەمکاریی جۆراو جۆر بێنین.

قوباد تاڵەبانی: وەک تێکۆشەرێکی دێرین شایستەی ئەو پۆستەن و لەئاستی چاوەڕوانیەکانن

 قوباد تاڵەبانی، جێگری سەرۆک وەزیرانی هەرێمی کوردستانیش لە پەیامێکدا کە ئاڕاستەی عومەر سەید عەلی رێکخەری گشتی بزوتنەوەی گۆڕانی کردوە، پیرۆزبایی لێکردوە بەبۆنەی کۆتاییهاتنی هەڵبژاردنه ناوخۆییەکان و رایگەیاندوە: دوبارە ھەڵبژاردنەوەتان بە رێکخەری گشتی پیرۆز بێت و جەنابتان وەک تێکۆشەرێکی دێرین شایستەی ئەو پۆستەن و لەئاستی چاوەڕوانیەکانن، هیوای سەرکەوتنتان بۆ دەخوازم و ئەم ھەڵبژاردنەش ببێتە ھۆکاری باشتر رێکخستنەوەی کار و نێوماڵی گۆڕان.
جێگری سەرۆک وەزیرانی ئاماژەی بەوەکردوە؛ گرنگە ھەڵبژێردراوانی نوێی خانەی راپەڕاندن ببنە پاڵپشت و ھاوکار بۆ جێبەجێ کردنی کارنامەی حکومەتی ھەرێمی کوردستان کە خزمەتکردنی ھاوڵاتیانی کوردستانی کردوەتە ئامانجی خۆی.

لاهور جەنگی: تەبایی و ھاوکاریی سیاسی و رێککەوتنامەی دەباشان لە نێوان گۆڕان و یەکێتی ببوژێنرێتەوە

لەلایەکی دیکەوە، لاهور جەنگی تاڵەبانی، بەڕێوەبەری ئاژانسی پاراستن و زانیاری/ زانیاری، پیرۆزبایی لە عومەر سەید عەلی رێکخەری گشتی بزوتنەوەی گۆڕان و عەدنان عوسمان سکرتێری جڤاتی نیشتیمانی و جەمال حاجی محەمەد سکرتێری جڤاتی گشتی و سەرجەم ئەندامانی خانەی راپەڕاندن کردوە بە بۆنەی سەرکەوتنیان لە ھەڵبژاردنەکان و لەرێی ئەوانیشەوە، پیرۆزبایی لەسەرجەم ئەندام و لایەنگرانی گۆڕان کردوە.
ھیوای خواستوە ھەڵبژاردنەوەی رێکخەری گشتی و نوێکردنەوەی خانەی راپەڕاندن، تەبایی و ھاوکاریی سیاسی و رێککەوتنامەی گرنگی دەباشان، لە نێوان بزوتنەوەی گۆڕان و یەکێتیی نیشتمانیی کوردستان ببوژێنێتەوە و ھەماھەنگی نێوان ھەردولا بخاتە سەرپێ، بۆ راستکردنەوەی باڵانسی ھێز لە ھەرێمی کوردستان و خزمەتکردنی زیاتر بۆ کۆمەڵانی خەڵکی کوردستان.


هەواڵی زیاتر