کونسوڵی گشتی ئەمریکا لە هەرێمی کوردستان، سەردانی نما و چیان نەوشیروان مستەفای کرد.

ئەمڕۆ هەریەک لە چیا نەوشیروان مستەفا و نما نەوشیروان مستەفا لە سلێمانی، پێشوازییان لە ستیڤن فەیگن کونسوڵی گشتی ئەمریکا لە هەرێمی کوردستان کرد.

لە کۆبوونەوەکەدا، کە کوێستان محەمەد وەزیری کار و کاروباری کۆمەڵایەتی و شوناس شێرکۆ ئەندامی ژووری پەیوەندییە دیپلۆماسییەکانی بزوتنەوەی گۆڕان ئامادەی بوون، گفتوگۆ لەبارەی دۆخی هەرێمی کوردستان، عێراق، ناوچەکە و بەتایبەت پرسی پێکهێنانی حکومەتی نوێی عێراق کرا.

لە کۆبوونەوەکەدا جەخت لەسەر پێدانی مافەکانی کورد بەپێی دەستور کرایەوە، لە نێویاندا بودجە، شایستە داراییەکانی هەرێمی کوردستان و موچەی فەرمانبەران.

کونسوڵی گشتی ئەمریکا بە پێویستی زانی، مافەکانی کورد لە کابینەی داهاتووی عێراق رەچاو بکرێت.

لە کۆبونەوەکەدا، جەختکرایەوە لەسەر هەنگاوەکانی چاکسازی لە هەرێمی کوردستان، بەتایبەت پرسی یەکگرتنەوەی هێزەکانی پێشمەرگە.