تیمی گۆڕان لە پەرلەمان و حکومەت: هەنگاو بەرەو چاکسازی ریشەیی

  ئاڵوگۆڕى بازرگانى لە نێوان هەرێمى کوردستان و وڵاتى ئێران بەردەوامە و بەڕێوەبەرى دەروازەى نێودەوڵەتى باشماخیش دڵنیایى دەدات کە هەر شمەک و کاڵایەک بێتە هەرێمەوە پشکنینى تەواوەتى بۆ دەکرێت.
شاخەوان ئەبوبەکر  بەڕێوەبەری گومرگی باشماخ  لە بارەى رێکارەکانى ئاڵوگۆڕى لە نێوان هەرێم و وڵاتى ئێران، بە (سبەى) راگەیاند: ئاڵوگۆڕى بازرگانى شمەک و کاڵا و خواردەمەنى و نەوت و بەنزین لە نێوان هەردولا بەردەوامە.
دەشڵێت: بەهۆى ڤایرۆسى کۆرۆناوە رێکارەکانمان توند کردوە بەشێوەیەک ئەو بارهەڵگرە ئێرانیانە جگە لە تانکەرەکان بۆیان نیە بێنە سنورى هەرێمى کوردستانەوە و هەر لە مەیدانى دەروازەکە بارەکانیان رادەستى بارهەڵگرە عێراقییەکان دەکرێن و تانکەرەکانیش بە ئەمنیەتى پۆلیس و ئاسایش دێنە سلێمانى و لە شوێنێک کە بۆیان دیارى کراوە بارەکە بەتاڵ دەکەن بەبێ ئەوەى لە رێگا لابدەن و تێکەڵاوى خەڵک بن.
بەڕێوەبەرى دەروازەى نێودەوڵەتى باشماخ، دڵنیایش دەدات، هەمو ئەو خواردەمەنى و کاڵایانە پشکنینى دڵنیاییان بۆ دەکرێت، بەشێوەیەک هەندێ کات بارهەڵگرێک (72) سەعات دەهێڵدرێتەوە تا بەتەواوى لە پشکنین دەردەچێت.
لەبارەى ئەو شۆفێرە عێراقیانەى دەچنە ئەودیوى مەرزەکە، شاخەوان بەکر، وتى: ئەوانیش بەهەمان شێوە لە ناو مەرزەکە بارەکانیان بار دەکەن و رێگە نادەین بچنە خاکى ئێرانەوە، جگە لەو شۆفێرانەى سەوزە و میوە بارەکەن، بەڵام ئەوەش بە رێکارى تەواو دروست و پشکنینى دڵنیاى ئەنجام دەدرێت.