د.هەڤاڵ ئەبوبەکر: قەدەغەکردنی هاتوچۆی تەواو زیان بە کاروکاسپی هاوڵاتیان دەگەیەنێت
31/05/2020
پارێزگاری سلێمانی رایدەگەیەنێت؛ ئه‌وه‌ی گرنگه له‌م قۆناغەدا
پابەندبونی هاوڵاتیان بە رێنماییە تەندروستییەکان، چونکە تا هاوڵاتیان
پابەندتر بن مەترسییەکان کەمتر دەبن و سنوری تەشەنەکردنی ڤایرۆسەکە
تەسکتر دەبێتەوە.
دەشڵێت: بە بڕوای ئێمە قەدەغەکردنی هاتوچۆی تەواو زیان بە کاروکاسپی هاوڵاتیان و ئابوری دەوڵەت دەگەیەنێت.
د. هەڤاڵ ئەبوبەکر، پارێزگاری سلێمانی رایگەیاند: ئێمە لەم دۆخەدا
بڕوامان وایە پێویست دەکات لەگەڵ روبەڕوبونەوەی تەوای مەترسیەکانی
ڤایرۆسی کۆرۆنا، هەوڵی ئەوە بدەین کە رێکارەکان لەلایەن فەرمانگەکانی
دەوڵەتەوە بەتایبەتی لەلایەن کەرتی تەندروستییەوە توند بکرێنەوە، ئەوەش
بە چاودێریکردن و پشکنین و گرتنەبەری رێکاری پێویست بۆ هەر کەسێک کە
رێنماییە تەندروستییەکان جێبەجێ ناکات.
هەڤاڵ ئەبوبەکر، باس
لەوەشدەکات، کۆرۆنا بەدوای خۆیدا دو مەترسی زۆر گەورەی هێناوە، کە
هەرەشەکردنە لە بژێوی و داهات و کارو کاسپی هاوڵاتیان و کەمکردنەوە و
زیانگەیاندن بە ئابوری دەوڵەت.
جەختیش دەکاتەوە، ئەرکی ئەوان وەک حکومەت لەم قۆناغەدا لەسەر سێ تەوەر وەستاوە، بەم شێوەیە:
یەکەم: گرتنەبەری رێکاری زۆر پێویست بۆ کەمکردنەوە و رێگریکردن لە بڵاوبونەوەی ڤایرۆسی کۆرۆنا.
دوەم: باشکردن و چاککردن و پەرەپێدانی کاروکاسپی هاوڵاتیان.
سێیەم: باشکردن و چاککردنی ئابوری و دارایی دەوڵەت.