دانا ئەحمەد مەجید لە هەولێرەوە: گۆڕانخوازان سەلماندیان نەك گۆڕان ماوە، بەڵكو بەرەو بەهێزبوونەوە هەنگاو دەنێت

D هەواڵ و چالاکی

لە چوارچێوەی جێبەجێكردنی بڕیار و راسپاردەكانی دیداری گۆڕاخوازان كە رۆژی (20ی ئەیلول 2025) بەڕێوەچوو، دوای نیوەڕۆی ئەمڕۆ چوارشەممە (8ی10ی2025)، دانا ئەحمەد مەجید، ڕێکخەری گشتی بزوتنەوەی گۆڕان بۆ نزیکبونەوەی زیاتر و کۆبونەوە لەگەڵ خەڵك و هەڵسوڕاوان، سەردانی هەولێری کرد و لەلایەن ژمارەیەكی بەرچاوی هەڵسوڕاوان و گۆڕانخوازانەوە پێشوازیان لێكرا.

لە كۆبونەوەیەكدا لەگەڵ هەڵسوڕاوانی سنوری پارێزگای هەولێر، دانا ئەحمەد مەجید، رێكخەری گشتی بزوتنەوەی گۆڕان ستایشی بەشداری كارای هەڵسوڕاوانی كرد لە دیداری گۆڕانخوازان و رایگەیاند: گۆڕانخوازان سەلماندیان نەك گۆڕان ماوە، بەڵكو بەرەو بەهێزبوونەوە هەنگاو دەنێت، ئەوەش ئەركێكی گەورەی خستووەتە ئەستۆمان كە چۆنیەتی خۆ رێكخسنتنەوە و بەهێزكردنەوەی بزوتنەوەی گۆڕان و كارەكانیەتی.

وتیشی: ئێمە بۆ جێبەجێكردنی راسپاردەكانی دیداری گۆڕانخوازان هاتوین و لیژنەكان دەستبەكاربوون و رۆژ بە رۆژ كارەكانمان باشتر دەكەین.

ئاماژەی بەوەشكرد كە بیر و بۆچوونی تەواوی گۆڕانخوازان و ئۆرگانەكان وەردەگرن بۆ قۆناغی نوێ و روبەڕووبونەوەی ئاڵنگاریەكان و دروستكردنی بڕیاری سیاسی و وتیشی: زۆرخۆشحاڵین كە دەبینم گۆڕانخوازان و خەڵكی رۆشنبیر و نیشتمانپەروەر بەتەنگ پڕۆژەی گۆڕانەوەن و بێ بەرژەوەندی و ویستی كەسی دەیانەوێت بزوتنەوەكەیان بەهێز بكەنەوە ئەوەیە وایكردوە كە بمانەوێت لە بنكەی جەماوەریمانەوە بڕیاری سیاسی دروست بكەین، بۆئەوەی بڕیارەكانمان رەنگدانەوەی خواستی تەواوی هەڵسوڕاوان و خەڵكی كوردستان بێت.

لە كۆتایی كۆبوونەوەكەدا هەڵسوڕاوانی ئامادەبوو سەرنج و بۆچوون و پێشنیازەكانیان خستەڕو، جەختیشیان كردەوە كە هەموو هەوڵ و توانیان بەبەهێزكردنەوەی بزوتنەوەكە و جێبەجێكردنی بەرنامەی گۆڕان دەخەنەگەڕ.