راگەیەندراوی بزوتنەوەی گۆڕان بۆ یادی ٢٥ی ٧ی ٢٠٠٩

ڕاگەیەندراوی فەرمی

بزوتنەوەی گۆڕان لە یادی ٢٥ی تەممووزدا ڕایدەگەیەنێت، لە دوو ساڵی ڕابردوودا بە قۆناغێکی پڕ لە قەیرانی سەختی سیاسی و ڕێکخراوەییدا تێپەڕیون، بەڵام بە پشتیوانی دڵسۆزان توانیویانە قەوارەکە لە لەناوچوون بپارێزن و ئێستاش بە ئومێدەوە دەڕواننە داهاتوو.
لەو ڕاگەیەندراوەدا كە بەبۆنەی یەكەم بەشداریی سیاسی لە هەڵبژاردنی پەرلەمانی کوردستان لە ٢٥ی تەممووزی ٢٠٠٩، بزوتنەوەکە ئاماژە بەوە دەکات، ئەو ڕێکەوتە وەرچەرخانێکی سیاسی بوو کە بۆ یەکەمجار لە مێژووی هاوچەرخی کوردستاندا، جوڵانەوەیەکی مەدەنی توانی قۆناغی ململانێ لە چەکەوە بۆ سندووقەکانی دەنگدان و کێبڕکێی ئاشتیانە بگۆڕێت و دەشڵێت: ڕوانگەی بزووتنەوەکە وەک ئامرازێک بۆ حوکمڕانییەکی باش و دادپەروەر ڕەسەنایەتی لەدەست نەداوە و دەتوانێت هاوکار بێت بۆ چارەسەرکردنی قەیرانەکان و نوێنەرایەتیکردنی داخوازییە ڕەواکانی خەڵک، داواش دەکات هەمووان پێکەوە خزمەتی هاونیشتمانیان بکەن بۆ بنیاتنانی هەرێمێکی گەشەسەندوو.

دەقی ڕاگەیەندراوەکە:
راگەیەندراوی بزوتنەوەی گۆڕان بۆ یادی ٢٥ی ٧ی ٢٠٠٩
هاونیشتمانیانی ئازیز..
هەڵسوڕاو و گۆڕانخوازانی سەربەرز..
ئەمڕۆ، لە بەردەم وێستگەیەکی مێژوییدا وەستاوین؛ یادی ٢٥ی تەممووزی ٢٠٠٩، ئەو ڕۆژەی بە ئیرادەی خەڵک و هۆشیاریی دەنگدەرانی هەرێمی کوردستان، نەخشەی سیاسیی سەرلەنوێ داڕێژرایەوە، تێیدا بزوتنەوەی گۆڕان بۆ یەکەمجار بەشداری لە هەڵبژاردنی خولی سێیەمی پەرلەمانی کوردستانی کرد و بە متمانەی هاونیشتمانیان، سەرکەوتنێکی گەورەی تۆمارکرد.
ئەم سەرکەوتنە هەر گۆڕانکارییەکی چەندایەتی و ژمارەیی نەبو، لە بنەڕەتدا وەرچەرخانێکی سیاسیی بو، کە بۆ یەکەمجار لە مێژوی هاوچەرخی کوردستاندا، جوڵانەوەیەکی مەدەنی، سیاسیی و ئۆپۆزسیۆنێکی کارا، توانی لە پەرلەمانەوە قۆناغی ململانێی لە چەکەوە بۆ سندوقەکانی دەنگدان و، کێبڕکێی ئاشتیانە و دیموکراسییانە بگۆڕێ، ئەمەش سەلماندی گۆڕانکاریی ڕیشەیی لە ڕێگەی ئیرادەی مەدەنییەوە، گونجاوترین ڕێگەی بنیاتنانی کۆمەڵگەیەکی تەندروستە.
لەکاتێکدا، بەوپەڕی ڕاستگۆیی و ڕوونیەوە دەڕوانینە ڕابردوی نزیکمان، دەزانین لە دوو ساڵی ڕابردودا بە قۆناغێکی پڕ لە ئاڵنگاریی دژوار و کێشەی سەختی سیاسیی، ڕێکخراوەیی و یاساییدا تێپەڕین، بەڵام بە پشتیوانیی دڵسۆزان و پشتبەستن بە بنەما نەگۆڕەکانمان، توانیمان ئەم قەوارە سیاسییە لە ناوچون بپارێزین و لە بەردەم ڕەشەبای تەنگەژە و قەیرانەکاندا ڕایبگرین.
ئێستا، بە تێپەڕاندنی ئەو قۆناغە سەختە، بە چاوێکی پڕ لە ئومێد و دیدگایەکی ڕوونترەوە بۆ داهاتویی سیاسیی هەرێم و عێراق دەڕوانین، دەزانین ڕوانگەی گۆڕان، وەک ئامرازی بەدیهێنانی حوکمڕانییەکی باش و دادپەروەر، ڕەسەنایەتی لە دەستنەداوە و ئێستاش کارنامەکەی دەتوانێت هاوکار بێت لە چارەسەری بەشێک لە کێشە و قەیرانەکان و نوێنەرایەتکردنی داخوازییە ڕەواکانی هاونیشتمانیان، هەربۆیە داواکارین هەموان بەیەکەوە خزمەتکاری خەڵکە خۆشەویستەکەمان بکەین، کە بنەغەی هەرێمێکی دیموکرات و گەشەسەندون.
لە کۆتایدا، سەری ڕێز و وەفا بۆ سەرکردەی نیشتمانی، ڕەوانشاد نەوشیروان مستەفا دادەنەوێنین و، یادی هەمو کەسایەتیە تێکۆشەرەکان و ئەو کارەکتەر و هەڵسوڕاو و دەنگدەرانە بە بیر دەهێنیەوە، کە بەوپەڕی باوەڕەوە درێژەپێدەر و پشتیوانی ئەم پڕۆژە نیشتمانیە بون.

بزوتنەوەی گۆڕان
٢٤ی ٧ی ٢٠٢٦