دەستپێشخەرییەک لە بزوتنەوەى گۆڕان-ەوە

27/05/2023

ڕاگەیەندراوی فەرمی

پاش چەندین هەوڵى بزوتنەوەى گۆڕان بۆ هێورکردنەوەى دۆخى سیاسی هەرێمى کوردستان و چارەسەرى ناکۆکییەکان لە ڕێگەى دامەزراوە فەرمیەکانەوە، جارێکى دیکە پرسى کاراکردنەوەى کۆمسیۆنى باڵاى سەربەخۆى هەڵبژاردن و ڕاپرسى کوردستان لێکترازانێکى ترى دروستکرد.

بزوتنەوەى گۆڕان لە (٣١-٣-٢٠٢١)دا پڕۆژەیەکى بۆ هەموارى یاسای هەڵبژاردنى پەرلەمانى کوردستان پێشکەشکرد. داواى کاراکردنەوەى کۆمسیۆنى کرد لە پێناوى هەڵبژاردنێکى پاک و بێگەرد لەکاتى یاسایی خۆیدا، بەڵام بۆ ئەم پرسە هیچ هەنگاوێکى پراکتیکى نەنرا. دواجار پێنج لایەنى سەرەکى لە (١١-٣-٢٠٢٣) ڕێکەوتنێکیان ئیمزاکرد کە ئەم دوپرسە ڕەهەندى نیشتمانییان هەیە و پێویستە بەسازان و هاوتەریب هەموار و کارا بکرێنەوە.

بزوتنەوەى گۆڕان سیاسەتى سەربەخۆى خۆى هەیە، کە پێداگرییە لە بنەما یاساییەکان و گەڕانەوەى شکۆ بۆ دامەزراوەکان، بۆ ڕێگەگرتن لەبەردەوامى ئەم دۆخە و لێکترازانى زیاتر، هەروەها ڕێگەنەدان بە پێشێلکردنى یاسا و بنەماکانى سازانى نیشتمانى هیچ کۆبونەوەیەکى کۆمسیۆن بەپێویست نازانین.

وەکو ئەرکى نیشتمانى و سیاسی لەپێناو دۆزینەوەی دەرچەیەك بۆ چارەسەری ناکۆکیەکانى هەرێم و پێشهاتە نوێیكانی گۆڕەپانی سیاسی عێراق و دورخستنەوەی مەترسی لەسەر گوزەرانی خەڵك و پاراستنى قەوارەى هەرێم، بزوتنەوەى گۆڕان داوای کۆبونەوەى لوتکەى پارتە سیاسییە سەرەکیەکان دەکات.

بزوتنەوەى گۆڕان
٢٧ی ٥ی ٢٠٢٣


هەواڵی زیاتر