چۆمان محەمەد: ناكرێت دادگا بكرێتە ئامرازی پاكتاوكردنی ڕكابەرانی سیاسی

تایبەت بە کەیسی سزادانی چالاکوانانی بادینان
🔹رێکخەری ژوری یاسای بزوتنەوەی گۆڕان: ناكرێت دادگا بكرێتە ئامرازی پاكتاوكردنی ڕكابەرانی سیاسی
رێکخەری ژوری یاسای بزوتنەوەی گۆڕان، ڕایدەگەیەنێت: بێمتمانەیی بە دادگاو دەسەلاتی دادوەری لەقۆناغێكی یەكجار مەترسیداردایە،بە بڕیاری دروست لە چارەنوسی سزادراوانی بادینان، دادگای پێداچونەوە دەتوانێت ئەم وێنەیە پێچەوانە بكاتەوە.
چۆمان محەمەد عەلی، رێکخەری ژوریی یاسایی بزوتنەوەی گۆڕان، بەبۆنەی تێپەڕینی دوو مانگ بەسەر سزادانی چالاکوانانی بادینان، پەیامێکی ئاڕاستەی دادگای پێداچونەوە کردوەو تێیدا هاتوە: بریارەكەی ئیوە سەرباری ئەوەی چاودێری دەكرێت لەلایەن نوێنەرانی وڵاتانی ئەوروپاو ئەمریكا لەهەرێم، سەرۆكایەتی هەرێم و پەرلەمان و بەشێكی حكومەتیش چاوەڕوانی بڕیاری دادپەروەرانەی ئێوەن.

(دوو مانگ بەسەر بڕیاری سزادانی چالاكوانانی بادینان و دۆخی دادگاو دەسەڵاتی دادوەری)

چۆمان محەمەد عەلی
رێکخەری ژوریی یاسایی بزوتنەوەی گۆڕان

‌ دوو مانگ به‌سه‌ر بڕیاری دادگای تاوانه‌كانی هه‌ولێردا تێپه‌ڕ ده‌بێت، بە سزادانی شەش ساڵ بۆ پێنج چالاكوانی دەڤەری بادینان، به‌ڵام سه‌رباری ناڕه‌زایه‌تیه‌كانی ناوخۆ و راپۆرته‌ نێوده‌وڵه‌تییه‌كان خستنەروی پیشلكاری و كارە نایاسیەكان و دانپیانانی بەزۆریان، هاتنەسەرخەتی رێكخراوەكانی ناوخۆ و دەرەكی و سەرجەم دەسەڵاتە باڵاکانی هەرێم، بەڵام هیچ پێشكه‌وتنێك یان بریاری پێداچوونه‌وە لەلایەن دادگای پێداچونەوە بەوبریارە ڕانه‌گه‌یه‌ندراوه‌.

راستە و حاشاهەڵنەگرە، بێمتمانەیی بە دادگاو دەسەلاتی دادوەری لەقۆناغێكی یەكجار مەترسیداردایە، دەستوەردان و سەربەخۆنەبونی ئەم دەسەڵاتە  ئەوەندە زەق و دیارە شیاوی بەلگەبۆهێنانەوە نیە، رودەدات لەدەولەتانی تریشدا بەهۆی كێبركێ و ململانێی لایەنە سیاسیەكان هاولاتی باوەرو متمانەیان بە پەرلەمان وحكومەت نەمێنیت، بەلام كارەسات وخەم و مەترسیەكە لەوەدایە بێمتمانەی بۆ نێو دادگاو دەسەلاتی دادوەری گەیشتۆتە ترۆپك كە ئەمە دڵخوازی ئێمە نیە، چونکە مەترسیەكانی بۆسەر شیرازەی كۆمەلگاو ناجێگیری ئاسایشی كۆمەڵایەتی پەی پێدەبەین، بۆیە ناكرێت دادگا بكرێتە ئامرازی پاكتاوكردنی ركابەرانی سیاسی.

ئەم كەیسە پەیوەستە بە ئازادی رادەربرین و بەرتەسكردنەوەی پانتایەكانی ئازادی، نوینەری ولاتانی ئەوروپا و ئەمریكا  زۆر بەجدی لەسەر خەتن بۆ بریاری دادگای پێداچونەوە، ئەم سزایە كاریگەری راستەوخۆی دەبێت بۆ ئەوەی ولاتان هێندەیتر بەچاوی ناشیرین لێمان بڕوانن، لێکەوتەی بۆ سومعە و پێگەی هەرێم دەبێت لای وڵاتانی ڕۆژئاواو ئەمریكا، لەگەلیدا پەیام و مەترسیەكانی بۆ تاك بەتاكی ئەم کۆمەڵگایەشە، چونکە پێشبینی كراوە ڕوبەروی هەمومان ببیێتەوە گەر ئەم چات و نامەگۆرینەوەیەی مەسنجەر ببێتە كرداری تاوانكاری، بۆیە حیزبە سیاسیەكان ئەبێت بەخەمی ئەم كەیسەوەبن، چونکە مەترسیە بۆ کۆمەڵگاو كاری سیاسی خۆیان پیش هەمووكەس، ئێمە نە ماف بەخۆمان دەدەین دەست وەردەینە دادگا و نەدەسەڵاتی دەستوەردانمان هەیە، چونکە دیارو ئاشكرایە دەستوەردان بەكێ و چ حیزبێك دەكرێت، بۆیە تەنها داوادەكەین لەدادگای پێداچونەوەی هەرێمی كوردستانی بەڕێز، سەرباری تطبیقی  بڕگەو مادە یاساییەكان، رەچاوەی هەستیاری كەیسەكەو ئەو هەمو پێشلكاریە یاسایانە بکەن کە خراوەتەڕو، لەخەمی گێڕانەوەی متمانەبن  بۆ دادگاو ئەم دەسەلاتە پیرۆزە، چونکە بریارەكەی ئیوەی بەڕێز سەرباری ئەوەی چاودێری دەكرێت لەلایەن نوێنەرانی وڵاتانی ئەوروپاو ئەمریكا لەهەرێم، سەرۆكایەتی هەرێم و پەرلەمان و بەشێكی حكومەتیش چاوەڕوانی بڕیاری دادپەروەرانەی ئێوەن، تەمەنا دەكەین دادگای پێداچونەوە ئەم وێنەیە پێچەوانە بكاتەوە کە لە خەیاڵدان و زهنی ئێمەدا كێشراوە، با ئیرادەی سیاسیش هەبێت بۆ سزادانی ئەم چالاكوانانە بەڵام دادگا بریاری دادپەروەرانەو یاسایی بدات بۆهەڵوەشانەوەیان، كە بەندە ئومیدم كەمە ئەمە ڕوبدات، چونكە لە ڕابردوو زۆر كەیس و واقیع هەبوو وادەنەچوو، بۆیە ئەم كەیسە دەبێتە دواین بزمار لە تابوتی بێمتمانەی بەدەسەلاتی دادوەری.