بزوتنەوەی گۆڕان و بزوتنەوەی دیموکراتی گەلی کوردستان کۆبونەوە

بزوتنەوەی گۆڕان و بزوتنەوەی دیموکراتی گەلی کوردستان کۆبونەوەو پرسی هەڵبژاردنی پەرلەمانی عێراق و بارودۆخی سیاسی ئێستای کوردستان و نوسینەوەی دەستوور تاوتوێ کران.

لەبارەگای بزوتنەوەی دیموکراتی گەلی کوردستان لەشاری هەولێر بەرپرسی ژوری پەیوەندییە سیاسیەکانی گۆڕان و وەفدێکی یاوەری لەگەڵ سکرتێرو ئەندامانی مەکتەبی سیاسی ئەو حیزبە کۆبونەوە.

بەختیار ئەولی ڕێکخەری ژوری پەیوەندیە سیاسیەکانی گۆڕان بە ماڵپەڕی گۆڕانی ڕاگەیاند: سەردانەکەمان دۆستانەبوو بۆلای بزوتنەوەی دیموکراتی گەلی کوردستان، تاوتوێی بارودۆخی سیاسی و نوسینی دەستووری ئایندەی هەرێم و پرسی هەڵبژاردنەکانی پەرلەمانی عێراقمان کرد.

وتیشی جەختمان لەنوسینی دەستورێکی مەدەنی کردەوە کەتیایدا بنەماکانی دیموکراتی و مافی مرۆڤ تیایدا سەنتەربن، هەروەها جەخت لە ئاشتەوایی سیاسی کرایەوە بۆ چاککردنی بارودۆخی سیاسی لەناوخۆی هەرێمی کوردستاندا.

ڕێکخەری ژووری پەیوەندییە سیاسیەکانی گۆڕان وتیشی باشکردنی باروگوزەرانی خەڵک و نەهێشتنی کەموکوڕی و لاوازی بازاڕو دواکەوتنی مووچەی فەرمانبەران و لەشکرکشی تورکیا بەشێکی تری گفتوگۆکان بوون و هەردوولا هاوڕابوون کەدەبێت حکومەت دەست بکات بەچاکسازی و باشکردنی دۆخی ژیانی خەڵک.