یوسف محەمەد: بەو پارەیەی لە بەغداوە دێت دەتوانرێت ژیانی خەڵک باش بکرێت

06/02/2019

د.یوسف محەمەد رایدەگەیەنێت: لە بابەتی بودجەدا هەمو فراکسیۆنەکان هاوهەڵوێست بون بۆ ئەوەی موچەی خەڵک و پێشمەرگە نەبێتە قوربانی ململانێکان، ئەوەی ئێستاش دەرفەتە بۆ ئەوەی ببێتە سەرەتایەک بۆ چارەسەرکردنی کێشەکانی نێوان هەرێم و بەغدا.

سەرۆکی فراکسیۆنی گۆڕان لە ئەنجومەنی نوێنەرانی عێراق، لە چاوپێکەوتنێکیدا لەگەڵ کەناڵی (KNN) کە سەعات نۆی ئەمشەو بڵاودەکرێتەوە رایگەیاند: بۆ ئەمساڵ بابەتی موچە لە بودجەی هەرێم و فرۆشتنی نەوتەکەی جیاکراوەتەوە، بەڵام هیچ گەرەنتییەک نییە ساڵانی داهاتو بەم شێوەیە بێت، بۆیە پێویستە هەرێمی کوردستان بەو سیاسەتە نەوتییە چەوتەی کە لەماوەی رابردو پەیڕەوی کردبو، بچێتەوە و پێویستە لە خاڵێکدا دابنێن بەوەدا کە هەڵەیان کردوە، جگە لەوەش ئەو پارەیەی لە بەغداوە دێت و لەگەڵ ئەو نەوتەی ئەمساڵ دەفرۆشرێت، وای لێبکرێت دۆخێکی خۆشگوزەران دروست بکرێت و خەڵکی هەرێم لەگەڵ سیاسەت ئاشت بکرێتەوە کە بەراستی خەڵک هیلاک بوە.

ئاماژەی بەوەکرد؛ دەبێت کورد ئەولەویەتی خۆی رێکبخاتەوە و ئەوە بزانێت کە رێگای چارەسەری کێشەکانی نە تاران و نە ئەنقەرەیە، بەڵکو بەغدایە و هەوڵی ئەوە بدات بە دۆزینەوەی زمانێکی هاوبەش لەگەڵ هێزە عێراقییەکان کێشەکانی نێوان هەرێم و بەغدا چارەسەر بکرێت، ئەوەش بە وازهێنان لە هەندێک بەرژەوەندی حیزبی و شەخسی لەپێناو بەرژەوەندی گشتی خەڵکی کوردستان.
بە وتەی د.یوسف محەمەد؛ هیچ شتێک لەوە بەهێزتر نابێت کە ناوخۆی کوردستان بەهێز بکەیتەوە، ئەوەش پیویستی بە گژداچونەوەی گەندەڵی و بەهیزکردنی دامەزراوەکان هەیە، کورد ئەگەر خۆی چاک بکات، نەک تەنها دەتوانێت پەیوەندی خۆی لەگەڵ بەغدا چاک بکات، بەڵکو دەتوانێت لە ناوچەکەش رۆڵی گەورە ببینێت. ئێستا لە سیاسەتی نێودەوڵەتی و پەیوەندی نێودەوڵەتی، دەرفەت رەخساوە بۆ کارەکتەری نا دەوڵەتی رۆڵ ببینێت، وەک ئەوەی لە باکوری سوریا هەیە.
وتیشی :"گۆڕان شانازی بەوەوە دەکات لە هەردو قۆناغەکە دەستبەرداری ئامانجەکەی نەبوەو بەرگری لێکردون، لە ئۆپۆزسیۆن بەرگری لە بەرژەوەندی گشتی و بودجە و قوتی خەڵک و دادگا و سیستمی حکومڕانی، لە قۆناغی بەشداریکردن لە دەسەڵاتیش شانازی بەوەوە دەکات کە چونە دەسەڵات لە خشتەی نەبرد و ماف و داخوازییەکانی خەڵکی لەبیر نەبردەوە، تا گۆڕان لە دەسەڵات بو، یەک دنیار لە قوتی خەڵک کەمنەکرایەوە".