وته‌بێژی بزوتنه‌وەی گۆڕان: گۆڕان هه‌ولێر بۆ هیچ حزب و هێزێكی سیاسی ‌جێناهێڵێت

وته‌بێژی بزوتنه‌وی گۆڕان رایده‌گه‌یه‌نێت: شاری هه‌ولێر سه‌نته‌رێكی گرنگی سیاسه‌تكردنه‌ بزوتنه‌وه‌ی گۆڕان شاره‌كه‌ بۆ هیچ حزب و هێزێكی سیاسی به‌جێناهێڵێت و ده‌شڵێت: ‌له‌ هه‌ولێره‌وه‌ گۆڕانگاری ده‌كرێت و پێگه كورد و نوینه‌رانی كورد به‌هێز ده‌بێت. 

دلێر عه‌بدولخالق، وته‌بێژی بزوتنه‌وی گۆڕان رایگه‌یاند: شاری هه‌ولێر سه‌نته‌رێكی گرنگی سیاسه‌تكردنه‌ ویستی بزوتنه‌وه‌ی گۆڕان‌ دروستكردنی‌ پایته‌ختێكی به‌هێزه‌ بۆ دانوستان له‌گه‌ڵ به‌غدا له‌گه‌ڵ ئاسایی كردنه‌وه‌ی په‌یوه‌نییه‌كانی نێوان حكومه‌تی هه‌رێمی كوردستان و حكومه‌تی عێراق‌، چونكه‌ هه‌ركاتێك په‌یوه‌ندییه‌كانی نێوان هه‌رێم و به‌غدا له‌ چوارچێوه‌ی ده‌وڵه‌تێكی فیدراڵدا ئاسایی بێت ژیان و موچه‌ و بژێوی خه‌ڵك باشتر ده‌بێت و سه‌قامگیری ئابوری و سیاسی و ئه‌منی خزمه‌تگوزاری باشتره‌، كه‌ له‌كارنامه‌ی هاوپه‌یمانی كوردستان خه‌جتی لێكراوه‌ته‌وه‌‌.

وتیشی: حكومه‌تی هه‌رێمی كوردستان به‌رهه‌می خوێنی شه‌هیدان و خه‌باتی پێشمه‌رگه‌ تێكۆشه‌ره‌كانی هه‌مولایه‌نه‌ سیاسیه‌كان و قوربانیدان و كۆڵنه‌دانی میله‌تی كورده‌‌، حكومه‌تی هه‌رێمی موڵكی لایه‌نێك نیه‌ و هه‌مومان خه‌باتمان كردوه‌ بۆ ئه‌وه‌ی حكومه‌ت ئازادی بۆ خه‌ڵك ده‌سته‌به‌ر بكات نه‌ك به‌پێچه‌وانه‌وه‌، نابێت ئه‌وانه‌ی تراژیدیایان به‌سه‌ر میله‌تدا هێناوه‌ و  خه‌ڵكی كوردستانیان ئه‌نفال و جینۆساید كردوه‌ له‌م ناوچه‌ داڵده‌بدرێن و ئازادبن، به‌ڵام خه‌ڵكه‌ تێكۆشه‌ره‌كه‌ی هه‌ولێر ئازاد نه‌بن.

دلێر عه‌بدولخالق، وته‌بێژی بزوتنه‌وی گۆڕان، ئاماژه‌ی بۆ ئه‌وه‌كرد، بزوتنه‌وه‌ی گۆڕان له‌گه‌ڵ به‌رفراوانبونی مه‌ودای ئازادییه‌  له هه‌رێمی كوردستان و‌ شاری هه‌ولێر، بزوتنه‌وه‌ی گۆڕان شاری هه‌ولێر بۆ هیچ حزبێكی سیاسی به‌جێناهێڵێت، چونكه‌  ره‌وانشاد كاك نه‌و‌شیروان مسته‌فا به‌وجۆره‌ په‌روه‌رده‌ی كردوین كه‌ ‌له‌ هه‌ولێره‌وه‌ گۆڕانگاری ده‌كرێت و پێگه‌ی كورد و  نوینه‌رانی كورد له‌به‌غدا به‌هێز ده‌بێت.