چۆمان محەمەد: سەنگەر لەیەکتر گرتن لەسەر پۆستى سەرۆک کۆمار لە زیانى کوردە

ئەندامێکى جڤاتى نیشتمانى گۆڕان رایدەگەیەنێت؛ کێبڕکێى بەدەستهێنانى پۆستى سەرۆک کۆمار لەنێوان پارتى و یەکێتى گەیشتوەتە ئاستى سەنگەر لەیەکگرتن و دەستشکانەوە، ئەوەش زیانى بۆ دۆخى حکومڕانى و قوتى خەڵک و ئایندەى هەرێمى کوردستانیش دەبێت، بۆیە بەیاننامەکەى گۆڕان بۆ ئاگادارکردنەوەى خەڵک و لایەنەکان بو لەو مەترسیانە.

دەشڵێت: ئەو یەکڕیزیەى گۆڕان داواى دەکات ئەو یەکڕیزیە ساختەیە نییە کە بەشێک لە لایەنە سیاسیەکانى دیکە داواى دەکەن، بەڵکو بونى گوتارێکى هاوبەشى نیستیمانییە لەپێناو بەرژەوەندییە باڵاکانى خەڵک و قەوارەى هەرێمى کوردستان کە نابێت دۆخى ئیستاى خەڵک نادیدە بگیرێت کە چەندین قەیران بەرۆکى گرتون، بۆیە چاکسازى و خزمەتکردنى خەڵک بنەماى سەرەکییە بۆ یەکڕیزى لایەنەکانیش.

چۆمان محەمەد، ئەندامى جڤاتى نیشتمانى بزوتنەوەى گۆڕان ئاماژە بەوە دەکات؛ ئەو دۆخەى ئێستا لە عێراق هاتوەتە ئاراوە بەهۆى کێششمە کێش و ناکۆکییەکان لەسەر پۆستەکان کۆمەڵێک گۆڕانکارى نوێى هێناوەتەوە ئاراوە، راگەیەندراوەکەى گۆڕانیش بۆ ئاگادارکردنەوەى خەڵک و لایەنە سیاسییەکانە لەو مەترسیانەى ئەگەرى رودانیان هەیە، چونکە هەر گۆڕانکارییەک لە عێراق پەیوەندى بە هەرێمى کوردستانەوە دەبێت و "ئەم دۆخەى ئێستاش پەیوەندى راستەوخۆی بە هەرێمى کوردستانەوە هەیە بەتایبەت کە هێشتا شایستەى دارایى لە بەغداوە دێت و بەبێ ئەو بڕە پارەیە حکومەتى هەرێم ناتوانێت موچەى فەرمانەبرانى هەرێم بدات، جگە لەوە ئیمە هەڵگرى کۆمەڵێک پرەنسیپ و بەرنامە و روئیاى خۆمانین کە دیدگایەکى نوێ بووە بۆ بەڕێوەبردن، ئەم بەیاننامەیەش ئاگادارکردنەوەى خەڵک و لایەنە سیاسییەکان بوە لەو مەترسیانەى ئەگەرى رودانیان هەیە و بە زیانى خەڵک دەشکێنەوە".

لەبارەى هەندێک رەخنە لە راگەیەندراوەکە لەکاتێکدا کە بزوتنەوەکە لەم هەڵبژاردنەدا کورسى مسۆگەر نەکردوە، ئەندامەکەى جڤاتى نیشتیمانى دوپاتى کردەوە کە ئەو راگەیاندراوە لە سۆنگەى هەست کردنە بە بەرپرسیارێتى و دەڵێت: ئێمە تا ئەم ساتە لە سەنگەرى بەرگرى لە مافە رەوا و بنەڕەتیەکانى خەڵکى کوردستانداین، ئەو یەکڕیزیەش گۆڕان داواى دەکات ئەو یەکڕیزیە نییە کە یەکێتى و پارتى داواى دەکەن، ئەوەى ئێمە لەسەر خیتابى هاوبەشى نیستیمانییە لەپێناو بەرژەوەندییە باڵاکانى خەڵک و قەوارەى هەرێمى کوردستان نابێت دۆخى ئیستاى خەڵک نادیدە بگیرێت کە چەندین قەیران بەرۆکى گرتون، بۆیە چاکسازى و خزمەتکردنى خەڵک بنەماى سەرەکییە بۆ یەکڕیزى لایەنەکانیش ، ئەوەش کە پەیوەستە بە کورسییەوە دەبێ بزانین کورسییەکانى پارتى و یەکێتیش نمایندەى ١٥%ى خەڵکى هەرێمى کوردستان دەکەن بە روانین لە ئەنجامى کۆتا هەڵبژاردنەکان".

چۆمان محەمەد رونى دەکاتەوە تائیستا یەکێتى و پارتى لە رێگەى پۆستەکانى بەغداوە لە چەند ساڵى رابردودا نەیانتوانیوە ئەو بابەتە دەستورى و یاساییانە چارەسەر بکەن کە پەیوەندى بە ماف و شایستەى خەڵک و خاکى کوردستانەوە هەیە، بەڵام ئەم جۆرە ململانێ و دەستشکانەوەیەى ئێستایان بەتەواوى لە زیانى هەمو کوردە و خەڵک و خودى هەرێمەکەمان لێى زیانمەندە.

لەبارەى ئەگەرى پێکهێنانى حکومەتى زۆرینەشەوە، ئەندامەکەى جڤاتى نیشتمانى دەڵێت: بەبێ خوێندنەوەى واقیعەکە، پاڵپشتیکردنى حکومەتى زۆرینە رەنگە بە زیانى کورد بشکیتەوە لە ئایندەدا، بۆیە پێویستە ئەو دۆخە بە قوڵى خوێندنەوەى بۆ بکرێت، چونکە رەنگە ببێتە مەترسى بۆسەر قەوارە و حکومەت و خەڵکى هەرێمى کوردستان ئینجا هێزە سیاسییەکان، بۆیە پێویستە بە بە وردى لێى بڕوانرێت.

وتیشى: خەمى ئێمە ئەوەیە کورد نەبێتە بەشێک لە ململانێ ناوخۆى و هەرێمى و نێودەوڵەتییەکان، بەڵکو خاوەنى ستراتیژى خۆمان بین بۆیە دەبێت کورد بە هەستیارییەوە لەم دۆخەدا مامەڵە بکات و بەیاننامەى گۆڕانیش لەبارەى مەترسییەکانەوە لە سۆنگەى هەست کردنە بە بەرپرسیارێتى.