فیدراسۆنى رێکخراوەکانى کۆمەڵگاى مەدەنى سەردانى بزوتنەوەى گۆڕان دەکات

فیدراسۆنى رێکخراوەکانى کۆمەڵگاى مەدەنى راپۆرت و هەوڵەکانى خۆى لەبارەى پێشێلکارییەکان و چارەسەرى ئەو دۆخانەى لە سلێمانى هاتونەتە ئاراوە پێشکەشى بزوتنەوەى گۆڕان دەکات و لاى خۆیەوە رێکخەرى ژورى پەیوەندییە سیاسیەکان هەڵوێست و بەرنامەى بزوتنەوەکە دوپاتدەکاتەوە بۆ رەخساندنى سەقامگیرى زیاتر و دادپەروەرى و کەشێکى ئازاد و ئارام بۆ هاوڵاتییان و چین و توێژەکان.

ئەمڕۆ دوشەممە (7/3/2022)، شاندێکى فیدراسیۆنى رێکخراوەکانى کۆمەڵگاى مەدەنى سەردانى مەکۆى سەرەکى بزوتنەوەى گۆڕانیان کرد بۆ پێشکەشکردنى راپۆرتى پێشێلکارییەکانى ساڵى 2021ى سنورى پارێزگاى سلێمانی بەناوى (گەڕاندنەوەى شکۆ بۆ سلێمانى) و خستنەڕوى کەمپینەکەیان بۆ گەڕاندنەوەى ئارامى و رێگرى لە دروستبونى بارگرژى و ئاڵۆزى و کۆتایی هێنان بە ناکۆکییەکانى نێوان لایەنەکان و پێکهاتەکانى ناو خودى لایەنەکان.

لاى خۆیەوە رێکخەریی ژورى پەیوەندییە سیاسییەکانى بزوتنەوەى گۆڕان بە نوێنەرایەتى ژورە پەیوەندیدارەکان، جەختى کردەوە؛ بزوتنەوەى گۆڕان لە ژینگەیەکى مەدەنییەوە دروستبوە، بۆیە هەوڵى رێکخراوەکان و گروپ و ناوەندەکانى چالاکى مەدەنى بەرز دەنرخێنێت بەئاڕاستەى فشارەکانیان بۆ باشکردنى دۆخى هاوڵاتیان و رەخساندنى کەشێکى ئارام و سەقامگیر و دور لە شڵەژانى دەروونى.

ئاماژە بەوەش دەکات؛ بزوتنەوەى گۆڕان پشتیوانى هەر کەس و لایەک و رێکخراوەکان دەکات کە هۆکاربن بۆ باشکردنى دۆخى ژیانى خەڵک و هێنانە کایەى زیاترى ئارامى و کەمکردنەوەى پێشێلکارییەکان، "هەمو ئەو هەوەڵانەش بە تەواو کارى ئەرکەکانى خۆى دەبینێ وەک هێزێکى مەدەنى لەپێناو هێنایە کایەى سەقامگیرى و دادپەروەرى و رەخساندنى کەشێکى ئازاد بۆ کایەکانى ژیان لە هەرێمى کوردستان".