ژوری رۆژنامەوانی گۆڕان: ‎بە داھاتی گشتی میدیا کراوەتە سەکۆی شەڕ و تێکدانی ئاشتی کۆمەڵایەتی و سەقامگیری سیاسیی

23/04/2022

‎دەرچونی یەکەمین رۆژنامەی کوردی لە (٢٢ی نیسانی ١٨٩٨) لەسەردەستی بنەماڵەی بەدرخانیەکان ھەنگاوێکی رێچکەشکێن و وەرچەرخانێکی گرنگە لە دیرۆکی گەلی کورددا.

‎بڵاوکردنەوەی (رۆژنامەی کوردستان) مێژویەکی درەوشاوە و، گۆڕانکاریەکی ریشەییە روەو شارستانیەت و قۆناغی رۆشنگەری و، جێگای شانازیەکی گەورەیە کە لەو سەردەمە تاریکەی داگیرکاری خاک و نیشتمان؛ لەتاراوگە چرۆی هیوایەک بە وشەی کوردی لەسەر روپەڕی رۆژنامە لەدایک دەبێ.

لە ساڵیادی رۆژنامەگەری کوردی، وێرایی پیرۆزبایی گەرممان لە تەواوی ئەو رۆژنامەنوسانەی بەحەق خاوەنی پەیامی رۆژنامەنوسین، سەری رێز و نەوازش لەبەردەم گڵکۆی شەهیدانی قەڵەم و ئەوانەی رۆژگارێک بۆ خزمەتی خەباتی سیاسیی و رۆژنامەگەری تێکۆشاون دادەنەوێنین.
‎هەر لەم یادە پڕشکۆیەدا ، ئێمە لەژوری رۆژنامەوانی بزوتنەوەی گۆڕان، بەنیگەرانیەکی قوڵەوە لە دۆخی رۆژنامەگەری و لەمپەرەکانی بەردەم پیشەیی رۆژنامەنوسی دەڕوانین. پێویست بو هەرێمی کوردستان پارێزگاری لە ناسنامەی ئازادی و دیموکراسی وەک یەکێک لە بەها باڵاکانی خۆی بکردایە، بەڵام بەداخەوە، ساڵانە راپۆرتی رێکخراوە جیهانیەکان؛ هەرێم وەک ناوچەیەکی پڕ لە پێشێلکاری ئازادییە گشتیەکان و کاری رۆژنامەنوسی دەناسێنن، ئەمەش کاریگەری نەرێنی لەسەر رەوایەتی شێوازی حوکمڕانی کوردی دروست کردووە.

‎لە ئێستادا دەسەڵاتداران، لەئاستی هەرە باڵادا، بە داھاتی گشتی میدیاکانیان کردووەتە سەکۆی جەنگی دەرونی و، شەڕ فرۆشتن بە یەکتر و بەکارھێنانیان بۆ تێکدانی ئاشتی کۆمەڵایەتی و ناسەقامگیری سیاسیی، ئەمەش نزمترین ئاستی هەستکردنە بە بەرپرسیارێتی، کەپێویست بوو میدیای کوردی ئاوێنەی

واقعی روداوەکان و رەنگدانەوەی پڕۆژەیەکی نیشتیمانی بێت بۆ ھێنانەدی ئامانجە باڵاکان.

‎ئەم یادە بە دەرفەت دەزانین وەک میدیای گۆڕان دەستپشخەری بکەین بۆ رێکخستنی (پەیماننامەی ئاکاری میدیایی) کە هەموو لایەک پابەندبکات بە پەیوەستبوون بە بنەما ئیتیکیەکانی پیشەکە و دورکەوتنەوە لە بڵاوکردنەوەی زانیاری ناڕاست و تۆمەت و لە کەدارکردن. ئەرکی لەپێشینەی حکومەت و دامەزراوە پەیوەندیدارەکانیشە یاسا کارپێکراوەکان جێبەجێ بکەن و، مافەکانی رۆژنامەنوسان بپارێزین لەسەروھەمویانەوە پێدانی زانیاری و رەچاوکردنی شەفافیەت وەک بنەمایەکی ‎حوکمڕانی تەندروست.
‎جارێکی دیکە، درود بۆ رۆحی پاکی شەهیدانی کاروانی ئازادی رۆژنامەگەری، سڵاو لە خەباتی رۆژنامەنوسانی خاوەن ئاکاری بەرزی رۆژنامەنوسی.

 

ژوری رۆژنامەوانی
٢٢ی نیسانی ٢٠٢٢


هەواڵی زیاتر