شاندێکى رۆژئاوا داواى پشتگیرى وپاڵپشتى بزوتنەوەى گۆڕان دەکات

شاندێکى رۆژئاواى کوردستان داواى پاڵپشتى سیاسى و مەدەنى لە بزوتنەوەى گۆڕان دەکات و شاندى گۆڕانیش جەخت دەکاتەوە لەوەى وەک ئەرکێکى ئەخلاقى و مرۆیی و نیشتیمانى ئامادەی هەمو هاوکاری و پاڵپشتییەکن بۆ پاراستنى ژیان و سەر و ماڵى خەڵکى سڤیل لەو ناوچانەى لەبەردەم هەڕەشە و مەترسى هێرشدان.

ئەمڕۆ یەکشەممە (17/7/2022)وەفدێک بە سەرۆکایەتى د. جاویدان کەمال نوێنەرى پارتى یەکێتى دیموکراتى سوریا (پەیەدە) لە هەرێمى کوردستان و چەند چالاکوانێک لە بەرەى پشتیوانى رۆژئاواى کوردستان بۆ پشگیرى و چەسپاندنى ناوچەى دژە فڕین لە باکور و رۆهەڵاتى سوریا سەردانى بزوتنەوەى گۆڕانیان کرد و لەلایەن ژورى پەیوەندییە سیاسییەکانەوە پێشوازییان لێکرا.

لە دیدارێکدا وەفدى رۆژئاوا خوازیارى ئەوەبون بزوتنەوەى گۆڕان و هێز و لایەنە سیاسییەکانى دیکە و حکومەت و پەرلەمان و چالاکوانانى کۆمەڵى مەدەنى هاوکار بن بۆ راگرتنى هێرشى چاوەڕوانکراوى تورکیا بەرامبەر رۆژئاواى کوردستان و داوایان کرد بزوتنەوەى گۆڕان لە رێگەى کەناڵەکانى خۆیەوە هۆکارێک بێ بۆ پشگیرى لە دۆزى رەواى هاوڵاتیان لە لە باکور و رۆژهەڵاتى سوریا، لاى خۆیەوە رێکخەرى ژورى پەیوەندى سیاسى بزوتنەوەى گۆڕان وەک ئەرکێکى ئەخلاقى و مرۆیی و نیشتیمانى، هەمو هاوکارییەکى بزوتنەوەى گۆڕانى خستەڕو بۆ پشتگیرى و پاراستنى ژیان و سەر و ماڵى خەڵکى سڤیل لەو ناوچانە کە لەبەردەم هەڕەشە و مەترسى هێرشدان و جەختى کردەوە ئەوەى لە توانایاندا بێت لە پشتیوانى و پاڵپشتى سیاسى لەو روەوە ئەنجامى بدەن.