وته‌بێژی بزوتنه‌وه‌ی گۆڕان: پڕۆژه‌ و به‌رنامه‌ و پلاتفۆڕمی گۆڕان پێویستییه‌ و وه‌ڵامگۆی چاككردنی ئه‌م سیستمه‌ حكومڕانیه‌ی هه‌رێمی كوردستانه‌

وتەبێژى بزوتنەوەى گۆڕان لە (13)یەم ساڵیادى یەکەم بەشداریی سیاسى بزوتنەوەى گۆڕاندا رایدەگەیەنێت؛ پڕۆژه‌ و به‌رنامه‌ و پلاتفۆڕمی گۆڕان پێویستییه‌ و وه‌ڵامگۆی چاككردنی ئه‌م سیستمه‌ حكومڕانیه‌ی هه‌رێمی كوردستانه‌ و ئه‌م مۆدێله‌ ته‌نها له‌ حزبێك و بزوتنه‌وه‌یه‌كی سیاسیدا بچوكناكرێته‌وه‌، ئێستا ‌بەشێك له‌ به‌رنامه و په‌یڕه‌وكردنی كاری سیاسی گۆڕان، له‌لایه‌ن یه‌كێتی و پارتی و حزبه‌كانی دیكه‌شه‌وه‌‌ چاویلێكراوه.

دلێر عه‌بدولخالق، ئاماژە بەوەش دەکات؛ مۆدێلی ئه‌و جوڵانه‌وه‌ سیاسییه‌ی بزوتنه‌وه‌ی گۆڕان پێویستتره‌ وه‌ك ئه‌وه‌ی له‌ رابردودا بینیمان، ئه‌گه‌ر چاكسازی له‌ هه‌رێمی كوردستان و عێراق سه‌رپێ نه‌خرێت ئه‌م جۆره‌ ده‌سه‌ڵاته‌ی ئێستا له‌ هه‌رێم و عێراق هه‌یه‌ ئه‌وه‌نده‌ی ئه‌گه‌ر له‌ناوچونی هه‌یه‌ ئه‌وه‌نده‌ مانه‌وه‌ی نییه‌، له‌به‌رئه‌وه‌ پڕۆژه‌ و به‌رنامه‌ و پلاتفۆڕمی گۆڕان پێویستییه‌ و وه‌ڵامگۆی زۆریك له‌ چاككردنی ئه‌م سیستمه‌ حكومڕانیه‌ی هه‌رێمی كوردستانه‌.

دوپاتیشى دەکاتەوە؛ بۆئه‌وه‌ی به‌شێوازێكی باشتر روبه‌ڕوی گه‌نده‌ڵی ببینه‌وه‌، شه‌فافیه‌ت و رۆشنی زیاتر له‌ داهات و خه‌رجیه‌كان هه‌رێمی كوردستاندا هه‌بێت و متمانه‌ی هاوڵاتیانی هه‌رێم به‌ده‌ستبهێنینه‌وه‌ و په‌وه‌ندییه‌كانی نێوان حكومه‌تی هه‌رێم و فیدراڵ باشتر بكه‌ین و باشتر ئیداره‌ی كه‌رتی نه‌وت و غازی هه‌ێم بده‌ین، "پێویستمان به‌وه‌یه‌ ئه‌و ده‌سه‌ڵاته‌ قوڵانه‌ی ده‌چن ناڕاسته‌وخۆ حوکمی ده‌سه‌ڵاته‌ سه‌ره‌كییه‌كانی حكومه‌تی هه‌رێم ده‌كه‌ن، بێنه‌ ده‌ره‌وه‌و رێگه‌ بده‌ن حکومەت و ده‌سه‌ڵاته‌كانی قه‌زا و په‌رله‌مان خۆیان ته‌مسیلی ئیشوكاره‌كانی خۆیان بكه‌ن و ئه‌و ره‌خنه‌ و گله‌ییانه‌ی خه‌ڵكی هه‌رێم له‌به‌رچاو بگرن".
دەشڵێت: بڕوامان به‌خۆمان و متمانه‌ی خه‌ڵكی ئازادیخوازی هه‌رێمی كوردستان هه‌یه‌ به‌و خه‌ڵكانه‌شه‌وه‌ له‌م قۆناغه‌دا ده‌نگیان به‌ئێمه‌ نه‌داوه، له‌ قۆناغه‌كانی ئاینده‌دا بە به‌ر‌نامه و خوێندنه‌وه‌‌ی دیكه‌ ‌و قوڵبونه‌وه‌یه‌كی زیاتر  بتوانین ئه‌و متمانه‌ بگێڕینه‌وه‌.