بزوتنەوەى گۆڕان هاوخەمى قوربانیانى روداوەکەى سلێمانییە

بزوتنەوەى گۆڕان جگە لە بەشداریی فەرمى لە رێوڕەسمى بەخاکسپاردنى ئەندامانى خانەوادەکەى سلێمانى، وەک هاوخەمی و راگەیاندنى پرسە بۆ لەدەستدانى ئەندامانى ئەو خێزانەى بەهۆى تەقینى سیستمى شۆڤاژ بونە قوربانیی، ئاڵاى مەکۆى سەرەکى دادەگرێت.

ئەوە لەکاتێکدایە پێشتر و لەکاتى بەسەرکردنەوەى قوربانیانى روداوەکە لە نەخۆشخانە، دلێر عەبدولخالق، وتەبێژى بزوتنەوەى گۆڕان رایگەیاند؛ بەداخەوەین بۆ ئەو کارەساتەى بەسەر خانەوادەکەى شارى سلێمانى هات کە هەمو هەرێمى کوردستانى خەفەتبار و تازیەبار کرد کە بەهۆیەوە (١٥) هاونیشتیمانى گیانیان لەدەستداو (١٢) کەسیش برینداربون، ئەو خەمە بە خەمى خۆمان دەزانین.

وتیشى: وەک بزوتنەوەى گۆڕان لە ساتى روداوەکەوە لە خەمى قوربانیانى روداوەکەدابوین و خۆمان و سەرجەم هاوڕێیانمان لە تیمەکانى حکومەتى خۆجێى و حکومەتى هەرێم لەسەر هێڵ بوین بۆ هاوکاریکردن و کاراکردنى پڕۆسەى فریاگوزارى، لەگەڵ هاوخەمیمان بۆ ئەو خانەوادەیە سوپاسى ئیدارەى پارێزگاى سلێمانى و سەرجەم تیمەکان و ئەو هاوڵاتییە دڵسۆزانەى خۆبەخشانە هاوکارى تیمەکانى فریاگوزارییان کرد.