وتەبێژى بزوتنەوەی گۆڕان: بەهێزکردنەوەى گۆڕان لە بەرژەوەندى خەڵک و ئاڕاستەى هەنگاونانە بۆ چاکسازیی ریشەیی و خزمەتى بەرژەوەندییە باڵاکان

25/12/2022

وتەبێژى بزوتنەوەی گۆڕان جەخت دەکاتەوە لەوەى پشتیوانى شاندى دانوستانکارى حکومەتى هەرێم دەکەن بۆ چارەسەرى کێشە هەڵپەسێردراوەکانى نێوان حکومەتى هەرێم و حکومەتى فیدراڵ لەسەروهەمویانەوە دابینکردنی ماف و شایستە داراییەکانى موچەخۆران، ئاماژە بەوەش دەکات؛ بونى کێشە لەنێوان یەکێتى و پارتى کاریگەرى نەرێنى لەسەر ژیان و گوزەرانى خەڵکی دەبێت و رەنگدانەوەى لەسەر ئاستى خزمەتگوزارییەکانى حکومەت دەبێت، بۆیە بەرپرسیارێتى نیشتیمانى وا دەخوازێت بگەنە خاڵى هاوبەش.

دلێر عەبدولخالق، وتەبێژى بزوتنەوەى گۆڕان لە لێدوانێکدا لەبارەى دەرەنجامى دوایین کۆبونەوەى جڤاتى نیشتیمانى و جڤاتى گشتى بزوتنەوەى گۆڕان لە ساڵى (2022) و هەڵوێستى بزوتنەوەى گۆڕان پەیوەست بە پەیوەندییەکانى حکومەتى هەرێم و ناوەند و نێوانى یەکێتى و پارتى، رایگەیاند: لە کۆبونەوەکەدا تەوەرێکى گرنگ پەیوەندیداربو بە دۆخى سیاسى و ئابورى و دارایی هەرێمى کوردستان و پەیوەندیى حکومەتى هەرێم و حکومەتى عێراقى فیدراڵ و تێیدا پشتیوانى هەوڵ و هەنگاوەکانى شاندى دانوستانکارى حکومەتى هەرێم بۆ کۆبونەوەکانى لەگەل شاندى دانوستانى حکومەتى عێراق ئەو لێکتێگەیشتن و کۆبونەوانە دوپاتکرایەوە بۆ چارەسەرى کێشە هەڵپەسێردراوەکانى نێوان هەردولا بەتایبەت پرسى خاک و مادەى (140) و پێشمەرگە و ئەنجومەنى ئیتیحادى و پرسى نەوت و گاز و دارایی، کە دەبێت لەسەر بنچینەى دەستور چارەسەر بکرێن بەتایبەت ئەو بەشەی پەیوەندییان بە ماف و شایستە داراییەکانى موچەخۆران و هاوڵاتییانەوە هەیە.

لەبارەى ململانێکانى یەکێتى و پارتى و لێکەوتەکانى، وتەبێژى گۆڕان دەڵێت: کاتێک لایەنە پێکهێنەرەکانى حکومەت کێشەيان دەبێت، لەمپەر لەبەردەم کاروبارەکانى حکومەت و بەرنامە و کارنامەى کابینەى نۆیەم دروست دەبن و کێشەکان دەبنە کێشەى خەڵک، لەکاتێکدا بەداخەوە کێشەکانی پارتى و یەکێتى پەیوەندى بە ژیان و بەرژەوەندییەکانى خەڵکەوە نییە، بەڵکو کێشەی حیزبی و پاراستنی بەرژەوەندییەکانی خۆیانە.

دەشڵێت؛ بەرپرسیارێتى نیشتیمانى وا دەکات ئەم دو هێزە خاڵى هاوبەش بدۆزنەوە لەپێناو بەرژەوەندى خەڵک و یەکدەنگى لە پرسە نەتەوایەتى و نیشتیمانییەکان و ئێمەش بە راستەوخۆ و ناڕاستەوخۆ لە رێگەى تیمەکانمان لە حکومەت و پەرلەمان هەوڵمان داوە رۆڵى ئەرێنى و خێر بگێڕین بۆ باشکردنى پەیوەندى نێوان پارتى و یەکێتى.

سەبارەت بە دۆخى ناوخۆیی و بەستنى کۆنفڕانسى نیشتیمانى و بڕیارى دوا کۆبونەوە، دلێر عەبدولخالق دەڵێت: هەوڵەکانمان بۆ سەرخستنى پڕۆسەى ئاشتەوایی و بەستنى کۆنفڕانسە لە ساڵى نوێ، بۆئەوەى کۆنفڕانسێکى سەرکەوتو ببەستین پێویستمان بە پێکەوە کارکردنە، گرنگە لەگەڵ ئەو خەڵکە پڕ ئومێد و جۆش و خرۆشە پێکەوە شان بدەینە بەر بەرپرسیارێتى و کۆنفرانس بکەینە سەکۆى بۆچونە جیاوازەکان بۆ بەهێزکردنەوەى بزوتنەوەى گۆڕان، چونکە بەهێزکردنەوەى گۆڕان لە بەرژەوەندى خەڵک و ئو ئاڕاستەیە کا کار بۆ چاکسازیی ریشەیی و خزمەتى بەرژەوەندییە باڵاکانى خەڵک دەکات.


هەواڵی زیاتر