هەولێر؛ کەمپەینى (هاوکارى) هەڵسوڕاوانى گۆڕان بۆ کۆمەککردنى زیانلێکەوتوان لە باکور و رۆژئاواى کوردستان بەردەوامە

کەمپەینى هاوکارى هەڵسوڕاوانى گۆڕان لە هەولێر بۆ کۆکردنەوەى کۆمەک و پێداویستى بۆ لێقەوماوان و زیانلێکەوتوانى بومەلەرزەکەى رۆژئاوا و باکورى کوردستان بەردەوامە و داوا دەکرێت هاوڵاتیان و خێرخوازان وەک ئەرکێکى نیشتیمانى و نەتەوەیی هاوکاربن و تەواوى کۆمەکەکانیش بە ئەمانەتەوە دەگەیەنرێتە زیانلێکەوتوان.

کاردۆ محەمەد، ئەندامى جڤاتى نیشتمانى و سەرپەرشتیارى کەمپەینەکە بە سایتى (گۆڕان)ى راگەیاند؛ دواى ئەو کارەساتەى بەهۆى بومەلەرزەکەى تورکیا و سوریاوە کە زیاتى گەورەى گیانى و مادى لێکەوتەوە، بۆ هاوکاریکردنى خۆشک و برایانمان لە باکور و رۆژئاواى کوردستان هەڵسوڕاوانى گۆڕان هەڵمەتێکى میللیان بۆ هاوکاریکردنى لێقەوماوان راگەیاند بەناوى (کەمپەینى هاوکارى) و تائێستا بڕێکى باش لە پێداویستى سەرەکى بەتایبەت گەرمکەرەوە و شیر و دابیى بۆ منداڵان کۆکراوەتەوە و پڕۆسەکە تا رۆژى پێنجشەممە بەردەوامى دەبێت.

وتیشى داواکارین هاوڵاتیان و خەڵکى خێرخواز و سەرمایەداران وەک ئەرکێکى نیشتیمانى و نەتەوەیی و مرۆیی لەم دۆخە دژوارەدا وەک رابردو پاڵپشت و هاوکاربن و کۆمەکەکەیان بگەیەننە کەمپەینى هاوکارى، ئێمەش لەلایەن تیمى تایبەتەوە سەرجەم ئەو کۆمەک و پێداویستى و هاوکارییانە بە ئەمانەتەوە بگەیەنینە زیانلێکەوتوان لە باکور و رۆژئاواى کوردستان.

ئەوە لەکاتێکدایە پێشتریش تیمى بزوتنەوەى گۆڕان، تیمێکى بزوتنەوەى گۆران بە سەرپەرشتى کەمال موسلیم وەزیرى پیشەسازى و بازرگانى، لە هەولێر سەردانی ئۆفیسی پارتى دیموکراتى گەلان (هەدەپە)یان کرد و
هاوکارى و پشتیوانى بۆ کوردانى رۆژئاوا و باکورى کوردستان دوکردەوە و لەگەڵ گەیاندنى کۆمەک و هاوکارى بۆ جەختیان کردەوە کە هاوکارییکردنى لێقەوماوان ئەرکێکى مرۆیى و نیشتمانى و ویژدانییە.


پێشتریش تیمى کەمپینی  (هاوکاری) رایگەیاند:

کۆمەکى لێقەوماوانی باکور و ڕۆژئاوای کوردستان ئەرکێکی مرۆیی و ئاکاری و نیشتمانی  و ویژدانیە، بۆ بە هاناچوونی بێدەرەتان و خوشک و براکانمان، بەهەر شێوازێک دەتوانین  کۆمەکیان بکەین. ئێمە لەم  پێناوە بۆ گەیشتنی هاوکارییەکانتان بەئەمانتەوە لەخزمەتی خەڵکی چاکە خواز و نیشتمانپەروەر داین.
شوێن گەڕەکی  وەزیران شەقامی یبیستیەکە نزیک یەکێتی پەرلەمانتاران  کۆلانی ٦٦ خانوی ژمارە ١٥
ژ ت: 07504628282
07734628282
کات (9)ی بەیانی تا 6 ئێوارە لە رۆژى شەمە تا پێنجشەممە ئامادەین بۆ وەرگرتنی کۆمەکەکانتان