بۆ یەکەم جار یادی سەری ساڵی کوردی و جەژنی نەورۆ لە پەرلەمانی بەریتانیا کرایەوە

یەکەم بۆنە و یادکردنەوەی فەرمی نەورۆز لە مێژووی بەریتانیادا، لە هۆڵی تایبەت بە بۆنەکان لە پەرلەمانى بەریتانیا بەئامادەبون و سەرپەرشتی سەرۆکی پەرلەمان و پارێزگارى سلێمانى و نوێنەرایەتى لایەنە سیاسییەکان و نوێنەرانى بزوتنەوەى گۆڕان بەڕێوەچو.

بە ئامادەبوون و سەرپەرشتی سێر لیندزی سەرۆکی پەرلەمان و وە بەشداریی دەستەیەکی دیاری پەرلەمانتارو وەزیران و دیپلۆماتکارو بزنسمانەکانی بەریتانیا و نوێنەرانی حکومەتی هەرێمی کوردستان و وە ژمارەیەک کەسایەتی کورد و نوێنەری لایەنە سیاسیەکان بۆنەیەک بۆ یادى نەورۆز بۆ یەکەمجار لە پەرلەمانى بەریتانیا رێکخرا و تێیدا سەرۆکی پەرلەمان و ژمارەیەک پەرلەمانتار پیرۆزبایی و وتەیان پێشکەشى ئامادەبوتان کرد.

د. هەڤاڵ ئەبوبەکر پارێزگاری سلێمانی کە بەفەرمی بانگهێشتی رێوڕەسمەکە کرابو، وتاری پارێزگای سلێمانی و هەرێمى کوردستانی پێشکەشکرد و جلوبەرگ و کڵاشی کوردی و ئەو کتێبە ئینگلیزییانەى لەسەر ئەرکی پارێزگاری سلێمانی چاپکراون پێشکەش بە سێر لیندزی هۆیڵ سەرۆکی پەرلەمانی بەریتانیا کرد، و جلوبەرگی ژنان و پیاوانیی کوردیی؛ پێشکەش بە چەند پەرلەمانتارێکی بەریتانیا کرد.

هاوکات هەریەکە لە رێباز محەمەد بەرپرسی پەیوەندیە دیپلۆماسیەکانی ژوری رەوەندی کوردی و شۆرش حەمید بەرپرسی ئەنجومەنی بەریتانیاى بزوتنەوەى گۆڕان کە بەفەرمی بانگهێشت کرابوون، ئامادەى رێوڕەسمەکە و چالاکییەکانى ئاهەنگى ساڵى نوێى کوردى و بەرزراگرتنى نەورۆز بون.