ئیلهام ئەحمەد سەردانى مەکۆى سەرەکى گۆڕان دەکات

ئیلهام ئەحمەد سەرۆکى دەستەی بەڕێوەبەری مەجلیسی سوریای دیموکرات و شاندێکى یاوەرى سەردانى مەکۆى سەرەکى گۆڕانیان کرد و لە کۆبونەوەیەک لەگەڵ ئافرەتانى گۆڕان  تاوتوێى پرسەکانى خانمانیان کرد.

ئیلهام ئەحمەد، سەرۆکی دەستەی بەڕێوەبەری مەجلیسی سوریای دیمکورات (مەسەدە)، بە مەبەستی لە نزیکەوە ئاشنابوون بە دۆخی ژنان و بە‌هێزکردنی پەیوەندی نێوان ژنانی باشوور و ڕۆژئاوای کوردستان و ئاڵوگۆڕى بیر و را و گفتوگۆ لەسەر پرسەکانى تایبەت بە خانمان بە یاوەرى شاندێک لە ژنانی کۆنگرەی ستار سەردانی ئافرەتانى بزووتنەوەی گۆڕانی لە مەکۆی سەرەکی لەلایەن گوڵستان سەعید، سەرۆکی فراکسیۆنی گۆڕان لە پەرلەمانی کوردستان و شاندێکەوە پشێوازییان لێکرا.

ئیلهام ئەحمەد، لەبارەى ناوەڕۆکى کۆبونەوەکەوە رایگەیاند: ئەم دیدارانە زۆر گرنگن لە نێوان ژناندا، پێویستە ژنان پێکەوە کۆببنەوە لە پێناو باشترکردنی دۆخی ژنان و ئەو ئەرکەش دەکەوێتە ئەستۆى هەمومان، جەختیشى کردەوە کە پاشەکشێ لە پرسی ژناندا ترسناکە و "دەبێت هەموو ژنان پێکەوە ئەو پرسە ببەینە پێشەوە".

هەر لە دیدارەکەدا دید و تێڕوانى بزوتنەوەى گۆڕان بۆ پرسەکانى ژن رونکرایەوە و جەختکرایەوە لەوەى؛ گۆڕان رۆڵى ئافرەتان دەنرخێنێت و دۆزى ژنى لە دروشمبازى داماڵیوە و بە کردار رێگەى لەبەردەم تواناکانى ژنان کردوەتەوە و پێیوایە کێشەکانی ئافرەتان لە کێشەکانی کۆمەڵگە جیاناکرێتەوە و پێویستە ستەم و نادادى کۆتایی بێت بۆئەوەى ژنیش ئازاد و سەربەخۆ بێت، هاوکات سازە عەبدوڵا، ئەندامی ژوری پەیوەندى سیاسی ئەوەى خستەڕو لە دیدارەکەدا گفتوگۆى لەبارەى پرسەکانی ژنان کراوە و لەسەر ئاستی هەر چوار بەشی کوردستان وتى: لە هەرشوێنێکی کوردستان ژنێک بچەوسێتەوە، وەک ئەوە وایە ژنانی هەر چوار بەشی کوردستان چەوسێندراونەتەوە، بۆیە دەبێت هەموان هاوشانى یەک تێبکۆشین و تواناکانمان بەگەڕ بخەین لەپێناو گەیشتن بە ئازادی سەرتاسەری ژنان.