​​​​​​پەیامى پیرۆزبایی ئاڕاستەى بزوتنەوەى گۆڕان دەکرێت

بەبۆنەى تێپەڕبونى (14)یەم ساڵیادى یەکەم بەشدارى سیاسى بزوتنەوەى گۆڕان سەرۆکى هەرێم و سەرۆکى حکومەت و جێگیرى سەرۆکى حکومەت و لایەنە سیاسییەکان پەیامى پیرۆزبایی ئاڕاستەى بزوتنەوەى گۆڕان دەکەن.

دەقى پەیامەکان:

پەیامى سەرۆکى هەرێمى کوردستان:
یادى چوارده‌هه‌مینى دامه‌زراندنى بزووتنه‌وه‌ى گۆڕان له‌ به‌ڕێزان عومه‌ری سه‌ید عه‌لی، ئه‌ندامانی جڤاتی نیشتمانی، جڤاتى گشتی، لایه‌نگران و جه‌ماوه‌رى بزووتنەوەی ‏گۆڕان به‌گشتى پیرۆز ده‌كه‌م، هیواى سه‌ركه‌وتنیان بۆ ده‌خوازم.‏
له‌م یاده‌دا به‌ پێزانینه‌وه‌ له‌ ئاماده‌یى و ڕۆڵى بزووتنه‌وه‌ى گۆڕان له‌ پرۆسه‌ى ‏سیاسى له‌ هه‌رێمى كوردستان و عێراق ده‌ڕوانین و جه‌خت له‌ ته‌بایى و هاریكاریى ‏نێوان ته‌واوى هێز و لایه‌نه‌ سیاسییه‌كان و پێكهاته‌كانى هه‌رێمى كوردستان و ‏عێراق ده‌كه‌ینه‌وه‌، تا هه‌موو پێكه‌وه به‌ره‌و داهاتوویه‌كى باشتر هه‌نگاو بنێنین.‏
نێچیرڤان بارزانى
سه‌رۆكى هه‌رێمى كوردستان
‏2023/7/25‏

پەیامى سەرۆکى حکومەتى هەرێمى کوردستان:
لە چواردەمین ساڵیادی دامەزراندنی بزووتنەوەی گۆڕاندا، پیرۆزبایی لە گشت ئەندام و ھەڵسوڕاو و لایەنگرانی بزووتنەوەی گۆڕان دەکەم و هیوای سەرکەوتنیان بۆ دەخوازم لە پێناو داکۆکیکردن لە پرسە نیشتمانییەکان و مافە دەستوورییەکانی خەڵکی کوردستان.
ئومێدەوارم بزووتنەوەی گۆڕان و هەموو حزب و هێز و لایەنە کوردستانییەکان، هاوكار و هەماهەنگ و هاوهەڵوێست بن لەسەر بەرگریکردن لە مافە ڕەواکانی گەلی کوردستان و پاراستن و گەشەپێدانی قەوارەی دەستووری هەرێمی کوردستان.

مەسروور بارزانی
سەرۆکی حکوومەتی هەرێمی کوردستان

پەیامى پیرۆزباى قوباد تاڵەبانى:

بەڕێزان لە بزووتنەوەی گۆڕان
لە یادی ١٤ ساڵەی دامەزراندنی بزووتنەوەی گۆڕاندا، پیرۆزبایی لە هەموو هەڵسوڕاون و لایەنگرانی بزووتنەوەی گۆڕان دەکەم و هیوای سەرکەوتنتان بۆ دەخوازم.
لەم یادەدا جەخت دەکەینەوە لەسەر پێویستیی هەماهەنگی و پێکەوەکارکردنی زیاتری هەموو هێزە سیاسییەکان و بە تایبەتیش لەنێوان یەکێتیی نیشتمانیی کوردستان و بزووتنەوەی گۆڕان کە ئامانجی هاوبەشمان زۆر زیاترە لە ناکۆکی، بەمەش باشتر و ئاسانتر ئامانجە رەواکانی گەلی کورد بەدی دەهێنین.

دووبارە پیرۆز بێت یادی دامەزراندنی بزووتنەوەی گۆران

قوباد تاڵەبانی
سەرپەرشتیاری مەکتەبی سکرتارییەتی سەرۆک مام جەلال

پەیامى مەکتەبى سیاسى یەکێتیی نیشتیمانیی کوردستان:
بەرێزانی سەرکردایەتی بزوتنەوەی گۆڕان
هەڵسوڕاوان و لایەنگرانی تێکۆشەری بزوتنەوەکە 
لەیادی چواردەیەمین  ساڵرۆژی  بزوتنەوەی گۆڕاندا پیرۆزباییەکی گەرمتان ئاراستەدەکەین.
لەم یادەدا سڵاو و درود دەنێرین  بۆ ڕۆحی  پاکی رەوانشاد  کاک نەوشیروان مستەفا کە نیو سەدە تەمەنی خۆی بۆ خەبات  لەپێناوی سەرفرازی  و رزگاریی  گەلی کوردستاندا تەرخان کرد .
 بەرێزان  ئەمساڵ کە یادی دامەزراندنی  بزوتنەوەی  گۆڕان وەک هێزێکی سیاسی کاریگەر لە کوردستاندا دەکەنەوە،  لە هەموو کات زیاتر پێویستمان بە زیندوو کردنەوەی گیانی هاوپەیمانێتی و هاوخەباتی و پێکەوەیی سەردەمی هەردوو نەمر سەرۆک مام جەلال و رەوانشاد کاک نەوشیروانە چونکە خاڵە هاوبەشەکانی  نێوانمان  یارمەتیدەری پێکەوەیی و هاوخەباتی بەردەوامە.
بەتایبەتی لەسەروو بەندی هەلبژاردنی ئەنجومەنی پارێزگاکانی عێراق کە پێویستی بەیەک ریزی ویەک هەڵوێستی کوردستانییە.
 هەر شاد و سەرکەوتوو بن


پەیامى مەکتەبى سیاسى پارتى دیموکراتى کوردستان:
بەڕێزان ڕێکخەری گشتی و ئەندامانی جڤاتی گشتی و نیشتیمانیی بزووتنەوەی گۆڕان.
بە بۆنەی (١٤)یەمین ساڵیادی دامەزراندنی بزووتنەوەی گۆڕان پیرۆزباییەکی گەرم لە ئێوەی بەڕێز و ئەندام و لایەنگرانی حزبەکەتان دەکەین و، ھیوای بەردەوامی و سەرکەوتنتان بۆ دەخوازین لە خزمەتکردنی دۆزی ڕەوای گەلەکەمان.  
لەم بۆنەیەدا ڕۆڵی بزووتنەوەکەتان لە پڕۆسەی سیاسیی ھەرێم بەرز دەنرخێنین، ھەروەھا دووبارە جەخت دەکەینەوە سەر ھاوپەیمانێتی و ھەماھەنگی نێوانمان و سەرجەم ھێز و لایەنە سیاسییەکانی کوردستان بۆ داکۆکیکردن لە دەستکەوتەکانمان و بەدیھێنانی گشت مافەکانمان.
ھیوادارین ھەموو لایەنەکان دڵسۆزانە و بەرپرسانە ھەنگاوبنێن بۆ ئەنجامدانی پرۆسەی ھەڵبژاردن و چارەسەرکردنی کێشە و گیروگرفتەکان و پتەوترکردنی بنەماکانی ھەماھەنگی و دەستەبەرکردنی ئایندەیەکی ڕۆشن و شایستە بۆ گەلەکەمان.

دووبارە یادی دامەزراندنی بزووتنەوەکەتان پیرۆز بێت، ھەر سەرکەوتوو بن.
مەکتەبی سیاسیی پارتی دیموکراتی کوردستان
٢٥ـی٧ـی٢٠٢٣

پەیامی پیرۆزبایی بزوتنەوەی چاكسازيی نیشتمانی
بەڕێزان /بزوتنەوەی گۆران
ب/پیرۆزبایی
بەبۆنەی (٢٥-٧) ساڵڕۆژی ڕاگەیاندنی ( بزوتنەوەی گۆڕان ) بە گەرمی پیرۆزباییتان لیدەكەین ,هیوادارین خەباتی مەدەنیانە و جەماوەریانەی قۆناغەکە ببێتە بنەمای گەشەپێدانی دیموكراسی و فراوانبونی پانتایی زیاتری ئازادی لەکوردستان ،یادی ڕاگەیاندنی بزوتنەوەكەتان هاوکاتە لەگەڵ هەلومەرجێکی نوێو ئاڵنگاریە ناوخۆیی و هەرێمایەتی ونێودەوڵەتیەکان بە ئاراستەی گۆڕانکاری ،بۆیە پێویستە هەمولایەك هەوڵەكان بخەنەگەڕ بۆ ئاسایی كردنەوەی دۆخی ئێستای كوردستان و یەكخستنەوەی ماڵی كوردو پاراستنی بەرژەوەندیە باڵاكانی گەلونیشتمان ،وەهێنانە ئارای کەشێکی ئارام و لەبار بۆدەستەبەرکردنی یەکلیستی بۆ هەڵبژاردن لە ناوچە کوردستانیەکانی دەرەوەی ئیدارەی هەرێمو،باشكردنی گوزەرانی خەڵك لە ڕێگای چاكسازییەكی گشتگیری هەمەلایەنەوە ،جارێكی تر پیرۆزباییتان لێدەكەین و هیوادارین هەموو لایەک پێكەوە خزمەتی گەورە بە گەل و نیشتمان بکەین .

هەر شاد بن

بزوتنەوەی چاكسازیی نیشتمانی
٢٠٢٣/٧/٢٥