وەفدێکى مەکتەبى سیاسى یەکێتى سەردانى گۆڕان دەکات

وەفدێکى مەکتەبى سیاسى یەکێتى نیشتیمانى کوردستان سەردانى مەکۆى سەرەکى بزوتنەوەى گۆڕان دەکات و لە کۆبونەوەیەکدا پرسى هەڵبژاردن و ئاڵنگارییەکان و پێویستى یەکڕیزى و یەک لیستى کورد لە ناوچە کێشە لەسەرەکان تاوتوێ دەکەن.

لە درێژەى سەردانى لایەنە سیاسییەکان بۆ لاى بزوتنەوەى گۆڕان، ئەمڕۆ پێنجشەممە (2023/7/27)، وەفدێکى مەکتەبى سیاسى یەکێتى نیشتیمانى کوردستان سەردانى مەکۆى سەرەکى بزوتنەوەى گۆڕان کرد  و لەلایەن وەفدى بزوتنەوەى گۆڕانەوە پێشوازیان لێکرا.
لە کۆبونەوەکەدا پرسى هەڵبژاردنەکانى ئەنجومەنى پارێزگاکانى عێراق بەتایبەت بۆ کەرکوک و ناوچە کێشە لەسەرەکانى دەرەوەى ئیدارەى هەرێم و پێشنیارى یەک لیستى و هاوپەیمانى کورد و ئەو ئاڵنگاریی و ئەگەرانەى دێنە بەردەم پڕۆسەکە گفتوگۆیان لەبارەوە کرا و ئامادەکارى لایەنە سیاسییەکان و پێویستى هەنگاوەکان بۆ قۆناغى داهاتو تاوتوێکران.

ئەوە لە کاتێکدایە هەفتەى رابردو شاندێکى مەکتەبى سیاسى یەکێتى نیشتیمانى کوردستان و شاندێکى پارتى دیموکراتى کوردستان سەردانى بزوتنەوەى گۆڕانیان کرد و دوێنێش شاندێکى یونامى بە سەرۆکایەتى بەرپرسی ئۆفیسی نەتەوە یەکگرتووەکان لە هەرێمی کوردستان، سەردانى مەکۆى سەرەکى بزوتنەوەى گۆڕانى کرد، لە تەواوى ئەو دیدارانەدا بزوتنەوەى گۆڕان جەخت لە روانینى خۆی و پێویستى و یەکڕیزى و یەک لیستى هەمو لایەنە کوردستانییەکان دەکاتەوە لە هەڵبژاردنى ئەنجومەنى پارێزگاکانى عێراق لە ناوچە کوردستانییەکاى دەرەوەى ئیدارەى هەرێم، لەپێناو پاراستنى سەنگ و پێگە و هێزى کورد.