ژورى رۆژنامەوانى گفتوگۆ بۆ سێ توێژینەوەى زانستى پەیوەست بە میدیا و سیاسەت رێکدەخات

ئه‌مڕۆ شه‌ممه‌ (16/12/2023)، له‌لایه‌ن ژوری رۆژنامه‌وانیی بزوتنه‌وه‌ی گۆڕانه‌وه‌ گفتوگۆی ده‌رئه‌نجامه‌كانی سێ توێژینه‌وه‌ی زانستی پەیوەست بە میدیاى نوێ و سیاسەت و گوتارى سیاسى لە مه‌كۆی سه‌ره‌كی به‌ڕێوه‌چو.

دلێر عەبدولخالق، رێکخەرى ژورى رۆژنامەوانى لە دەستپێکى گفتوگۆکەدا رایگەیاند؛ ئەم گۆڕاو و چەمکە زانستیانەى هەر سێ توێژینەوەکە کاریان لەسەر کردوە بابەتى پڕبایەخ و گرنگن بۆ دەسەڵاتە فەرمییەکانى حکومەت و دامەزراوەکانى حکومڕانى، دامەزراوە و پارتە پێشکەوتوەکان لەرێگەى تویژینەوە و راپرسیەوە نەخشەڕێى سیاسى دادەنێن و بڕیارى سیاسى دروست دەکەن، لەو سۆنگەیەوە بەپێویستمان زانى گفتوگۆیەک لەسەر توێژینەوە زانستییانە رێکبخەین.

گفتوگۆ زانستییه‌كه‌، له‌ژێر ناوی (میدیا و سیاسه‌ت) بە بەشدارى ژمارەیەکى بەرچاو لە هەڵسوڕاوان و ئەندامانى ژورەکان و تیمى حکومەت و ئەندامانى خولەکانى پێشوى پەرلەمان و ئەنجومەنى پارێزگا له‌ شاری سلێمانی به‌ڕێوه‌چو، تێیدا (د. ئه‌ركان ره‌ئوف، د.چۆلی ئه‌سعه‌د) ده‌رئه‌نجامی تێزی دكتۆراكانیان پێشكه‌شكرد و (سه‌نگه‌ر جه‌مال) ناوەڕۆکى ماسته‌رنامه‌كه‌ی پێشكه‌ش كرد.

هەریەکە لە توێژەران پوختەیەک لە توێژینەوەکان و ئەو دەرەنجام و راسپاردانەیان خستەڕو کە پێى گەیشتون و دەکرێت دامەزراوەکانى حکومڕانى لە؛ پارتە سیاسییەکان و پەرلەمان و رێکخراوەکانى کۆمەڵى مەدەنى و ناوەندە ئەکادیمى و زانستییەکان سودیان لێوەربگرن لە بوارەکانى بازاڕگەرى سیاسى و داڕشتنى گوتارى سیاسى و بەڕێوەبردنى هەڵمەتى هەڵبژاردن لە میدیاى نوێ.

دواتر لە لایەن بەشدارببوانەوە سەرنج و پرسیار لەبارەى ناوەڕۆکى توێژینەوەکان خرانەڕو، گفتوگۆ و شرۆڤەى ناونیشان و دەرەنجام و پێشنیار و راسپاردەکان کرا.