کۆبونەوەى گۆڕان و پارتى دەستپێدەکات

06/04/2019

شاندى پارتى و گۆڕان لە سلێمانى کۆدەبنەوە،  ئەوەش یەکەم کۆبونەوەى شاندى هەردولایە دواى دەستپێکردنى هەنگاوەکانى پەرلەمان بۆ هەموارى پرۆژەیاساى سەرۆکایەتى هەرێم و دەستپێکردنى هەنگاوەیاساییەکان بۆ پێکهێنانى کابینەى نوێى حکومەت.

کەمێک لەمەوبەر شاندى پارتى دیموکراتى کوردستان گەیشتە مەکۆى سەرەکى بزوتنەوەى گۆڕان لە شارى سلێمانى و بڕیارە سەعات (11:00)ى پێشنیوەڕۆى ئەمرۆ شەممە کۆبونەوەى هاوبەشى هەردولا دەستپێبکات.

بەپێى زانیارییەکانى (سبەى) سەردانەکەى شاندنى پارتى و کۆبونەوەى هەردولا لە چوارچێوەى هەنگاوە یاساییەکانى پەرلەمانە بۆ هەموارى پڕۆژەى سەرۆکایەتى هەرێم و گفتوگۆ دەکەن لەبارەى رێککەوتنەکەیان لەگەڵ یەکێتى نیشتیمانى کوردستان و بەرکەوتەى لایەنەکان لە کابینەى نوێى حکومەت.

هاوکات تاوتوێى دۆخى سیاسی هەرێم و  ناوچەکە و پرسى کەرکوک و پەیوەندییەکانى هەرێم لەگەڵ بەغدا دەکەن.