چۆمان محەمەد: جیاوازى لەنێوان ئەداى تیمى حکومى گۆڕان و لایەنەکانى دیکە هەیە، بەڵام بەهۆى کێشەى موچە و کەمى خزمەتگوزارییەکانەوە ئەو جیاوازییە نابینرێت

رێکخەرى ژورى یاسایی بزوتنەوەى گۆڕان رایدەگەیەنێت؛ هیچکات هێندەى ئێستا مەترسى لەسەر قەوارەى هەرێمى کوردستان و لەقاڵبدانى دەسەڵاتدانى نییە و پشتیوانى نێودەوڵەتیمان لاواز نەبوە، لە ساڵى (2014)شـەوە خەڵک لە قەیرانێکى قوڵدایە و باجى هەڵە سیاسى کاستێکى سیاسى دەدات کە خۆیان خۆشگوزەرانن و دەشڵێت: چاکسازى نەبوەتە ئیرادەیەکى راستەقینە و دەستوەردانى حیزبى هێزەکانى دەسەڵات بۆ کاروبارى حکومەت زیاتر بوە، هەمو ئەوانە لەمپەرن لەبەردەم تیمى گۆڕانیش.

چۆمان محەمەد، رێکخەرى ژورى یاسایی بزوتنەوەى گۆڕان ئاماژە بەوە دەکات؛ حكومەتی هەرێمی كوردستان یەك ئیدارە و یەك ئاڕاستەی كاركردنی نییە و ئەو دابەشبونە حیزبیە، رۆڵ و كاریگەری گەورەی هەیە بۆ مامەڵەكردن لەگەڵ بەغدا كە ئەوەش هەرێمی كوردستان لێی زەرەرمەند دەبێت، بۆیە پێویستە بیر لە مەترسی دۆخەكە بكرێتەوە کە بەرگەى ململانێکانى پارتى و یەکێتى ناگرێت، چونكە بە فیعلى مەترسى و هەوڵی بچوككردنەوە تا نەهێشتنى قەوارەى هەرێمی کوردستان هەیە، بۆیە پێوست بو لەهەموکات زیاتر كورد یەكگرتو تەبا بوایە.

دوپاتیشى دەکاتەوە کە رەخنە و گلەییەکانى هاوڵاتیان لەو قەیرانانەى بەرۆکى گرتون هەر لە خراپى دۆخى موچە تا نەبونى خزمەتگوزارییەکان و مامەڵەى ناتەندورستى هێزە دەیەڵاتدارەکان رەوان، بەڵام پێویستە بزانین کە ئەم قەوارەیە بەرهەمی (100) ساڵ قوربانیدانی پێشمەرگە و خەڵكی هەرێمی كوردستانە و هی یەكێتی و پارتی نیە، بۆە دەبێت بیپارێزین.

سەبارەت بە بەشداری بزوتنەوەی گۆڕان لە حكومەت و ئەو رەخنانەى لە تیمەکەى دەگیرێت، ئەندامەکەى جڤاتى نیشتمانى دەڵێت: ئەو ناڕەزایەتی و رەخنانە رەوایەتی تیایە، لەگەڵ ئەوەشدا رونە کە جیاوازى لەنێوان ئەداى وەزیرەکانى گۆڕان و تیمى حکومى گۆڕان و لایەنەکانى دیکە هەیە، بەڵام بەهۆى کێشەى موچە و کەمى خزمەتگوزارییەکانەوە وەک پێویست ئەو جیاوازییە نابینرێت، ئەوەش پێویستە تیمى گۆڕان لە حکومەت چۆن رونكردنەوە دەدەن بە خەڵك و هەڵسوڕاوان لەوەى لە حكومەتدا چییان کردوە بۆ بەرژەوەندى گشتى و بە چ نیەتێکەوە کاریان کردوە و چۆن سورن لەسەر بەرنامەکانى چاکسازى.

پەیوەست بە پرسى مانەوەی هێزەكانی هاوپەیمانان لەعێراق و هەرێمى کوردستان، رێکخەرى ژورى یاسای دەڵێت: بونى هاوپەیمانان لە دوای ساڵی (2003)ەوە جۆرێك لە شكڵی قانونی هەیە لەبەر ئەوەی بەشێكی هێزانە بەبڕیاری نەتەوەیەكگرتوەكان لە عێراقدا ماونەتەوە بەشەكی دیكەشی دەگەڕێتەوە بۆ ئەوەی شەڕى تیرۆر دەکەن و لە چند ساڵى رابردودا قوربانى زۆریان داوە و پارەى زۆرشیان خەرجکردوە.