ژوری ڕۆژنامەوانی: نەبونی میدیای نیشتمانی زیانی لە پرۆسەی سیاسیی و دیموکراسی داوە

ژوری ڕۆژنامەوانی بزوتنەوەى گۆڕان لە یادی رۆژنامەگەری کوردییدا، پیرۆزبایی ئاراستەی رۆژنامەنوسان دەکات و رایدەگەیەنێت؛ لەبەردەم ئارامگەی شەهیدانی قەڵەم و ئازادیخوازانی کوردستان سەری ڕێز و وەفا دادەنەوێنین و، جەخت لەسەر خەباتی نەپساوە بۆ گەشەپێدانی ژیانی دیموکراسی و لابردنی ئاستەنگەکانی بەردەم ئازادی بیروڕا و ئازادی ڕادەربڕین و ئازادی ڕۆژنامەگەری لە هەرێمی کوردستان دەکەینەوە"، هاوکات دەستپشخەری بۆ داڕشتنی (پەیماننامەی ئاکاری میدیایی) دەکات کە هەموو لایەک پابەندبکات بە پەیوەستبون بە بنەما ئیتیکیەکانی پیشەکە و دورکەوتنەوە لە بڵاوکردنەوەی زانیاری ناڕاست و تۆمەت و لە کەدارکردن.

لەو راگەیەندراوەدا کە بەبۆنەى (١٢٦) ساڵەى یادى رۆژنامەگەرى کوردیەوە بڵاویکردەوە، ژورى رۆژنامەوانى ئاماژە بەوە دەکات؛ یادی ڕۆژنامەگەری، هاوکاتە لەگەڵ قەیرانی سیاسیی و نەبونی دامەزراوە شەرعیەکان و لەمپەڕەکانی بەردەم هەڵبژاردنی خولی شەشەمی پەرلەمانی کوردستان، لەم هەلومەرجەدا میدیای کوردیش لەبەردەمی بەرپرسیارێتی نیشتمانی و داڕشتنی گوتارى میدیاییە، بۆ پاراستنی یەکڕیزى گەلى کوردستان و دورخستنەوەى مەترسییەکانى دوبەرەکى و شەڕى ناوخۆ و قوڵکردنەوەی کێشەکان، بەشێوەیەک جیاوازییەکان بکرێنە خاڵی بەهێز و هاوبەش بۆ ئەنجامدانى هەڵبژاردن بە چاودێرى ڕێکخراوە بیانییەکان".
  هەروەک ئەوەدەخاتەڕو؛ نەبونی میدیای نیشتمانی و میدیای هاوسەنگ زیانی زۆری لە پرۆسەی سیاسیی و دیموکراسی داوە، بەشێوەیەک میدیاى حیزبى و میدیاى کەسى و ئەجێنداى تایبەت؛ بە سروشتی خۆی ڕاستی ڕوداوەکانیان لە یەک گۆشەنیگاوە نیشانداوە، بەمەش بابەتیبون و پیشەیبون و دەستەبەری زانیاری بێلایەن بۆ هاونیشتمانیان لە ئاستێکی لاواز و خراپدا بوە، هەربۆیە هاوتەریبی کایەى سیاسى و ئیدارى و حوکمڕانى؛ میدیاش پێویستى بە چاکسازی ڕیشەیی و بەخۆداچونەوە و خۆڕێکخستنەوەیە.

دەقى راگەیەندراوەکە:

سەد و بیست و شەش ساڵ لەمەوبەر، لە رۆژی (٢٢) نیسانی (١٨٩٨) له‌ تاراوگه‌دا، یه‌كه‌مین ژماره‌ی (رۆژنامه‌ی كوردستان) له‌ قاهیره‌ی پایته‌ختی میسر به‌ چاپ گه‌یه‌ندرا.

ئه‌م وه‌رچه‌رخانه‌ مێژوییه‌ له‌ كات و ساتێكدا، كه‌ هێشتا چاپ و نوسین به‌ زمانی شیرینی كوردی دیارده‌یه‌كی به‌ربڵاو نه‌بو؛ داهێنانێکی پڕ خزمەت بو، کە‌ سه‌رباری ڕۆڵه‌ رۆژنامه‌وانیه‌كه‌ی، ئه‌ركی بڵاوكردنه‌وه‌ی نوسین و بیروڕای میللەتەکەمانی كه‌وته‌ سه‌رشان و به‌شدارییه‌كی گه‌وره‌ی له‌ گواستنه‌وه‌ی نه‌ته‌وه‌كه‌مان بۆ قۆناغی نوسین و ڕۆشنگەری كردوه‌.

لە یادی رۆژنامەگەری کوردییدا، پیرۆزبایی گەرم ئاراستەی رۆژنامەنوسانی کوردستان دەکەین، هاوکاتیش لەبەردەم ئارامگەی شەهیدانی قەڵەم و ئازادیخوازانی کوردستان سەری ڕێز و وەفا دادەنەوێنین و، جەخت لەسەر خەباتی نەپساوە بۆ گەشەپێدانی ژیانی دیموکراسی و لابردنی ئاستەنگەکانی بەردەم ئازادی بیروڕا و ئازادی ڕادەربڕین و ئازادی ڕۆژنامەگەری لە هەرێمی کوردستان دەکەینەوە.

میدیاکاران و ڕۆژنامەنوسانی بەڕێز..

یادی ڕۆژنامەگەری ئەمساڵ، هاوکاتە لەگەڵ قەیرانی سیاسیی و نەبونی دامەزراوە شەرعیەکان و لەمپەڕەکانی بەردەم هەڵبژاردنی خولی شەشەمی پەرلەمانی کوردستان، لەم هەلومەرجەدا میدیای کوردیش لەبەردەمی بەرپرسیارێتی نیشتمانی و داڕشتنی گوتارى میدیاىیە، بۆ پاراستنی یەکڕیزى گەلى کوردستان و دورخستنەوەى مەترسییەکانى دوبەرەکى و شەڕى ناوخۆ و قوڵکردنەوەی کێشەکان، بەشێوەیەک جیاوازییەکان بکرێنە خاڵی بەهێز و هاوبەش بۆ ئەنجامدانى هەڵبژاردن بە چاودێرى ڕێکخراوە بیانییەکان.

بە چاوخشاندنەوە بە ئەزمونى میدیا لە هەرێمى کوردستاندا؛ دەردەکەوێت نەبونی میدیای نیشتمانی و میدیای هاوسەنگ زیانی زۆری لە پرۆسەی سیاسیی و دیموکراسی داوە، بەشێوەیەک میدیاى حیزبى و میدیاى کەسى و ئەجێنداى تایبەت؛ بە سروشتی خۆی ڕاستی ڕوداوەکانیان لە یەک گۆشەنیگاوە نیشانداوە، بەمەش بابەتیبون و پیشەیبون و دەستەبەری زانیاری بێلایەن بۆ هاونیشتمانیان لە ئاستێکی لاواز و خراپدا بوە، هەربۆیە هاوتەریبی کایەى سیاسى و ئیدارى و حوکمڕانى؛ میدیاش پێویستى بە چاکسازی ڕیشەیی و بەخۆداچونەوە و خۆڕێکخستنەوەیە، بەشێوەیەک ڕۆژنامەوانی وەک ئامرازێکی پەیوەندی سیاسیی لە خزمەت خەڵک و بەشداربێت لە بیناکردنی حوکمڕانییەکى دروست و وەڵامدەرەوە.

سه‌رباری‌ ئه‌وه‌ی‌، که‌ ڕەوتی‌ رۆژنامه‌گه‌ری‌ هه‌نگاوی‌ باش به‌ره‌و پێش چووه‌، به‌ڵام هه‌ڕه‌شه‌کانی سه‌ر ئازادی‌ و به‌تایبه‌ت ئازادی رۆژنامه‌گه‌ری‌، نه‌ک هه‌ر که‌منه‌بوونه‌ته‌وه‌، به‌ڵکو رۆژ به‌ رۆژ ‌و له‌ ناوه‌ند‌ و شوێنی جیاوازی هەرێمى کوردستاندا له‌ زیادبووندان، خوڵقاندنی‌ ئه‌م هه‌لومه‌رجه‌ وێنای‌ هه‌رێمه‌که‌مانی،‌ نه‌ک له‌ ناوخۆی‌ کوردستان، به‌ڵکو له‌سه‌ر ئاستی‌ نێوده‌وڵه‌تی ناشیرین کردوه‌، که‌ بەپێی‌ ڕاپۆرتی‌ ڕێکخراوه‌ نێوده‌وڵه‌تیه‌کانی په‌یوه‌ست به‌ ئازادی رۆژنامه‌وانی و مافەکانی مرۆڤ له‌ پۆلێنبه‌ندی‌ ئه‌و جێگایانه‌ن، که‌ ئاستی‌ پێشێلکارییەکان تیایدا بەرزە.

لە کۆتایدا، دوبارە پیرۆزبایی لە میدیاکاران دەکەین و ئەم دەرفەتە دەقۆزینەوە تا دەستپشخەری بۆ داڕشتنی (پەیماننامەی ئاکاری میدیایی) بکەین، کە هەموو لایەک پابەندبکات بە پەیوەستبون بە بنەما ئیتیکیەکانی پیشەکە و دورکەوتنەوە لە بڵاوکردنەوەی زانیاری ناڕاست و تۆمەت و لە کەدارکردن، لەبەرامبەردا ئەرکی حکومەت و دامەزراوە پەیوەندیدارەکانە یاسا کارپێکراوەکانی جێبەجێ بکەن و، مافەکانی رۆژنامەنوسان لەسەروھەمویانەوە پێدانی زانیاری و بنەماکانی شەفافیەت بپارێزن.

ژوری ڕۆژنامەوانی بزوتنەوەی گۆڕان
٢١ی نیسانی ٢٠٢٤