وێنە؛ کۆڕى (کەرکوک لە گێژاوى ململانێى سیاسیدا) لە مەکۆى سەرەکى

ئەمڕۆ شەممە (١٧ى ٨ى ٢٠٢٤)، لە درێژەى کار و چالاکییەکانى ژورى رۆژنامەوانى بزوتنەوەى گۆڕاندا کۆڕى (کەرکوک لە گێژاوى ململانێى سیاسیدا) بۆ ئاوات محەمەد ئەمین، ئەندامى پێشوى ئەنجومەنى پارێزگاى کەرکوک و چاودێرى سیاسى، بە ئامادەبونى ژمارەیەک لە هەڵسوڕاوان و گۆڕانخوازان و تیمى حکومەتى هەرێم و حکومەتى خۆجێى بەڕێوەچو.

ئاوات محەمەد ئەمین، لە کۆڕەکەدا بە وردى تیشکى خستە سەر باكگراوندی ململانێ سیسیەكان لە کەرکوک تا دۆخى ئیستاى شارەکە و گۆڕانکارییەکان و لێکەوتەى جێبەجێ نەکردنى مادەى (140)ى دەستور و وتى: لە دوای ساڵی (٢٠٠٣)وە لەنێوان یەكێتی و پارتی دەركەوت ململانێ هەیە لەلایەک و لەلایەکیش ململانێى کورد لەگەڵ پێكهاتەكانى دیکەى شارەکە، بەڵام گرفتەکە لەوەدایە هەندێکجار ململانێى نێوان پارتی و یەكێتی لەسەر پۆستی بەڕێوەبەرێک گەیشتوەتە ئاستی جوڵاندنی هێز بەرامبەر یەکتر.

ئاماژەى بەوکرد لە چەند ساڵى رابردودا ململانێى توندى لایەنە سیاسى و پێکهاتەکان هۆکار بو بۆئەوەى دۆخى ئارامى شارەکە بەرەو بارگرژی و ئاڵۆزى و توندو تیژی بڕوات، لەگەڵ هەمو ئەو دۆخەدا لێکەوتەکانى ئەنجامدانی ریفراندۆم و (١٦)ی ئۆكتۆبەر لە لە زیانى کورد و دۆزەکەى بو لە کەرکوک و ناوچە کوردستانیە دابڕێنراوەکان تا ئەوەی لە (٢٠١٩)دا پارێزگارێك سەپێندرا.

پەیوەست بە دۆخى ئیستاى شارەکە و ئەو رێککەوتنانەى لایەنە کوردیەکان بە جیا لەگەڵ هەندێک لە پێکهاتەکانى دیکە ئەنجامیاندا، ئاوات محەمەد جەختى کردەوە لەوەى کە پێویست و لە بەرژەوەندى کورد بو لایەنە کوردییەکان لەژێر یەک چەکتر و کارى پێکەوەییان بکردایە  و رونى کردەوە لە رابردودا ئەجێندا و بەرنامەى بزوتنەوەى گۆڕان ئەوەبو كە بۆ چارەسەری دۆخی كەركوك و ناوچە كوردستانیەكان و كەركوك پڕۆژەی نیشتمانى هەبو بەڵام لایەنەکانى دیکە بەدەمیەوە نەهاتن، "ئێستاش ئەو رێككەوتنانەی كراون دەستى ئەنجومەنی بەستوە چ پرۆسەی سیاسی چ لە پشکی كوردیش لە بەڕێوەبردن بەتایبەت کە پەیوەندی یەكێتی و پارتی ئێستا لە كەركوك لە خراپترین ئاستیدایە، مەترسیەکە لەوەدایە کە چۆن بەهۆی سیاسەتی هەڵە و ململانێی پارتی و یەكێتی كورد لە نەینەوا دۆڕاوە، ئەم رێككەوتن و ململانێیانەى یەکێتى و پارتى لە كەركوكیش بۆ كورد خراپە".