وتاری دامەزاوەی ئافرەتانی بزوتنەوەی گۆڕان لە دیداری گۆڕانخوازاندا

دەقی وتارەكە كە لەلایەن مونیرە عوسمان پێشكەشكرا:

بەڕێزان.. ئامادەبوانی خۆشەویست و گۆڕانخوازان و ئافرەتان و کچانی پڕ لە وزەو هیوا

گەلێک خۆشحاڵین وەک دامەزاوەی ئافرەتان لەم دیدارە گرنگەدا دەرفەتی گفتوگۆکردنمان لەگەڵ ئێوەی خۆشەویستدا هەیە،
 بێگومان مێژووی وەرچەرخان و گۆڕانکاری و شۆڕش و جوڵانەوە سیاسی و کۆمەڵایەتی و فەرەهەنگییەکان لە دونیادا بێ ڕۆڵی بنەڕەتی و سەرەکی ئافرەتان توشی کورتهێنان و نوچدان بونەتەوە، بە پێچەوانەشەوە لەهەر کاتێکدا بەشداری و ڕۆڵی ئافرەتان لە مێژووی کۆن و نوێی سیاسی و لەبەرخودان و گەیشتن بە ماف و ئازادییەکان هاوشانی پیاوان ڕۆڵی گرنگیان لە سەرکەوتنەکاندا  بینیوە.

 بۆ زیاتری پێگە و ڕۆڵی ئافرەتان لەنێو بزووتنەوەی گۆڕاندا پێویست و گرنگە  بە دیدێکی سەردەمیانە و شارەستانیانە بڕوانینە خەبات و تواناكانیان و زەمینەی بەشداریکردنیان لە تەواوی ئاستەكانی سیاسی و ڕێکخراوەیی و حوکمڕانی بۆ بڕەخسێنرێت و دەروازە و ڕێگاکان  لە بەردەمیاندا واڵاتر بکرێن..

ڕوون و ‌ئاشکرایە ئافرەتان لە سەرەتای درورستبوونی بزووتنەوەی گۆڕانەوە شان بە شانی برا و هاوڕێکانمان لە تەواوی ئۆرگان و هەردوو تیمی حکومەت و فراکسۆنەکانی پەڕلەمان و ئەنجومەنە خۆجێیەکاندا، بە دڵسۆزی و سەربەرزانە و بەوپەڕی بەرپرسیاریێتیەوە ئەرکەکانی سەرشانیان بەجێگەیاندوە، لەڕابردوو و ئێستاشدا بزووتنەوەی گۆڕان  متمانەی بەتوانا و لێهاتوی ئافرەتان هەبووە و هەیە، لەو ڕوانگەیەوە لە دوو خولی پەرلەمانی کوردستاندا، سەرۆکی فراکسیۆنی گۆڕان لە پەرلەمانی کوردستاندا ئافرەت بوون، هەروەها لە لیژنەی ئامادەکردنی ڕەشنوسی دەستووری هەرێمی کوردستان و لە ئەنجومەنی کۆمۆسیۆنی سەربەخۆی هەڵبژاردنەکانی هەرێمی کوردستان ئەندامەکەی ئافرەت بوون و لە جومگەکانی حوکمڕانیدا لە پلەی وەزیرەوە تاوەکو بەڕێوەبەری گشتی و ڕاوێژکار و ئاستەکانی دیکەدا ڕۆڵ و جێدەستیان دیاربووە.
لەگەڵ ئەوەشدا لێبڕاوانە کاری سیاسی و ڕێکخراوییان جێبەجێكردوە و تا ئەم ساتەوەخته بەردەوامن و ڕۆڵی دیار و بەرچاوییان هەیە.

 لێرەدا جێگەی خۆیەتی لە بەردەم ئامادەبوانی بەڕێزی ئەم دیدارەدا جەخت لە بەردەوامی خەبات و تێکۆشانی خۆمان بکەینەوە، کە سەرباری ئاستەنگەکان لە باشوری کوردستان پێگە و ڕۆڵی ئێمەی ئافرەتان لە مەیدانی خەباتی سیاسی و ڕێکخراوەییدا هاوشانی ئافرەتانی باکور و ڕۆژئاوا و ڕۆژهەڵاتی کوردستان بووە و بەردەوامین، هەرچەندە لە ناوەندی بڕیاری سیاسیدا لەئاست خواست و چاوەڕوانییەکانی ئێمەدا نەبووە.

بەڕێزان بەشداربوانی دیداری گۆڕانخوازان.. وەك لە دەستپێکی ئەم وتارەدا ئاماژەمان بە ڕۆڵی ئافرەتان لە نێوی بزووتنەوەی گۆڕاندا کردوە.
پێویستە لەم قۆناغە هەستیار و نوێیەشدا لە نێو بەرنامەی سیاسیی و ناوەندی دروستکردنی  بڕیارەکانی بزووتنەوەکەماندا دەنگ و پێگە و ڕۆڵی ئافرەتان باشتر و بەهێز تر و کاریگەر تر بکەین..

 لەدوای ئەو ئاڵوگۆڕانەی  لە هەمبەر پڕۆسەی بەخۆداچونەوە و خۆڕێکخستنەوەی بزووتنەوەکە هاتۆتە ئاراوە، هەر لەو چوارچێوەیەدا بزووتنەوەی گۆڕان بەشیاو و گونجاوی دەزانێت کە دامەزراوەیەکی تایبەت بە کاروباری ئافرەتان وەک ئۆرگانێکی ڕێکخراوەیی و بەشێک لە پەیکەری بزووتنەوەکە دابمەزرێنرێت، هەر یەک لە بەڕێزان ڕێکخەری گشتی و جڤاتی نیشتمانی بە ڕاوێژ لەگەڵ شارەزایان و ئافرەتانی خاوەن ئەزموون لە کاری ڕێکخراوەیدا بە مەرجێک دامەزراوەكە لە چوارچێوەی پەیڕەوی ناوخۆ و سیاسەتی گشتی بزووتنەوەی گۆڕاندا بێت، وەک ناوەندێکی کارایی ڕێکخراوەیی کارەکانی دامەزراوەکە ڕایی بکات.

 خۆشبەختانە لە ئێستادا بە پشتیوانی ڕێکخەری گشتی بزووتنەوەی گۆڕان بەڕێز( دانا ئەحمەد مەجید) و بەهاوکاری و کۆمەکی ئەندامانی جڤاتی نیشتمانی و گشتی و ژوور و باژێڕوان و بازنە و ڕایەڵەکان  بەکردارەکی هەنگاوەکانی پڕۆسەی بونیاتنانی دامەزراوەی ئافرەتان دەستیپێکردوە. بەشێک لە ئافرەتانی هەڵسوڕا و ئەندامان لە هەموو ئاستە جیاجیاکانی بزووتنەوەی گۆڕاندا ئامادەیی خۆیان له پشتیوانیکردن و سەرپێخستنی کارەکان و پێکهێنانی دامەزراوەکە دەربڕیوە، بۆ ئەو مەبەستە بە ڕاوێژ و گفتوگۆی بەشێك لە ئافرەتانی گۆڕان و بە هەمەهانگی ژووری یاسایی گۆڕان ڕەشنوسێك بۆ پەیڕەوی ناوخۆیی دامەزراوەكە ئامادەكراوە.

گرنگی و پێوستی پێکهێنانی دامەزراوەی ئافرەتان بەچەند خاڵێك  بۆ بەرێزتان دەخەینەڕوو:

یەکەم/ تێگەیشتن و ئاگاداربوون لە كێشەكانی ئافرەتانی بزووتنەوەكە و بایەخپێدانیان و گوێگرتن و بەدەنگەوەچوون لە خواست و داواکاری  ئەو ئافرەتانەی لە ئۆرگانە جیاجیاکاندا کاری ڕێکخراوەیی و سیاسی دەکەن.
دووەم/ بە ڕێگا و میکانیزمی جیاجیا دامەزراوەی ئافرەتان بەپێی كارنامەی دامەزراوەكە ئەركی کردنەوەی خولی پەروەردەیی سیاسی و ڕۆشنبیری و ڕێکخراوەیی و هونەری سەرکردایەتیکردن بۆ ئافرەتان لە ئەستۆ دەگرێت.
سێیەم/ دامەزراوەی ئافرەتان پەیوەندی و هەمەهانگی لەگەڵ  ڕێکخراو و دامەزراوەکانی پارت و گروپە سیاسی و مەدەنییەکانی ناوە و دەرەوەی هەرێمی کوردستان برەو و پەرەی زیاتر پێبدات.
لەکۆتاییدا هیوادارین بە هەوڵی لێبڕاوانە و هیمەتی گۆڕانخوازان بزووتنەوەکەمان بکەینەوە هێزێکی کارا و کاریگەر بۆ ئاشتکردنەوەی خەڵک و گەڕانەوەی هیوا و متمانەی سیاسی لەنێوان بزووتنەوەی گۆڕان و هاوڵاتییانی کوردستاندا..

چوارەم/ ئەرکی دامەزراوەی ئافرەتانی بزووتنەوەی گۆڕان هاندان و جۆشدان و کاراکردنەوەی ڕۆڵی ئافرەتان بە ژیانی ڕێکخراوەیی و کایەیی سیاسەتکردن و توندتۆڵکردنی پەیوەندی نێوان ڕایەڵە و گروپەکانی فشار و ڕووبەری گشتی و کۆمەڵگە و بە هێزکردنەوەی بڕوا و ئینتیمای نیشتمانی و نەتەوەیی.

دووبارە بەهیوای سەرکەوتن بۆ بزووتنەوەی گوڕان..
زۆر سوپاس بۆ هەموو لایەک..