گۆڕان لە فینلاند: پشتیوانی یەكدەنگی و كاری پێكەوەیین بۆ دۆزی رەوای گەلی كورد

وەفدی بزوتنەوەی گۆڕان لە رێوڕەسمێكدا لە فینلاند جەخت لەسەر پێویستی یەکڕیزی و یەکدەنگی و یەكگوتاری گەلی کورد و پێكەوەیی پارتە سیاسیەكان لە پرس و مافە نەتەوەیی و نیشتمانیەكان دەكاتەوە.

لە ڕێوڕەسمی (٢٢) هەمین ساڵرۆژی دامەزراندنی پارتی ژیانی ئازادی کوردستان کە لە وڵاتی فینلاند ئامادەبوونی نوێنەرانی ژمارەیەک لە لایەنە سیاسیەكان و چالاکوانانی کورد بەڕێوەچوو، هەریەك لە هەردی جەلال بەرپرسی پەیوەندی کۆمەڵایەتی ئەنجومەنی فینلاند و خەسرەو جەلال، بازنەوانی هێلسینکی، بە نوێنەرایەتی بزووتنەوەی گۆڕان بەشداریان تێداكرد و لە وتارێكدا كە بەناوی گۆڕانەوە پێشكەشیان كرد جەختیان كردەوە لەسەر پێویستی یەکڕیزی و یەکگرتوویی گەلی کورد و گرنگی هاوکاریکردن و هاوپەیوەندی نێوان هێزە سیاسییە کوردییەکان لە پێناو پاراستنی مافە نەتەوەییەکان و گەیشتن بە ئامانجە گەورەکانی گەلی کورد. هەروەها، ئاماژە بە قوربانی و خەباتی بەردەوامی گەلەکەمان کرا کە بەهێزی ویستی نەتەوەیی و ئازادیخوازیدا دەست پێدەکات و بەردەوام دەبێت.

لە رێوڕەسمەكەدا بواری گفتوگۆ و بەهێزكردنی پەیوەندی نوێنەرایەتی لایەنە سیاسیەكان ڕەخسا و ئەوە دووپات كرایەوە كە هەمووان پاڵپشتی پێداویستی و داخوازیەكانی ڕەوەندی كوردی بكەن.