پارتى دیموکراتى کوردستان پەیامێک ئاڕاستەى بزوتنەوەى گۆڕان دەکات
28/07/2019
پارتى دیموکراتى کوردستان لە (10)یەمین ساڵیادى بەشداریى بزوتنەوەى گۆڕان
لە پڕۆسەى سیاسى پەیامێک ئاڕاستەى رێکخەرى گشتى و بزوتنەوەکە دەکات و تێیداهاتوە؛ رۆڵی بزوتنەوەكەتان و بەرنامە و
هەوڵەکانى بۆ بەهێزكردنی قەوارەی سیاسی هەرێم و بنەماكانی ئازادی و دیموكراسی مایەى
دڵسۆزیتانە.
دەقى پەیامەکە:
بەڕێزان/ رێكخەری گشتی و ئەندامانی جڤاتی گشتی و نیشتیمانی لە بزوتنەوەی
گۆڕان..
بە بۆنەی (10)ـیەمین ساڵیادی دامەزراندنی بزوتنەوە
تێكۆشەرەكەتان، گەرمترین پیرۆزبایی لە ئێوە و ئەندام و لایەنگرانتان دەكەین،
هیوادارین هەر بەردەوام و سەركەوتو بن لە خەبات و تێكۆشانتان بۆ سەرخستنی دۆزی
گەلەكەمان و بەدیهێنانی گشت مافە رەواكانی.
رۆڵی بزوتنەوەكەتان و بەرنامە و هەوڵ و كار
و چالاكییەكانی بۆ بەهێزكردنی قەوارەی سیاسیی هەرێمی كوردستان و دامودەزگا
شەرعییەكانی و بنەماكانی ئازادی و دیموكراسی لە پێناو دوارۆژێكی گەشتر، مایەی
خۆشحاڵی و ئاماژەی دڵسۆزیتانە بۆ بەدیهاتنی مافە هاوبەشەكانمان.
ئێمە كاتێك ئەو یادە دەكەینەوە، هاوكات
رەوشی گرنگ و هەستیاری ئەمڕۆی هەرێم و ناوچەكە، واپێویست دەكات زیاتر سور بین
لەسەر هاوخەباتی و یەكڕیزی و تەبایی بۆ پاراستنی دەسكەوتەكان و رەوشی ئارام و سەقامگیریی
هەرێمی كوردستان و بەدیهێنانی ئامانجە درێژخایەنە نیشتیمانی و نەتەوەییەكانمان.
هیوادارین بە هەمو لایەك هەوڵ بدەین بناغەی
ئەو هاوپەیمانییەتی و هەماهەنگییەی نێوانمان زیاتر پتەوتر و بەهێزتر بكەین لە
پێناو بەرژەوەندیی گشتیی گەلەكەمان و تەختكردنی كۆسپ و تەگەرەكان و چارەسەركردنی
گیروگرفت و كێشەكان و دابینكردنی ئایندەیەكی رۆشنتر و گەشتر بۆ گەلەكەمان.
جارێكی دیكە پیرۆزباییتان لێدەكەین و هەر
سەرفرازو سەركەوتو بن...
مەكتەبی سیاسیی پارتی دیموكراتی كوردستان
25/7/2019