رێکخەری گشتی: بەشدار و هاوبەشی راستەقینە دەبین بۆ ئەنجامدانی چاکسازیی

رێکخەری گشتی بزوتنەوەی گۆڕان جەختی کردەوە، بەشدار و هاوبەشی راستەقینەی حکومەت دەبن بۆ روبەڕوبونەوەی گەندەڵی و ئەنجامدانی چاکسازیی لەسەرجەم بوارەکاندا.

لە کۆبونەوەی ئەمڕۆی خانەی راپەڕاندن لەگەڵ هەڵسوڕاوانی بزوتنەوەی گۆڕاندا کە لە هۆڵی میدیای شاری هەولێر بەڕێوەچو، عومەر سەید عەلی رێکخەری گشتی بزوتنەوەی گۆڕان رایگەیاند: بەشداریی کردنی گۆڕان لە کابینەی نوێی حکومەت بۆ جیبەجێکردنی بەرنامەی چاکسازییە و بۆ ئەو مەبەستەش پاڵپشتی تەواوی حکومەت دەکەین.

وتیشی :"بۆ جێبەجێکردنی کارنامەی حکومەت و ئەو بەرنامە چاکسازییە لەسەری رێکەوتوین دەرفەتی تەواو دەدەینە حکومەت، ئەگەر لەوکاتەدا چاکسازیی جێبەجێنەکرا و چاکسازی راستەقینە ئەنجامنەدرا، ئەوکاتە ئێمە قسەی خۆمان دەبێت و هەڵوێستی گۆڕان بۆ کۆمەڵانی رایگشتی رون دەکەینەوە".

رێکخەری گشتی جەختی لەسەر ئەوەکردوە کە پێویستە لایەنە سیاسییەکان بەتایبەتی لایەنە بەشدارەکانی حکومەت تەبا و براو گونجاوبن پێکەوە، بۆ بەگژداچونەوەی گەندەڵی و خزمەتی کۆمەڵانی خەڵکی کوردستان و چەسپاندنی دادپەروەری و سەروەری یاسا.

سەبارەت بە پەیوەندیەکانی نێوان هەولێر و بەغدا و چارەسەرکردنی کێشەکانی نێوان هەردولا، عومەر سەید عەلی رێکخەری گشتی بزوتنەوەی گۆڕان رایگەیاند: بەپێویستی دەزانین و گفتوگۆمان کردوە لەسەر ئەوەی وەفدێکی دانوستان پێکبهێنرێت، کە رەنگدانەوەی لایەنەکانی دەسەڵات و ئۆپۆزسیۆن بێت، لەگەڵ کەسانی پسپۆڕ و شارەزا، بۆ دانوستان لەگەڵ بەغدا و ئەو وەفدە وەفدێکی هەمیشەیی بێت، بونی ئۆپۆزسیۆنیش بۆ ئەوەیە  کە دانوستان و گفتوگۆ و پەیوەندییەکان لەگەڵ بەغدا، پرس و ئەرکێکی نیشتیمانی و نەتەوەییە و ئەرکی سەرجەم حیزبەکانە.

هەولێر/ بڕیار نامیق