هۆشیار عەبدوڵا: تاکە چارەسەر لە عێراق بنەبڕکردنى گەندەڵى و پشکپشکێنەیە

30/10/2019

ئەندامێکی پەرلەمانی عێراق رایدەگەیەنێت؛ ئەوەی ئێستا لە عێراق رودەدات، راپەڕینی خەڵکە دژی دەسەڵات و گەندەڵی، دەشڵێت: تاکە چارەسەر بنبڕکردنى گەندەڵى و نەهێشتنى پشکپکشێنە و گۆڕانکارییە لە کۆی پڕۆسەى سیاسى و حکومڕانى.

هۆشیار عەبدوڵا، ئەندامی ئەنجومەنی نوێنەرانی عێراق لەبارەی دواین پێشهاتەکانى دۆخی سیاسی ئێستای عێراق و خۆپشاندان و ناڕەزایەتییەکان بە (سبەی) وت: گەندەڵی و نەبونی خزمەتگوزاریی هاوڵاتیانی هێناوەتە سەر شەقام و کوژران و برینداربونى ژمارەیەکى زۆر لە هاوڵاتیانى لێکەوتوەتەوە، بۆیە ئەوەی ئێستا رودەدات تەنها خۆپیشاندان نییە، بەڵکو راپەڕینێکە دژ بە دەسەڵات و گەندەڵی و ناعەدالەتی.

لەئێستادا بەشێک لە داواکارى خۆپیشاندەران و هەوڵى هەندێک لە کوتلەکانى پەرلەمان و لایەنە سیاسیەکان بەئاڕاستەى گۆڕینی کابینەى حکومەتە.

سەبارەت بەوەى ئایا گۆڕینى حکومەت چارەسەری دۆخى عێراق و داواکارییەکانى خۆپیشاندەران دەکات، هۆشیار عەبدوڵا رونیکردەوە کە تەنها گۆڕینی حکومەت چارەسەر نییە، بەڵکو دەبێت کۆی پڕۆسەکە گۆڕانکاری بەسەردا بێت و قۆناغی پشکپشکێنە کۆتایی پێبێت و گەندەڵى بنەبڕ بکرێت.

هەروەک جەخت دەکاتەوە لەوەى کە کێشەی گەورەی عێراق، گەندەڵی و پشکپشکێنەیە، کە ئەوەش وایکردوە کەسانی ناو حیزبەکان پلە و پۆستە باڵاکان بەڕێوەببەن و "نەتوانن رۆڵی باشیان لە بەڕێوەبردنی وڵاتدا هەبێت".

سەبارەت بە دواین بڕیارەکانى پەرلەمان بەتایبەت کەمکردنەوەی موچەی پلە باڵاکان و نەهێشتنى دەرماڵە داراییەکانیان، ئەو پەرلەمانتارە دەڵێت:"ئەوە هەنگاوێکى گرنگە، بەڵام کێشەکە لەوە گەورەترە کە تەنها لە پرسی موچەدا کورتبکرێتەوە، چونکە بەهۆى گەندەڵى و گرێبەستەکانەوە دەیان ملیۆن دۆلار بەهەدەر دراون و خەڵک دژی ناعەدالەتی و گەندەڵی و کەمی خزمەتگوزاری رژاوەتە سەر شەقامەکان".