ژوری رۆژنامەوانی: خۆڕێکخستنەوەی گۆڕان بەردەوام دەبێت

ژوری رۆژنامەوانی بزوتنەوەى گۆڕان رایدەگەیەنێت؛ رۆژى شەممە جڤاتى نیشتیمانى کۆبونەوەى تەواوکارى ئەنجام دەدات و خۆڕێکخستنەوەی گۆڕان بەردەوام دەبێت.

ئەمڕۆ پێنجشەممە، ژورى رۆژنامەوانى بزوتنەوەى گۆڕان راگەیەندراوێکى لەبارەى ناوەڕۆکى کۆبونەوە تەواوکارییەکەى جڤاتى نیشتیمانى بڵاوکردەوە و تێیدا هاتوە؛ تەوەرى سەرەکى کۆبونەوەى جڤاتى نیشتیمانى گفتوگۆکردن دەبێت لەبارەى دۆخى رێکخراوەیى و درێژەدان بە هەنگاوەکانى خۆڕێکخستنەوەى گۆڕان بەتایبەت پرسى هەڵبژاردنە ناوخۆییەکان و ئامادەکارى بۆ کۆنفڕانسى نیشتیمانى.

شەممەى رابردو جڤاتى نیشتیمانى بزوتنەوەى گۆڕان کۆبوەوە و چەند گفتوگۆى لەبارەى چەند تەوەرێکەوە کرد و دواتر بڕیارى لەبارەوە درا، ئەوانیش هەڵبژاردنى سێ رێخکەرى ژورەکانى (رۆژنامەوانى، حکومەت و ناوچە دابڕێنراوەکان) و دروستکردنى ژورى توانستى مرۆیى و هەنگاوەکانى خۆڕێکخستنەوە و خۆ نوێکردنەوە. دواى کۆبونەوەکەش برزۆ مەجید، ئەندامى خانەى راپەڕاندن لەگەڵ خستنەڕوى ناوەڕۆکى کۆبونەوەکە و بڕیارەکان، رایگەیاند کۆبونەوەکە بە کراوەیى هێڵراوەتەوە و رۆژى شەممە (16/11/2019) جڤاتى نیشتیمان-ى دوبارە کۆدەبێتەوە.