د.یوسف محەمەد: پێویستە نەوت لە گرێکوێرەی پەیوەندییەکانەوە بکرێتە دەرچەی رێککەوتن لەگەڵ بەغدا

13/04/2020


 سازدانی: بەهادین یوسف

د.یوسف محەمەد سادق، سەرۆکی فراکسیۆنی گۆڕان لە ئەنجومەنی نوێنەرانی عێراق، لە چاوپێکەوتنێکی تایبەتدا، ئەولەویەتی کورد بۆ دانوستانەکانی پێکهێنانی کابینەی نوێی حکومەت بە سەرۆکایەتی مستەفا کازمی دەخاتەڕو و دەڵێت: پێویست دەکات نەوت لە گرێکوێرەی پەیوەندی نێوان هەرێمی کوردستانەوە لەگەڵ بەغدا بکرێتە، دەرەچە و دەروازەی رێککەوتن لەگەڵ بەغدا لەسەر کێشەکانی دیکە، بەتایبەتی کێشەی خاک.

سەرۆکی فراکسیۆنی گۆڕان بەپێویستی دەزانێت: هەرێمی کوردستان جەخت لەسەر رێککەوتنێکی هاوسەنگ بکاتەوە، لەگەڵ بەغدا لەسەر نەوت و بودجە، چارەسەرکردنی کێشەی کەرکوک و ناوچە جێناکۆکەکانیش بە یەکێکی دیکە لە پێشمەرجەکانی هەرێمی کوردستان دادەنێت بۆ دانوستانەکانی پێکهێنانی حکومەتی نوێ.

- دوای شکستی دو کاندیدی پێشو بۆ پێکهێنانی کابینەی نوێ، کەسی سێیەم کە مستەفا کازمییە راسپێردرا بۆ پێکهێنانی کابینەی نوێی حکومەتی عێراق، پێتانوایە کازمی لەو ئەرکەکەی سەرکەوتو بێت و بتوانێت کابینەکەی پێکبهێنێت؟

د.یوسف محەمەد: ئەوەی جیاوازە ئەمجارە لە دو راسپێردراوەکەی دیکە ئەوەیە کە واهەست دەکرێت شێوەیەک لێکتێگەیشتنی ئیقلیمی و نێودەوڵەتی لەسەر راسپاردنی مستەفا کازمی هەبێت، بەتایبەتی لەنێوان ئێران و ئەمەریکا کە دو کارەکتەری سەرەکیین لە عێراق، هەمیشە سەرۆک وەزیران لە عێراق پێویستی بە لێکتێگەیشتنی ئەو دو دەوڵەت هەبوە لە دوای روخانی رژێمی پێشوەوە، ئەمە جگە لەوەی کازمی بە پێی ئەو ئامادەبونەی لەکاتی راسپاردنەکەیدا لە کۆشکی سەلام هەبو، زۆربەی هەرە زۆری هێزە شیعەکان پشتیوانیی دەکەن، ئەوەی بینیمان زۆربەیان ئامادەبون لە مەراسیمی راسپاردنەکەی بۆ پێکهێنانی حکومەت، هەڵبەت تێگەیشتنێکی سەرەتایی کوردو سوننەش هەیە بۆ راسپاردنی.

هەندێک لە هێزەکانی کورد و سوننەش، پێشوەخت پشتیوانی خۆیانیان بۆ راگەیاندوە، هەمو ئەمانە و سەرباری ئەوەی هەست بە مەترسی دەکرێت دەربارەی دۆخی ئابوریی عێراق، بەتایبەت لە دوای دابەزینی گەورەی نرخی نەوت و هاتنی پەتا و درمی کۆرۆنا، ئەمەش فشارێکی لەسەر هەموان دروست کردوە کە هەوڵی پێکهێنانی حکومەت بدەن لە نزیکترین دەرفەتدا، بەڵام هەمو ئەمانە بەمانای کۆتایی نایات، هەمیشە لە عێراق تا سەعاتەکانی کۆتایی بواری دروستبونی موفاجەئەی تێدایە.

- پێشتر کۆسپ هاتە بەردەم محەمەد عەلاوی و عەدنان زورفی هەموان پشتیوانیان نەبون، وەک خۆت دەڵێیت ئێستا هەست دەکرێت کۆدەنگییەک لەسەر کازمیى هەیە، بەڵام ئایا لەکاتی سەرپێکەوتنی حکومەتەکەی هەمان کێشەى عەبدولمەهدى روبەڕوی کازمی نابێتەوە، بەتایبەتی کە هیچ کوتلەیەکى بەهێز یان فراکسیۆنی گەورەی پەرلەمانیى نییە کە پشتیوانى بکات؟

د.یوسف محەمەد: بەدڵنیاییەوە هەمان ئەو کێشانەی روبەڕوی دکتۆر عادل عەبدولمەهدی بوەوە، روبەڕوی ئەمیش دەبێتەوە، بەتایبەتی هەندێک لە کێشەکانی عێراق کێشەی بۆماوەیین، ناگەڕێتەوە بۆ سەردەمی حکومەتەکەی عەبدولمەهدیش، دەگەڕێتەوە بۆ ئەو ماوە دوردرێژەی حکومڕانی لە عێراق.

بەڵام ئەگەر کاندیدی راسپێردراو بتوانێت پەیوەندییەکی باش لەگەڵ فراکسیۆنەکانی پەرلەمان و پەرلەمان دروست بکات، زو زو سەردانی پەرلەمان بکات و پەرلەمان و لە رێگەی پەرلەمانەوە خەڵکیش بخاتە ناو وێنەی دۆخی عێراق، لەگەڵیشیدا هەوڵ بدات بۆ چارەسەرکردنی کێشەکانی عێراق بەتایبەتی کێشە ئەمنی و ئابورییەکانی عێراق، رەنگە بتوانێت زاڵ بێت بەسەر ئەو کێشانەدا.

- بەڕێزت باس لەوەکرد کە پێشوەختە کۆدەنگیی بەشێک لە لایەنەکان بە کورد و سونەش هەیە لەسەر راسپاردنی کازمی، هەڵوێستی فراکسیۆنی گۆڕان بەرامبەر کاندیدی راسپێردراو چییە؟

د.یوسف محەمەد: خۆشحاڵین کە دواجار لایەنە شیعەکان گەیشتونەتە تێگەیشتنی هاوبەش بۆ راسپاردنی کەسێک بۆ پێکهێنانی حکومەت، بەڵام پشتیوانی ئێمە بۆ پێکهێنانی حکومەت بەندە بە چارەسەرکردنی کێشەکانی نێوان هەرێم و بەغدا بەپێی دەستور، بەتایبەتی ئەوەی پەیوەندیدارە بە بودجە و موچەی خەڵکی هەرێمی کوردستان و جیاکردنەوەی کێشە و ململانێیەکان لە موچە و قوتی خەڵک، هەروەها پەیوەندیدار دەبێت بە روئیای کەسی راسپێردراوە بۆ چۆنیەتی چارەسەرکردنی کێشەی ناوچە دابڕێنراوەکان، بەڕاستی پێویست دەکات بکرێت بە ئەولەیەتی دانوستان لەگەڵ کاندیدی راسپێردراو بۆ پێکهێنانی حکومەتی نوێی عێراق، چونکە دۆخی ئەو ناوچانە لەهەر کاتێکی تر خراپترە، هەروەها پشتیوانیی ئێمە و دەبێت پشتیوانی هەمو کوردیش پەیوەندیداربێت بە بەرەنگاربونەوەی گەندەڵی و رێگریی لە بەهەدەردانی سامانی وڵات، بە هەمانشێوە پیشەیی و بێلایەنکردن و هاوسەنگ کردنی هێزە چەکدارەکانی عێراق و دورخستنەوەیان لە دەستێوەردانی سیاسی، بێلایەنکردنی عێراق لە ململانێ ئیقلیمی و نێودەوڵەتییەکان، رەچاوکردنی سیاسەتێکی هاوسەنگ لەو ململانێیانە، لەگەڵ ئەوەشدا پێداچونەوە بە کۆمیسیۆنی باڵای هەڵبژاردنەکان و بەپیشەیی و بێلایەنکردنی، دانانی خەڵکی پیشەیی و سەربەخۆ لەو کۆمیسیۆنە، تەنانەت پێداچونەوە بە دانانی ئەنجومەنی کۆمیسیاران.

ئێمە لەو روەوە لە دادگای باڵای فیدراڵییش سکاڵامان تۆمارکردوە سەبارەت بە چۆنیەتی دانانی ئەندامانی ئەنجومەنی کۆمیسیاران، بە هەمانشێوەش هەموارکردنەوەی یاسای هەڵبژاردنەکانی ئەنجومەنی نوێنەرانی عێراق، بەشێوەیەک کە دادپەروەریی لە نوێنەرایەتیکردنی گەلانی عێراق رەچاوبکات.

- باسی چارەسەرکردنی کێشەکانی نێوان هەولێر و بەغدات کرد لەسەر بنەمای دەستوری عێراق، هەرێمی کوردستان چەندین کێشەی لەگەڵ حکومەتی ناوەند هەیە کە بەشێکیات ئەزەلیین، بەڵام لەماوەی (17) ساڵی رابردودا زۆربەی ئەو کێشانە بە هەڵپەسێردراوی ماونەتەوە، لەکاتێکدا لە زۆربەی دانوستانەکانی پێشوی پێکهێنانی کابینەکانی حکومەتی عێراق، کەسی راسپێردراو بەڵێنی چارەسەرکردنی داون، بەڵام کێشەکان هەر وەکخۆیان ماونەتەوە هەندێک بەرەو دواوەش چون، هەست دەکرێت کازمی روئیایەکی جیاوازی هەبێت بۆ چارەسەرکردنی ئەو کێشانە؟

د.یوسف محەمەد: تائێستا هیچ دانوستانێک، لایەنی کەم لەلایەن ئێمەوە نەبوە تابزانین کە روئیایەکی هەیە بۆ چارەسەرکردنی ئەو کێشانە، پێموایە پشتیوانی کردنی پێشوەختەی بێمەرج بۆ هەر کاندیدێک کارێکی دروست نییە، پێویست دەکات لە ئەنجامی دانوستانەوە بگەینە ئەو ئەنجامەی کە پشتیوانیی دەکەین یان نا؟.

پێمانخۆشە لایەنە شیعییەکان گەیشتوەنەتە ئەو لێکتێگەیشتنەی کە مستەفا کازمیی کاندید بکەن بۆ پێکهێنانی حکومەت، لەگەڵ ئەوەشدا پێویست دەکات پشتیوانیی کردنی لەلایەن کورد و فراکسیۆنە کوردستانییەکانەوە ببەسترێتەوە بەو بابەتانەی باسمانکرد.

بەڕاستی ئێمە ئەزمونێکی خراپمان هەیە لە دەستێوەردان لە ململانێیەکانی ناو ماڵی شیعە بەتایبەتی لە ڤیتۆ دانان لەسەر کەسێک و پشتیوانیکردنی رەهای کەسێک لە پێکهێنانی حکومەتدا، وەک ئەوەی لە ساڵی (2006) هەندێک لە لایەنە سەرەکییەکانی کورد کردیان بە مەرج کە دەبێت جەعفەری بگۆڕدرێت بە مالیکی، لە ساڵی (2014) ئەو لایەنانە کردیان بە مەرج کە پێوستە مالیکی بگۆڕدرێت بە عەبادی، لە ساڵی (2018) هەندێک لە هێزەکانی هەرێمی کوردستان کردیان بە مەرج کە پێویست دەکات عەبادی بگۆڕدرێت بە کەسایەتییەکی تر، لە ئەنجامی ئەم مەرج دانان و ڤیتۆ دانانانە لەسەر کەسەکانی تر، ئەو هێزە سیاسییانەی ئەمانەیان کرد، بەشێک لە کێشە سەرەکییەکانی هەرێمی کوردستانیان کردوە بە قوربانیی ئەوەی کە کەسی سەرۆک وەزیران بگۆڕدرێت، پێمانوایە ئەوە کارێکی باش نییە، دەبێت هەمو پشتیوانییەک ببەسترێتەوە بە ئەنجامی دانوستانەکانەوە.

- بۆ ئەوەی ئەو ئەزمونانەی پێشو دوبارە نەبێتەوە، پێویست دەکات ئەولەویەتی هەرێمی کوردستان چی بێت بۆ پشتیوانی کردن لە کازمی، یان لە دانوستانەکانی لەگەڵ سەرۆک وەزیرانی راسپێردراو کۆی داواکارییەکانی بە یەک پاکێج بخاتە سەر مێزی دانوستانەکان، بە چی میکانیزمێک دانوستان لەگەڵ سەرۆک وەزیرانی راسپێردراو بکرێت بۆ پێکهێنانی کابینەکەی، تابتوانێت بەشێکی زۆر مافە دەستورییەکانی خەڵک و هەرێمی کوردستان دەستەبەر بکات؟

د.یوسف محەمەد: ئەمە پرسیارێکی گرنگە، پێویست دەکات هەرێمی کوردستان ئەولەویەتی لەناوخۆی خۆی، لە پرسی دانوستانی پێکهێنانی حکومەتی نوێی عێراق رێکبخاتەوە، بەشێوەیەک خۆی ئامادەبکات بۆ ئەو ئاڵنگارییانەی لەبەردەمدایە لە قۆناغی داهاتودا.

پێش هەمو شتێک پێویستە هەرێمی کوردستان جەخت لەسەر رێککەوتنێکی هاوسەنگ بکاتەوە، لەگەڵ بەغدا لەسەر نەوت و بودجە، چونکە ئێستا نەوت بوەتە گرێگوێرەیەکی گەورە لە پەیوەندیی نێوان هەرێم و بەغدا، بەتایبەتی لە دوای سیاسەتی شکستخواردوی ئابوری سەربەخۆ کە پشت ئەستوربو بە نەوت و هەناردەکردنی، ئەمە کێشەی گەورەی بۆ هەرێمی کوردستان و پەیوەندییەکانی لەگەڵ حکومەتی فیدراڵی، ئەم سیاسەتەی نەوت بوە هۆی پەراوێزخستنی زۆربەی کێشەکانی کورد لەگەڵ بەغدا بەتایبەتی کێشەی خاک، ئەم سیاسەتە بوە هۆی پاشەکشێی ئابوری و سیاسی هەرێمی کوردستان، لە پێش فرۆشتنی سەربەخۆی نەوت، هەرێمی کوردستانی (17%)ی بودجەی عێراقی لە هەمو ساڵەکانی پێشوتر هەبو، ئەمەش وایکرد ئاوەدانییەکی باش لە هەرێمی کوردستان بێتە کایەوە، هەمو پڕۆژە گرنگەکانی لە کوردستان کراون، دەگەڕێتەوە بۆ ئەوکاتانەی کە هەرێمی کوردستان (17%)ی بودجەی عێراقی وەردەگرت، زۆربەی پڕۆژە گرنگەکان ئەگەر هەبوبێت هی ئەوکاتەیە سەقامگیرییەکی سیاسی و ئابوری لە هەرێمی کوردستان هەبو، بە فرۆشتنی نەوتی سەربەخۆ ئەو پەیوەندییە لەگەڵ عێراق تێکچو، باری ئابوری هەرێمی کوردستان پاشەکشەی گەورەی بەخۆیەوە بینی و بوە هۆی هەژارکردنی زیاتر خەڵکی هەرێمی کوردستان، زیادبونی گەندەڵیی و بەهەدەردانی بەشێکی سامانی گشتی هەرێمی کوردستان، ئەوەش بەهۆی ناڕونیی سیاسەتی نەوتی هەرێمەوە، ئەمە بوە هۆی بەهەدەردانی سامانی نەوەکانی داهاتو، ئەو نەوتەی لەژێر خاکی هەرێمی کوردستانە، موڵکی ئەم نەوەیەی ئێستاش نییە بە تەنها، نەک موڵکی دەسەڵاتدارانی هەرێم بێت کە بەشێکی زۆری بەهەدەر دراوە و هەرزانفرۆش کراوە، ئەمە پێویست دەکات پێداچونەوەی وردی بۆ بکرێت، پێویست دەکات نەوت لە گرێکوێرەی پەیوەندی نێوان هەرێمی کوردستانەوە لەگەڵ بەغدا بکرێتە، دەرەچە و دەروازەی رێککەوتن لەگەڵ بەغدا لەسەر کێشەکانی دیکە، بەتایبەتی کێشەی خاک.

لەبری ئەوەی پێداگریی لەسەر سیاسەتی هەڵەی نەوت بکرێت، لە ئەنجامی پێداگریی لەسەر ئەوە، کێشەکانی دیکەی وەک خاک پەراوێزبخرێت، رێککەوتنی نەوتی نێوان هەرێم و بەغدا بکرێتە دەرچەیەک بۆ چارەسەرکردنی کێشەکانی نێوان هەرێم و بەغدا، بەتایبەتی تریش کە نەوت تادێت سەنگ و قورسایی کەمدەکات و نرخی دادەبەزێت و بەهاکەی لەدەست دەدات، بەتایبەتی دوای بەرهەمهێنانی نەوتی شێڵی ئەمەریکی و زیادبونی ئەڵتەرناتیڤ بۆ نەوت وەک سەرچاوە وزە، پێویستە رێککەوتن لەسەر نەوت هەردولا جێبەجێی بکەن، نەک وەک ئەو رێککەوتنەی لە سەرەتای ساڵی (2019) لە بواری نەوت و بودجە لەنێوان هەرێم و بەغدا ئەنجامدرا و هەردولا پابەندبن بە رێککەوتنەکەوە.

بابەتێکی دیکە کە پێویستە ئەولەیەتی هەرێمی کوردستان بێت بەتایبەتی لە دانوستانەکانی پێکهێنانی حکومەت، پێویست دەکات پرسی کەرکوک و ناوچە جێناکۆکەکان بێت، دۆخی کورد و پێکهاتەکانی دیکەی ئەم ناوچانە یەکجار خراپە، لە خراپترین دۆخیدایە بەتایبەتی لە دوای شەڕی داعش و پەلاماردانی داعش بۆ ئەو ناوچانە، لە روی ئەمنییەوە دۆخی ئەو ناوچانە خراپن، زو زو داعش هێرش دەکاتە سەر گوندەکان و دانیشتوانی ئەو ناوچانە و خەریکی خۆڕێکخستنەوەیە لەو ناوچانە، هەڵبەت گومانی ئەوە دەکرێت هێزی دیکەی نافەرمی و میلیشایی لەو ناوچانە دروست بون و پەلاماری خەڵک دەدەن.

کوردیش دۆخی باش نییە لەو ناوچانە، سەرلەنوێ سیاسەتی تەعریب دەستی پێکردوەتەوە، پێویست دەکات چارەسەرکردنی ئەو پرسە ئەولەویەت بێت، مادەی (140) بچێتەوە سەر رێچکەی خۆی، لیژنەکانی پەیوەندیدار بەو مادەی دەست بەکارببنەوە، ئەو بڕیارانەی پەیوەستن بە تەعریب چارەسەر بکرێن، لە تەواوی ناوچە جێناکۆکەکان نەک تەنها کەرکوک.

ئەمە پەیوەندیدار نییە بە سیاسەتی بەغدا بەرامبەر ناوچە جێناکۆکەکان، پەیوەندیدارە بە سیاسەتی پارتی و یەکێتی لەو ناوچانە، پێویست دەکات پارتی و یەکێتی وەک دو هێزی سەرەکیی لەو ناوچانە، سیاسەتی خۆیان بەرامبەر کەرکوک و ناوچە جێناکۆکەکان بگۆڕن ئەو سیاسەتە حیزبیانەی کە لە رابردودا پەپڕەویان کردوە بیگۆڕن بەتایبەتی کە تەنها گرنگییان بە نەوت دەدا لەو ناوچانە، گرنگی بە خزمەتگوزاریی بدرێت بە هەمو پێکهاتە سەرەکییەکانەوە، ئەو دو لایەنە سیاسەتێکی نیشتیمانی پەیڕەو بکەن و گرنگی بە هێنانەکایەی هەماهەنگی و هاوبەشی لەنێوان سەرجەم پێکهاتەکان بدەن، سیاسەتی کەمەندکێشکردن لەلایەن هەرێمی کوردستانەوە بۆ پێکهاتەکانی دیکەی ناوچە جێناکۆکەکان پەیڕەوبکرێت، نەک سیاسەتی پاڵپێوەنان.

بەهەمانشێوە کورد لەم دانوستانەکاندا سەقامگیریی عێراقی بەلاوە گرنگ بێت، هەڵەن ئەوانەی پێیانوایە ئەگەر عێراق سەقامگیر نەبێت بۆ هەرێمی کوردستان باشە، نەهێنانە کایەی ناسەقامگیریی سیاسی و ئەمنی و ئابوری لە عێراق ئەمجارە دەرفەتی دەستێوەردانی دەرەکی زیاتر دەکات، پێویست دەکات پەند لە داگیرکردنی عەفرین و بەشێک لە ناوچەکانی رۆژهەڵاتی فورات وەربگرین، مەترسیی هاوشێوە لەبەردەرگامانە، چونکە ویلایەتی موسڵ و میساقی میللی زۆر لە جاران زیاتر لە ئەجێندای سیاسەتی دەرەوەی تورکیادایە، ئەمە هەرێمی کوردستان دەکاتە مەیدانی ململانێی سیاسی خوێناوی، بەهەمانشێوە پێویست دەکات خۆمان بۆ ئەگەرەکانی پاش کۆرۆنا و دەرهاویشتەکانی کۆرۆنا و قەیرانی ئابوری، لەسەر سیاسەتی نێودەوڵەتی و ئیقلیمی لە ناوچەکە ئامادەبکەین، ئەگەر و سیناریۆ جیاوازەکانی پەیوەندیدار بەم مەسەلەیە لەبەرچاو بگرین و هەوڵ بدەین لە رێگای بەشدارییەکی کارا لە حکومەتی داهاتوی عێراق خۆمان بەدور بگرین لەهەر مەترسییەک کە دەرهاویشتەکانی قەیرانی ئابوری لە ناوچەکە بیهێنێتە کایەوە.

پێویست دەکات، لە دانوستانەکانی ئەمجارە هەڵە و کەموکورتییەکانی دانوستانی پێشوش لەبەرچاو بگیرێت، لە مەسەلەی پێکهێنانی حکومەتەکەی عەلاوی بەتایبەتی ئەوەی کە مانەوەی کەسێک لە حکومەت کۆی دانوستانەکان پەکبخات، پێویست دەکات ئەمە چارەسەر بکرێت و بە ئەجێندایەکی نیشتیمانی و دور لە بەرژەوەندی شەخسی و حیزبی ئەنجامبدرێت، لە قازانجی خەڵکی هەرێمی کوردستان، نەک لە قازانجی کەس و حیزبێک.

- دوا پرسیارمان ئەوەیە، ئەو حکومەتەی بڕیارە کازمی پێکیبهێنێت حکومەتێکی کاتییە و بۆ ئەرک و قۆناغێکی دیاریکراوە، یان دەکرێت کابینەکەی وزاریی هاوتەریب بێت لەگەڵ ئەم خولەی پەرلەمانی عێراق؟

د.یوسف محەمەد: لە دەستوری عێراقدا شتێک نییە بەناوی حکومەتی کاتی یان راگوزەر، هەڵبژاردنی پێشوەختە بە هەڵوەشاندنەوەی ئەنجومەنی نوێنەرانی عێراق (پەرلەمان) ئەنجام دەدرێت پێویستی بە دەنگی زۆرینەی رەهای ئەندامانی پەرلەمان هەیە، هەڵبەت دوای ئامادەسازیی تەواو بوبێت بۆ هەڵبژاردن، لە روی تەکنیکی و یاساییەوە، ئێستا یاسای هەڵبژاردنی ئەنجومەنی نوێنەرانی عێراق تەواو نەبوە، تائێستا بە تەواوەتی پەسەند نەکراوە، مەسەلەی بازنەکانی هەڵبژاردنی یەکلایی نەکراوەتەوە، کە پێویست دەکات پێداچونەوەشی پێدابکرێت، کۆمیسیۆنی باڵای هەڵبژاردنەکانی عێراق سەر لەبەری هەڵوەشاوەتەوە، تەنها ئەندامانی ئەنجومەنی کۆمیسیاران دانراون، کە ئەوەش کێشەی لەسەرە، ئێمە داوامانکردوە ئەو شێوازە لە دانانی ئەندامانی ئەنجومەنی کۆمیسیۆن بەشێوەی موحاسەسە و پشک پشکێنە، هەڵبوەشێتەوە، کۆمسیۆنەکە لە کەسانی پاک و بێلایەن پێکبهێنرێت.

لەم دۆخەی قەیرانی کۆرۆنا و قەیرانی داراییدا لە عێراق، بەدوری دەبینم لەئێستادا ئامادەکاریی بۆ هەڵبژاردنی پێشوەختە بکرێت، بەتایبەتی سەرەڕای قەیرانی ئابوری، مەسەلەی تەواو نەبونی یاسای هەڵبژاردن و کۆمیسیۆنیش لە ئارادایە.

- کەواتە دەکرێت، ئەم حکومەتەی کە بڕیارە پێکبهێنرێت، تەمەنی تەواو بکات لەگەڵ ئەم خولەی پەرلەماندا؟

ناتوانم باس لەوە بکەم، دەتوانین باس لەوە بکەین کە قسەکردن لە هەڵبژاردنی پێشوەختە بۆ ئێستا مەسەلەیەکی عەمەلی نابێت، نازانم بۆ ساڵی داهاتو دۆخەکە چۆن دەبێت.



هەواڵی زیاتر