جڤاتی نیشتمانی، هەڵبژاردنە ناوخۆییەکان و پێکهێنانی حکومەت تاوتوێ دەکات

21/10/2018

جڤاتی نیشتمانی بزوتنەوەی گۆڕان لەسەر پرسی ئامادەكارییەكانی هەڵبژاردن و کۆنفرانسە ناوخۆییەكان و پێکهێنانی حکومەتی نوێی هەرێم و عێراق کۆدەبێتەوە.
بڕیارە سبەینێ‌ شەممە، جڤاتی نیشتمانی بزوتنەوەی گۆڕان، لە مەکۆی سەرەکی کۆببێتەوە بۆ گفتوگۆکردن لەسەر پرسی کۆنفرانس و هەڵبژاردنە ناوخۆییەكان ‌و ئەنجامی هەڵبژدنە پەرلەمانییەكەی كوردستان ‌و چەند پرسێكی دیکەی سیاسی.
جەمال حاجی محەمەد، سكرتێری جڤاتی نیشتیمانی بزوتنەوە گۆڕان رایگەیاند: لە كۆبونەوەكەدا گفتوگۆ دەكرێت لەبارەی دەرئەنجامی هەڵبژاردنە پەرلەمانییەكەی (30) ئەیلول.
وتیشی :" لە کۆبونەوەی جڤاتی نیشتیمانیدا بڕیار لەبارەی پرسی هەڵبژاردنە ناوخۆییەكانی بزوتنەوەی گۆڕان ‌و پێكهێنانی لیژنەكانی ئامادەكاریی بۆ بەستنی كۆنفرانسەکان دەدرێت".

سکرتێری جڤاتی نیشتیمانی رایگەیاند: لە تەوەرێکی دیکەی کۆبونەوەکەدا گفتوگۆ دەكرێت لەبارەی پرۆسەی سیاسی و بەتایبەتی پرسی پێكهێنانی كابینەی نوێی حكومەت لە هەرێمی كوردستان ‌و عێراق.
رۆژی سێشەممە جڤاتی گشتی بزوتنەوەی گۆڕان کۆبوەوە و گفتوگۆکرا لەسەر دەرەنجامەکانی هەڵبژاردنی پەرلەمانی کوردستان و پرسی رێکخستنەوەی بزوتنەوەی گۆڕان و ئامادەکارییەکان بۆ کۆنفرانس و هەڵبژاردنە ناوخۆییەکان و دواتر بەستنی کۆنگرەی نیشتمانیی.

جڤاتى گشتى بزوتنەوەی گۆڕان ژمارەیەک راسپاردەی ئاراستەی جڤاتى نیشتیمانى کرد و داوایکرد پەلە بکەن لە پێکهێنانى لیژنەکانى ئامادەکارى بۆ بەستنی کۆنفرانس و هەڵبژاردنە ناوخۆییەکان و کۆنگرەی نیشتیمانیی بزوتنەوەی گۆڕان.


هەواڵی زیاتر