فراکسیۆنی گۆڕان، چاکسازی و سەروەری یاسا و دەستەبەرکردنی مافی هاوڵاتیان دەکەنە ئەولەویەتی کارەکانیان

فراکسیۆنی گۆڕان لە پەرلەمانی کوردستان،  بە لەبەرچاوگرتنی، مافەکانی هاوڵاتیان لە موچە و خزمەتگوزاریەکان و  چاکسازی گشتگیر و دەستەبەر کردنی مافەکانی هاوڵاتیان، کارنامەیەک بۆ وەرزی بەھارەی ساڵی سێیەمی خولی پێنجەمی پەرلەمانی کوردستان، ئامادە دەکات.

ئەمرۆ ٢٨/٢/٢٠٢١ فراکسیۆنی گۆڕان لەگەڵ ڕاوێژکارانی بزوتنەوەی گۆڕان لە پەرلەمانی کوردستان بە ھەماھەنگی ژووری پەرلەمان لەشاری ھەولێر کۆبونەوە.

گوڵستان سەعید سەرۆکی فراکسیۆنی گۆڕان بە (سایتی فەرمی بزوتنەوەی گۆڕان)ی وت: بە مەبەستی کاراتر کردنی پەرلەمان و بەشداری پێکردنی سەرجەم فراکسیۆنەکانی پەرلەمان لە دانانی بەرنامەیەکی نیشتیمانی بۆ چالاککردنی ڕۆڵی چاودێری کردن و پەسەند کردنی یاسای بودجە و پڕکردنەوەی ئەو بۆشاییە یاساییانەی کە ھەن هەوڵەکانمان چڕ کردوەتەوە.

وتیشی: بۆ دەستەبەر کردنی مافەکانی خەڵک لە موچە و خزمەتگوزاریەکان و  چاکسازی گشتگیر و ھەمەلایەنە لە بواری ئابوری و سەربازی و یاسایی و کارگێڕی و پەروەردەییدا تەواوی هەوڵەکانمان دەخەینەگەڕ.

 سەبارەت بە دۆخی هەرێمی کوردستان سەرۆکی فراکسیۆنی گۆڕان وتیشی: کار بۆ سەروەربونی یاساو پاراستنی مافی ھاووڵاتیان لە رێی پێشنیازە یاسای داواکاری گشتی و ئەنجومەنی دادوەریەوە دەکەین.

بڕیارە لە وەرزی بەهارەدا فراکسیۆنی گۆڕان کار بۆ نوسینەوە و پەسەند کردنی دەستورێک بۆ ھەرێم بکات کە ھەموو مافە دیموکراتی و ئازادیە گشتیەکان تیا بچەسپێ.