کەسوکارى دەستگیرکراوانى بادینان ستایشى هەڵوێستى گۆڕان دەکەن

ژمارەیەک لە کەسوکارى دەستگیرکراو و سزادراوانى بادینان ستایشى هەڵوێستى فراکسیۆنى گۆڕان و بزوتنەوەى گۆڕان دەکەن و داواش دەکەن بزوتنەوەکە لەسەر ئەو پاڵپشتییانەى بۆ دەنگى ئازاد بەردەوام بێت.

ئەمڕۆ یەکشەممە (5/9/2021)، ژمارەیەک لە کەسوکارى دەستگیرکراو و سزادراوانى بادینان سەردانى فراکسیۆنى گۆڕانیان کرد لە پەرلەمانى کوردستان و سوپاسى هەڵوێستى فراکسیۆن و بزوتنەوەى گۆڕانیان کرد کە لە سەرەتاى کەیسى دەستگیرکردن و سزادانى ژمارەیەک لە دەستگیرکراوانى بادینان ئامادەیى پڕۆسەى دادگاییکردنەکان و کەیسەکان بون.

هەروەک ستایشى پەرلەمانتارانى فراکسیۆنەکەیان کرد کە بەردەوام داکۆکییان لە مافى دەستگیرکراوانى بادینان کردوە و سەردانیان کردون و پاڵپشتیان بون، داوایان کرد ئەو پشتیوانیانە بەردەوامییان هەبێت و لە دادگاییەکەى سبەینێشدا بەشدار بن.

لاى خۆیەوە، جەلال محەمەد پەرلەمانتارى فراکسیۆنى گۆڕان جەختى کردەو کە بەردەوام دەبن لەسەر هەڵوێستەکانیان و دوپاتى کردەوە کە بەرگرى لە ئازادى رادەربڕین و کارى رۆژنامەوانى و راى ئازاد و مافى مرۆڤ، لە مەبادیئەکانى نەگۆڕەکانى بزوتنەوەى گۆڕانە، چ بزوتنەوەکە و چ فراکسیۆنەکەشى لە پەرلەمانى کوردستان بەردەوام دەبێت لەسەر ئەو پرەنسیپانە پشتیوانى دەنگى ئازاد و مافى مرۆڤە.