جڤاتی نیشتیمانی گۆڕان رێککەوتنەکەی لەگەڵ پارتی پەسەند کرد

جڤاتی نیشتیمانی بزوتنەوەی گۆڕان ئەو رێککەوتنەی پەسەند کرد کە شاندی دانوستانکاری بزوتنەوەکە و شاندی پارتی دیموکراتی کوردستان واژۆیان کرد.

کۆبونەوەی جڤاتی نیشتیمانی گۆڕان کۆتایی هات و لە کۆبونەوەکەدا تاوتوێی راسپاردەکانی جڤاتی گشتی کرا و دوای گفتوگۆکردن لەسەر رەشنوسی ئەو رێککەوتنەی شاندی هەردولا لە کۆبونەوەکانی رابردودا گەڵاڵەیان کردبو، بە کۆمەڵێک سەرنج و تێبینییەوە کە ئاڕاستەی شاندی دانوستانکاری گۆڕان کرا، رێککەوتنەکە پەسەندکرا.

ئاراس وەلی ئەندامی جڤاتی نیشتیمانی بزوتنەوەی گۆڕان بە رۆژنامەنوسانی راگەیاند: لە کۆبونەوەی ئەمڕۆدا، جڤاتی نیشتیمانی سەرجەم ئەو ئەنجامانەی پەسەند کرد کە شاندی دانوستانکار پێیگەیشتوە، بە هەندێک تێبینی و سەرنجەوە.

وتیشی :"فراکسیۆنی گۆڕان بەشداریی لە کۆبونەوەی پەرلەمانی کوردستاندا دەکات بۆ ئەوەی سەرجەم لایەنە سیاسییەکان بتوانین بگەینە قۆناغێکی دیکەی تێگەیشتن و حکومەتێک پێکبهێنین کە لە ئاستی خواست و داواکارییەکانی خەڵکی کوردستان و جێبەجێکاری بەرنامەی هەڵبژاردنی لایەنە سیاسییەکان بێت".

ئێوارەی رۆژی شەممە، شاندنی دانوستانکاری بزوتنەوەی گۆڕان و پارتی دیموکراتی کوردستان لە مەکۆی سەرەکی گۆڕان لە شاری سلێمانی بەڕێوەچو، بەپێی راگەیەندراوی کۆبونەوەکە؛ رێککەوتنى سیاسی نێوان پارتى و گۆڕان پەسەندکرا و هەردولا لەسەر چوار خاڵ رێککەوتن:

1- رێککەوتنى سیاسی نێوان پارتى و بزوتنەوەى گۆڕان پەسەندکرا
2- لە کۆبونەوەکەى (18)ی (2)ى پەرلەمانى کوردستاندا فراکسیۆنى پارتى و فراکسیۆنى گۆڕان بەشداردەبن.
3- لەسەر شێوازى پێکهێنانى حکومەت گەیشتونەتە قۆناغى کۆتایى و بەرەوپێشچونى بەخۆیەوە بینیوە
4- پڕۆژەى رێککەوتن دەبرێتەوە بۆ سەرکردایەتی هەردولا بۆ پەسەندکردنى.