بزوتنەوەی گۆڕان و یەکێتی نیشتیمانی لەبارەی گوزەرانی خەڵک و دۆخى چەقبەستوى سیاسییەوە هۆشداریی دەدەن

17/05/2022


بزوتنەوەی گۆڕان و یەكێتی نیشتیمانی كوردستان هۆشداریی دەدەن لە دۆخی چەقبەستوی سیاسی و جەخت دەکەنەوە لە پێویستی لابردنی ئەو بەربەستانەی كە لەبەردەم لێكنزیك بوونەوەی لایەنەكانە.

ئەمڕۆ سێشەممە وەفدێکی یەکێتی بە سەرۆکایەتی رزگار عەلی، ئەندامی دەستەی كارگێڕی مەكتەبی سیاسی و ژمارەیەک لە ئەندامانی مەكتەبی سیاسی سەركردایەتی ئەو حیزبە، سەردانی مەكۆی سەرەكی بزوتنەوەی گۆڕانیان كرد لە سلێمانی و لەگەڵ وەفدێکی جڤاتی نیشتیمانی کۆبونەوە.

لە کۆبونەوەکەدا رەوشی سیاسی هەرێمی كوردستان و عێراق، ژیان و گوزەرانی دژواری هاوڵاتیانی كوردستان و موچەخۆران گفتوگۆیان لەبارەوە كرا.

هەردوولا جەختیانكردەوە دۆخی چەقبەستوی سیاسی نێوان لایەنەكان، پێشهاتێكی مەترسیدارە بۆ تێكدانی یەكریزی نیشتمانی و تەبایی سیاسی نێوان لایەنەكان و پڕۆسەی سیاسی هەرێمیش دەخاتە ژێر پرسیارەوە، بۆیە هەرچی زوە دەبێت ئەو بەربەستانەی كە لەبەردەم لێكنزیك بوونەوەی لایەنەكانە لاببرێن، و پرسی هەمواركردنەوەی یاسایی هەڵبژاردنەكان كە  بوەتە خواستێكی جەماوەری و گشتگیر لەسەرانسەری هەرێمی كوردستاندا، هەڵوێستی هاوبەشی نیشتیمانی بۆ گەڵاڵە بكرێت و دەستکەوتەکان بپارێزین.


هەواڵی زیاتر