دلێر حسێن: نە توانراوە وەبەرهێنانى سەرکەوتو لە پڕۆژەکانى نیشتەجێبون بکرێ و گرفتى نیشتەجێبون و کرێنشینان چارەسەر بکرێ

سەرۆکى فراکسیۆنى گۆڕان لە ئەنجومەنى پارێزگاى هەولێر، رایدەگەیەنێت؛ وەبەرهێنان لە پڕۆژەى نیشتەجیبون بەشێوەیەکى تەندروست نەهاتە کایەوە، بۆیە نە توانرا بەهۆى ئەو پڕۆژانەوە گرفتى نیشتەجێبون و کرێنشینان چارەسەر بکرێ نە توانراش وەبەرهێنانى سەرکەوتو لە پڕۆژەکانى نیشتەجێبون بکرێ.

دلێر حسێن، سەرۆکى فراکسیۆنى گۆڕان لە ئەنجومەنى پارێزگاى هەولێر، لەبارەى پڕۆژەکانى نیشتەجێبون لە هەرێمى کوردستان و بەتایبەت لە سنورى پارێزگاى هەولێر ئاماژە بەوە دەکات؛ لە هەرێمى کوردستان وەبەرهێنان لە پڕۆژەى نیشتەجێبون بەشێوەیەکى تەندروست نەهاتە کایەوە، هەرچەندە بە گشتى کەرتى وەبەرهێنان گەشەى کردوە، بەڵام بەپێى خواست و لە بەرژەوەندى هاوڵاتییان نەبوە.

ئاماژە بەوەش دەکات؛ کۆمەڵێک پڕۆژە هەن مۆڵەتیان بۆ وەرگریراوە و تەواو نەکراون، بەشێکى زۆرى پڕۆژەکان دراونەتە خەڵکى حزبى هەندێکیان کە مۆڵتیان وەرگرتوە راستەوخۆ فرۆشراوەتەو ئەمەش بوەتە بارگرانى لەسەر هاوڵاتیان.

دەشڵێت: نەتوانرا بەهۆى پڕۆژەکانى نیشتەجێبونەوە گرفتى نیشتەجێبون و کرێنشینان چارەسەر بکرێ نەشتوانرا وەبەرهێنانى سەرکەوتو لە پڕۆژەکانى نیشتەجێبون بکرێ، زۆرینەى پڕۆژەکانیش دواى تەواوبونیان گرفتى دیکەى بەدواى خۆیدا هێنا لەروى خزمەتگوزارى و سکویریتى و هتد و خەڵکێکى زۆر لە بەشێکى پرۆژەکانى نیشتەجێ بون زەرەرمەند بون.